جاراتقان، جاقسىلىقسىز دا كۇرەس جارىستارى وتە بەرەدى ەكەن-اۋ…

…جاقسىلىقتى ساعىندىم!  بىردە-ءبىر ءىرى جارىستاردا جاقسىلىقسىز جۇرمەۋشى ەدىم.  سوڭعى توكيو وليمپياداسىنا بارا المادىم.  ەشكىم ءجۇر دەگەن جوق.  بىراق وندا بارعاندا دا جاقسىلىق بولماس ەدى… ول قازاقتىڭ ءبىرتۋار ۇلى، سپورتىمىزدىڭ سيمۆولى، مەنىڭ جان دوسىمنىڭ كەلمەسكە كەتكەنىنە دە ەكى جىلدان استى…

…حانچجوۋداعى ازيا ويىندارىندا كۇرەس باستالدى.

كەشە گرەك-ريم شەبەرلەرىنىڭ باسەكەسىنە باردىق. ءبىر جىگىتىمىز فينالدا، ءۇش جىگىتىمىز قولا جۇلدە جولىندا كىلەمگە شىقپاق ەدى.  كەرەمەتتەي كۇرەس سارايىنا كىرگەن بەتتە جاقسىلىققا دەگەن ساعىنىش كەۋدەمدى جارىپ كەتە جازدادى.  مۇنداي جارىستا جاقسىلىقسىز جۇرمەيتىنمىن!  كۇرەستى جاقسىلىقسىز كورمەيتىنمىن!  جەڭىمپاز بەن جەڭىلگەن سپورتشى جايلى جاقسىلىقتان سۇراماي سەنبەيتىنمىن!  جارىستاردا جاقسىلىقپەن بىرگە جۇرمەگەن كۇندەرىمدى ءادىرا قالدى دەپ سانايتىنمىن!  جاقسىلىق بارماعان، جاقسىلىق كورمەگەن، جاقسىلىق باعالاماعان بەلدەسۋدى زاڭسىز كورەتىنمىن!  …مىنە، سول جاقسىلىق كوزدەن عايىپ بولعالى ەكى كۇز ءوتتى.  …ا، مۇنان بۇرىنعى، 2016 جىلعىنى ايتامىن، ريو-دە-جانەيرو وليمپياداسىندا دا جاقسىلىق بولمادى.  برازيلياعا اتتانۋعا تۋرا ءۇش كۇن قالعاندا ءوزى حابارلاستى تەلەفونمەن.
— نەسەكە، ساعان جول بولسىن ايتايىن دەپ حابارلاسىپ تۇرمىن…  وليمپياداڭدى تابىسپەن كورىپ ورال.
— ءوي، جاقا، جول بولسىنىڭ نە، بىرگە بارامىز دەگەنىمىز قايدا؟
— ەندى قايتەمىن… بارعىم-اق كەلگەن.  ارى-بەرى ءوز قارجىما بيلەت تە الىپ قويعانمىن. بىردە-ءبىر سپورت باستىعى حابارلاسىپ، توپقا قوسپادى عوي، قوسپادى!

ماعان قارجى كەرەك ەمەس، ءوزىمنىڭ اقشام جەتەدى.  بىراق سوناۋ برازيلياعا بارعاندا نە اككرەديتاتسيام جوق، نە باپكەرلەر توبىندا جوقپىن، ءوزىم بولەك جاتىپ، بولەك تۇرىپ، تۋريست بوپ بارامىن با؟!  ونداي ساياحات ماعان نەگە كەرەك؟  نە سپورتشىلارمەن كەزدەسە الماسام، ولارعا ازداعان اقىل-كەڭەس بەرە الماسام، نە ماماندارمەن جولىعىپ، ورتاق ويلاسۋلار، پىكىرلەسۋلەر قۇرا الماسام، سوندا مەن برازيلياعا تاماق ءىشىپ، قارىن سيپاپ جاتۋ ءۇشىن بارامىن با؟!  قۇرىسىن بارمايمىن، ارى-بەرى بيلەتىمدى وتكىزىپ تاستادىم…
— جاقا، جاقا، توقتا!  ولاي بولمايدى!  مەن ايتامىن ولارعا…
— جوق، نەسەكە، پويىز كەتىپ قالدى. ەندى قالعان ەكى كۇندە ەشكىم دە ماعان اككرەديتاتسيا الىپ بەرە المايدى.  وكىنىشتى،ارينە!  سەن امان-ەسەن بارىپ قايت.  تابىسپەن ورالىڭدار!..

…تەلەفون دا بىزبەن بىرگە قينالعانداي مياۋلاپ بارىپ ءۇزىلدى.  ول قالدى، مەن كەتتىم…
ريودا كۇرەس وتكەن كۇنى حابارلاستىم.  ەلدەگى تەلەارنادان كۇرەس باسەكەسىنە شولۋ جاساپ بەرۋگە شاقىرىپتى.  «نەسەكە، مىنا جىگىتتەردىڭ جىگەرسىزدىگىنەن شوشىپ وتىرمىن، جۇرەگىم دە اۋىرىپ وتىر…-دەدى ول. — كۇرەستەن وزىمنەن كەيىنگى وليمپيادا چەمپيونى بولعان قازاقتى كورە الماي كەتەتىن شىعارمىن…»

…تۋرا ايناعا قاراعانداي ايتىپتى.  سوناۋ 1980 جىلى ماسكەۋ وليمپياداسىندا كۇرەس ونەرىنەن قازاق جاستارىنىڭ اراسىنان تۇڭعىش بوپ وليمپيادا چەمپيونى اتانعان جاقسىلىق ۇشكەمپىروۆ وزىنەن كەيىنگى وليمپيادا چەمپيونى بولعان قازاق بالۋانىن كورە الماي كەتتى!

…جان دوسىم جاقسىلىق سول ارمانىن ماعان تاستاپ كەتكەندەي بولادى دا تۇرادى.  مىنا بەت الىسىمىزبەن ول كۇندى مەن دە كورە المايتىن سەكىلدىمىن…

…حانچجوۋداعى كەشەگى كۇرەس كەشى تاعى دا ەڭسەمىزدى تومەن تارتقىزىپ قايتاردى قوناق ۇيىنە: ايدوس سۇلتانعالي (60 كگ) قولا جۇلدەنى دە الا المادى. مەيىرجان شەرماحانبەت(67 كگ) قولىندا تۇرعان التىن مەدالدان ايىرىلىپ قالدى. ازات سادىقوۆ (77 كگ) كامبودجالىق قارسىلاسى شىقپاي، قولا جۇلدە الدى. ال ماقسات سايلاۋ (87 كگ) ءوز-وزىنەن كوتكەنشەكتەپ ءجۇرىپ، قولانى جاپون جىگىتىنە «سىيلاي» سالدى.

سودان سۇمىرەيىپ ۇيگە قايتتىق.  بىر ءسات مىنانداي بەلدەسۋلەردى جاقسىلىقتىڭ كورمەگەنىنە ءتاۋبا قىلدىم. نەگە كەرەك، جەر باسىپ پەندە بوپ جۇرگەن بىزدەر-اق كورىپ، جابىرقاي بەرەيىك.  جاقسىلىق سەكىلدى ۇلتتىڭ  بەت-بەينەسى سانالاتىن جانداردىڭ  جابىرقاۋىن ەندى جاراتۋشىم كورسەتپەسىن!

… اللام-اي، جاقسىلىقسىز  دا  كۇرەس  جارىستارى  وتە  بەرەدى  ەكەن-اۋ!!!    بۇل تىرشىلىك شىركىنگە  داۋا جوق شىعار…

نەسىپ جۇنىسباي ۇلى، — حۋانچجوۋدان

فوتو: Prosports.kz