تاەكۆوندودان ءاچ: قازاقستاننىڭ ەكى سپورتشىسى ەكىنشى اينالىمدا ءسۇرىندى

بۇگىن ازەربايجان رەسپۋبليكاسىنىڭ استاناسى – باكۋ قالاسىندا تاەكۆوندودان الەم چەمپيوناتى باستالدى، دەپ حابارلادى مادەنيەت جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

بيىلعى باسەكەگە 145 ەلدەن 950-دەن استام تاڭداۋلى سپورتشى جينالدى. ولار العاشقى جارىس كۇنى وليمپيادا باعدارلاماسىنا كىرەتىن ەكى سالماقتا سىنعا ءتۇسىپ جاتىر. ۇلتتىق قۇراما سپورتشىلارى – ەلدار ءبىرىمباي (68 كگ) مەن ماريا سەۆوستيانوۆا (57 كگ) جارىستى ەكىنشى اينالىمدا اياقتادى.

ماريا سەۆوستيانوۆا ءبىرىنشى اينالىمدا چەحيالىق حانا فلەگروۆانى سەنىمدى ۇتقان. وسىدان كەيىن تارتىستى جەكپە-جەكتە تاجىريبەلى برازيليالىق ماريا كلارا ليماعا جول بەردى. 17 جاستاعى وتانداسىمىز بيىل ۇلتتىق قۇراما ساپىنا قوسىلدى. بىلتىر جاستار اراسىنداعى ازيا جانە قازاقستان چەمپيوناتىنىڭ كۇمىس جۇلدەگەرى اتانعان. بيىل سلوۆەنيانىڭ اشىق چەمپيوناتىندا توپ جارعان. ول رەيتينگتىك تۋرنير بولىپ سانالادى. بۇل — ونىڭ ەرەسەكتەر اراسىنداعى العاشقى ءىرى جارىسى.

ەلدار ءبىرىمباي باكۋدەگى العاشقى جەكپە-جەگىندە گابوندىق امار مۇسانى 2:0 ەسەبىمەن ايقىن باسىمدىقپەن جەڭدى. الايدا كەلەسى كەزەڭدە پاريج گران-ءپريىنىڭ جەڭىمپازى، الەم رەيتينگىندە بەسىنشى ورىندا تۇرعان يسپانيالىق حاۆەر پەرەز پولودان ەسە جىبەردى.

وسىمەن ەكىنشى رەت الەم چەمپيوناتىنا قاتىسىپ تۇرمىن. مانچەستەردە (2019 جىلعى – رەد) جەكپە-جەكتەردە بار بىلگەنىمدى كورسەتە المادىم. بار قاتەلىك وزىمنەن كەتتى، — دەپ ايتتى ول جەكپە-جەكتەن كەيىن.

ايتا كەتەيىك، باكۋدە تاەكۆوندودان XXVI الەم چەمپيوناتى باستالدى. بيىلعى دودا حالىقارالىق تاەكۆوندو فەدەراتسياسىنىڭ 50 جىلدىعىمەن تۇسپا-تۇس كەلىپ تۇر. الداعى اپتادا مۇندا پاريج وليمپياداسىنا قاجەت ۇپايلار ساراپقا سالىنادى. بۇل سپورتتا رەيتينگى ەڭ جوعارى باسەكە – وليمپيالىق ويىندار (G20). ودان كەيىن الەم چەمپيوناتى (G14)، گران-ءپريدىڭ فينالى (G10) مەن گران-پري ساناتىنداعى جارىستار (G6) تۇر.

قازاقستاندىق تاەكۆوندوشىلاردىڭ ناتيجەسىنە شولۋ

ءبىزدىڭ دايانگ شەبەرلەرىمىز تاۋەلسىزدىك جىلدارى الەم چەمپيوناتىندا بارلىعى 8 قولا مەدالگە يە بولعان. جۇلدەگەرلەر: قايرات سارىمساقوۆ (2019 بەن 2017 جىلى)، ارمان شىلمانوۆ (2009 جىلى)، اسلان باتىقۇلوۆ، ارمان شىلمانوۆ، نازگۇل تاجىعۇلوۆا (2007 جىلى)، ليا نۋركينا (2003 جىلى)، ءادىلحان ساعىندىقوۆ (1999 جىلى).

شامكەن بايىربەك،

فوتو: مادەنيەت جانە سپورت مينيسترلىگىنىڭ سپورتتى دامىتۋ ديرەكتسياسى

استانا