Álem chempıonatynda elimizdiń ánuranyn qoıýda qatelik ketti (vıdeo)

Reseıdiń Sochı qalasynda sambo kúresinen aıaqtalǵan álem chempıonatynda aqtóbelik palýan Eset Qýanov bas júldeni jeńip alyp, kók týymyzdy kókke jelbiretti! Bul týraly der kezinde oqyrmandarymyzǵa habarlap, súıinshi suraǵan edik. Búkil Qazaq eli qýanyp, aq túıeniń qarny jarylyp jatqanda marapattaý saltanaty kezinde oryn alǵan qolaısyz jaıtty aıtpaı ketken bolatynbyz. Sol oqıǵany búgin baıandap otyrmyz.

62 kılo salmaqtaǵy chempıondar men júldegerlerdi marapattaý kezinde uıymdastyrýshylar Qazaq eliniń ənuranynyń ornyna basqa eldikin qoıyp jiberdi. Altyn tuǵyrda turǵan Eset basyn shaıqap, «Bul emes» dep, qarsylyq bildirdi (vıdeo: 42:50). Osy kezde zalda turǵan bizdiń sportshylar biraýyzdan Qazaq eliniń ənuranyn shyrqap qoıa berdi. Eset te olarǵa qosyldy. Qazaqtardyń bul áreketin kórgen orys kórermender oryndarynan tik turyp qol soǵyp, rızashylyqtaryn jáne qoldaıtyndyqtaryn bildirdi. Uıymdastyrýshylar ózderinshe ánurandy toqtatyp, qaıtadan qoıyp edi, bul joly da shatasyp ketti. Oǵan qarap jatqan bizdiń sportshylar joq, elimizdiń ənuranyn shyrqap tura berdi. Kóptegen kórermen olardyń qasyna kelip, qoldaryn alyp, quttyqtap jatty.

Uıymdastyrýshylardyń bul áreketine túsinbedik, olar nege shatasty? Álde bul chempıonatta qazaqtardan chempıon shyqpaıdy dep oılady ma eken!? Esetten utylǵan Aslan Mýdranov tuǵyrda turyp, medalin bir sheshti, bir taqty, áıteýir kúmiske rıza bolmady.
Jaraıdy, ótken is ótti. Eń bastysy Eset inimiz ormandaı orystyń arasynan oıyp turyp altyn júldege qol jetkizdi! Bizdiń bul shaǵyn maqalada aıtqymyz kelgeni, qazaq samboshylarynyń qolaısyz sátte únsiz qalmaı, tyǵyryqtan shyǵa bilgeni edi. Olar eshqandaı asyp-saspaı elimizdiń ənuranyn shyrqady. Eset te azamat eken, olarǵa qosylyp ketti. Bul oqıǵa ózge sportshylarymyzǵa úlgi bolady dep oılaımyz! Jaraısyzdar, samboshylar! Biz sizderdi maqtan tutamyz!

Musaǵalı TASQALIEV,

AQTО́BE