اقتاۋدا جازعى ۋنيۆەرسيادا ويىندارى جالاۋىن كوتەردى (فوتو)

قازىر سپورت سۇيەر قاۋىم مەن ستۋدەنت جاستاردىڭ نازارى – ماڭعىستاۋ وبلىسىندا. ويتكەنى، اقتاۋ قالاسىندا بۇرىن-سوڭدى بولماعان سپورت باسەكەسى بولىپ جاتىر. عىلىم جانە جوعارى ءبىلىم مينيسترلىگىنىڭ قولداۋىمەن، Yessenov University ۇيىمداستىرۋىمەن 24 مامىر مەن 24 ماۋسىم ارالىعىندا جوعارى وقۋ ورىندارىنىڭ ستۋدەنتتەرى اراسىنداعى ءحىى جازعى ۋنيۆەرسيادا ويىندارى وتەدى.

ۋنيۆەرسيادا – مارتەبەسى جاعىنان وليمپيالىق ويىنداردان كەيىنگى ەكىنشى ورىنداعى سپورتتىق سايىس. بىراق بۇعان دەيىن ءار جىلدارى ءار ءوڭىر مەن ءار جوعارى وقۋ ورنى بىرلەسىپ وتكىزىپ كەلگەن ۋنيۆەرسيادانى بۇل جولى Yessenov University جەكە ۇيىمداستىرىپ وتىر. سول ءۇشىن دە قاتىسۋشىلارىمىز وسى ۋنيۆەرسيادانى وليمپيادالىق دەڭگەيدە ءوتىپ جاتىر دەپ ريزاشىلىقپەن باعالادى.

تاعى ءبىر ەرەكشەلىگىمىز – الدىڭعى ۋنيۆەرسيادا باعدارلامالارىندا 30-دان اسا سپورت ءتۇرى بولسا، قازىرگى تاڭدا ولار 17-گە دەيىن ىقشامدالىپ، ەڭ نەگىزگى سپورت تۇرلەرى عانا تاڭداپ الىندى. بۇل دەگەنىمىز، ساننان ساپاعا كوشۋ. ياعني، ۋنيۆەرسيتەتتەردەگى سپورتشىلاردىڭ كوپ اينالىساتىن سپورت تۇرلەرىنىڭ بەيىنىنە قاراي، ۇلتتىق عىلىمي-پراكتيكالىق دەنە تاربيەسى ورتالىعىمەن بىرلەسە وتىرىپ، دۇنيەجۇزىلىك ۋنيۆەرسيادانىڭ باعدارلاماسىنا باسىمدىق بەردىك. ءبىزدىڭ XII جازعى ۋنيۆەرسيادامىزدىڭ جەڭىمپازدارى الداعى تامىز ايىندا قىتايدىڭ چەندۋ قالاسىندا وتەتىن XXXII دۇنيەجۇزىلىك ۋنيۆەرسياداعا جولداما الادى. ءتىپتى، وسى ويىنداردا جارقىراپ شىققان جاس جۇلدىزدار 2024 جىلعى پاريج وليمپياداسىنا دا قاتىسادى دەپ ۇمىتتەنەمىز.

جالپى، وليمپيادا، جازعى نەمەسە قىسقى ۋنيۆەرسيادا ويىندارىن وتكىزۋ – ۇيىمداستىرۋشى تاراپ ءۇشىن تەك ماقتانىش پەن باسەكە عانا ەمەس، تاربيە مەن تاجىريبە دەپ ەسەپتەيمىز. ويتكەنى، مۇنداي اۋقىمداعى بايراقتى باسەكەلەر وتكەن جەرلەردە بالالار مەن جاسوسپىرىمدەردىڭ قىزىعۋشىلىعى ارتىپ، ولار دا سپورتقا بەيىم بولىپ وسەدى. سالاماتتى ءومىر سالتى ناسيحاتتالىپ، دەنە شىنىقتىرۋ مادەنيەتى مەن بۇقارالىق سپورتقا سۇرانىس ارتادى. سوندىقتان بولاشاعىن ويلاعان ەل، بولاشاعىن ويلاعان ايماق شىعىنى مەن اۋرەسىنە قاراماستان وسى باعىتتاعى يگى ىستەردەن ايانبايدى.

قازاقستان 2017 جىلى الماتى قالاسىندا XXVIII دۇنيەجۇزىلىك قىسقى ۋنيۆەرسيادا ويىندارىن جوعارى دارەجەدە وتكىزدى. بۇل جاعىنان ەلىمىز ءبىراز تاجىريبە جينادى. ەندى بولاشاقتا دۇنيەجۇزىلىك جازعى ۋنيۆەرسيادا ويىندارىن وتكىزۋگە دە ىنتالىمىز.

بۇقارالىق جانە كاسىبي سپورتتى ارقاشان قولدايتىن پرەزيدەنتىمىز قاسىم-جومارت توقاەۆ تۇركى مەملەكەتتەرىنىڭ ءبىلىم جانە عىلىم سالاسىنداعى ىنتىماقتاستىعىن نىعايتۋ ماقساتىندا ءىى تۇركى ۋنيۆەرسياداسىن ۇيىمداستىرۋ تۋرالى ۇسىنىسىن ايتتى. بۇل باستاما الداعى دۇنيەجۇزىلىك جازعى ۋنيۆەرسيادانىڭ العاشقى قادامدارى بولارى ءسوزسىز. ايتپاقشى، ءبىزدىڭ اقتاۋ ۋنيۆەرسياداسىنىڭ ۇزدىكتەرى تۇركىستان شاھارىندا وتەتىن ءىى تۇركى ۋنيۆەرسياداسىنا دا قاتىسا الادى.

ەسەنوۆ ۋنيۆەرسيتەتى بۇعان دەيىن ءار جىلعى سايىستارعا ستۋدەنتتەرىن بەلسەندى قاتىستىرا ءجۇرىپ، ءوزىمىز دە ۋنيۆەرسيادا الاۋى مەن جالاۋىن الۋعا ابدەن دايىندالدىق. 2021 جىلى كيەلى تۇركىستاننان قاسيەتتى ماڭعىستاۋعا جەتكەن كەزەكپەن ۇلى ءىستى باستاپ كەتتىك.

ۋنيۆەرسياداعا ەلىمىزدەگى ەڭ ىرگەلى 55 ۋنيۆەرسيتەتتىڭ 3000-نان استام ستۋدەنتى قاتىسىپ جاتىر. جارىس كەستەسى بويىنشا العاشقى ويىنداردى ۇستەل تەننيسى مەن ءجۇزۋ باستاپ بەردى.

باق وكىلدەرى ءۇشىن Yessenov University سپورت كەشەنىندە ارنايى اقپارات الاڭىن جاساقتاپ قويدىق. XII جازعى ۋنيۆەرسيادانىڭ بارلىق جاڭالىقتارى ءباسپاسوز بريفينگىندە كۇنارا جاريالانىپ تۇرادى. سونداي-اق universiade.yu.edu.kz رەسمي سايتىن اشىپ قويدىق.

ماڭعىستاۋ وبلىسىنىڭ 50 جىلدىعى، اقتاۋ قالاسىنىڭ 60 جىلدىعى اياسىندا، ۋنيۆەرسيادانى جوعارى دەڭگەيدە وتكىزۋگە وبلىس جانە قالا اكىمدىكتەرى دە ايرىقشا اتسالىسىپ جاتىر. اتاپ ايتقاندا، ءجۇزۋ، ۆولەيبول، تاەكۆاندو، شاحمات، توعىز قۇمالاق ويىندارى – ەسەنوۆ ۋنيۆەرسيتەتىندە، ءوزىمىزدىڭ سپورت كەشەنىمىزدە وتەدى.

ال ۇستەل تەننيسى – تەننيس ورتالىعىندا; ەركىن كۇرەس، دزيۋدو، گرەك-ريم، قازاق كۇرەسى، ايەلدەر كۇرەسى، جەڭىل اتلەتيكا جارىسى – «ماڭعىستاۋ-ارەنا» سپورت كەشەنىندە; باسكەتبول، فۋتزال، بوكس – «حالىق-ارەنا» سپورت سارايىندا; ۆولەيبول – «باتىر» سپورت كەشەنىندە; بادمينتون – «جاس قانات» سپورت كەشەنىندە; كاراتە – «ۆولنا» سپورت كەشەنىندە وتەدى.

ۋنيۆەرسيادانىڭ اشىلۋ سالتاناتى 5 ماۋسىم كۇنى، جابىلۋى 22 ماۋسىم كۇنى «ماڭعىستاۋ-ارەنا» سپورت كەشەنىندە جوسپارلانعان. وعان قاتىسۋشى قوناقتار ارنايى دايىندالعان شوۋ باعدارلامانى تاماشالايدى.

ءبىلىمدى، تاربيەلى ءارى دەنى ساۋ ۇرپاق – ۇلتتىڭ ەڭ قىمبات بايلىعى. ءبىلىم الۋشىلار وقۋمەن قاتار، ونەر ۇيرەنىپ، سپورتپەن شۇعىلدانىپ، جان-جاقتى جەتىلۋىنە قولايلى جاعداي جاساۋ – ۋنيۆەرسيتەتتىڭ باستى ماقساتى.

ۋنيۆەرسيادا قارساڭىندا ءبىز وقۋ ورنىمىزدىڭ باس كورپۋسىنىڭ جانىنان 1500 ورىندىق ستاديون قۇرىلىسىن سالۋدى باستادىق. سپورت نىسانىنىڭ جەر كولەمى – 0،2375 گا. جەر ۋچاسكەسىنىڭ اۋدانى – 0،24 گا، عيماراتتىڭ قۇرىلىس الاڭى – 853،13 م2.

جاڭا ستاديون قۇرىلىسى بىتكەن سوڭ باسقا دا سپورت سايىستارىن ءجيى وتكىزىپ تۇرۋدى جوسپارلاپ، تاجىريبە جيناپ جاتىرمىز.

 

بەرىك احمەتوۆ،

Yessenov University پرەزيدەنتى

ماڭعىستاۋ وبلىسى،

اقتاۋ قالاسى