Jaratqan, Jaqsylyqsyz da kúres jarystary óte beredi eken-aý…

…JAQSYLYQTY saǵyndym!  Birde-bir iri jarystarda JAQSYLYQSYZ júrmeýshi edim.  Sońǵy Tokıo Olımpıadasyna bara almadym.  Eshkim júr degen joq.  Biraq onda barǵanda da JAQSYLYQ bolmas edi… Ol qazaqtyń BIRTÝAR ULY, sportymyzdyń SIMVOLY, meniń JAN DOSYMnyń kelmeske ketkenine de eki jyldan asty…

…Hanchjoýdaǵy Azııa oıyndarynda kúres bastaldy.

Keshe grek-rım sheberleriniń básekesine bardyq. Bir jigitimiz fınalda, úsh jigitimiz qola júlde jolynda kilemge shyqpaq edi.  Keremetteı kúres saraıyna kirgen bette JAQSYLYQQA degen saǵynysh keýdemdi jaryp kete jazdady.  Mundaı jarysta JAQSYLYQsyz júrmeıtinmin!  Kúresti JAQSYLYQsyz kórmeıtinmin!  Jeńimpaz ben jeńilgen sportshy jaıly JAQSYLYQtan suramaı senbeıtinmin!  Jarystarda JAQSYLYQpen birge júrmegen kúnderimdi ádirá qaldy dep sanaıtynmyn!  JAQSYLYQ barmaǵan, JAQSYLYQ kórmegen, JAQSYLYQ baǵalamaǵan beldesýdi zańsyz kóretinmin!  …Mine, sol JAQSYLYQ kózden ǵaıyp bolǵaly eki kúz ótti.  …Á, munan burynǵy, 2016 jylǵyny aıtamyn, Rıo-de-Janeıro Olımpıadasynda da JAQSYLYQ bolmady.  Brazılııaǵa attanýǵa týra úsh kún qalǵanda ózi habarlasty telefonmen.
— Neseke, saǵan jol bolsyn aıtaıyn dep habarlasyp turmyn…  Olımpıadańdy tabyspen kórip oral.
— О́ı, Jaqa, jol bolsynyń ne, birge baramyz degenimiz qaıda?
— Endi qaıtemin… Barǵym-aq kelgen.  Ary-beri óz qarjyma bılet te alyp qoıǵanmyn. Birde-bir sport bastyǵy habarlasyp, topqa qospady ǵoı, qospady!

Maǵan qarjy kerek emes, ózimniń aqsham jetedi.  Biraq sonaý Brazılııaǵa barǵanda ne akkredıtaııam joq, ne bapkerler tobynda joqpyn, ózim bólek jatyp, bólek turyp, týrıst bop baramyn ba?!  Ondaı saıahat maǵan nege kerek?  Ne sportshylarmen kezdese almasam, olarǵa azdaǵan aqyl-keńes bere almasam, ne mamandarmen jolyǵyp, ortaq oılasýlar, pikirlesýler qura almasam, sonda men Brazılııaǵa tamaq iship, qaryn sıpap jatý úshin baramyn ba?!  Qurysyn barmaımyn, ary-beri bıletimdi ótkizip tastadym…
— Jaqa, Jaqa, toqta!  Olaı bolmaıdy!  Men aıtamyn olarǵa…
— Joq, Neseke, poıyz ketip qaldy. Endi qalǵan eki kúnde eshkim de maǵan akkredıtaııa alyp bere almaıdy.  О́kinishti,árıne!  Sen aman-esen baryp qaıt.  Tabyspen oralyńdar!..

…Telefon da bizben birge qınalǵandaı mııaýlap baryp úzildi.  Ol qaldy, men kettim…
Rıoda kúres ótken kúni habarlastym.  Eldegi telearnadan kúres básekesine sholý jasap berýge shaqyrypty.  «Neseke, myna jigitterdiń jigersizdiginen shoshyp otyrmyn, júregim de aýyryp otyr…-dedi ol. — Kúresten ózimnen keıingi Olımpıada chempıony bolǵan qazaqty kóre almaı ketetin shyǵarmyn…»

…Týra aınaǵa qaraǵandaı aıtypty.  Sonaý 1980 jyly Máskeý Olımpıadasynda kúres ónerinen qazaq jastarynyń arasynan tuńǵysh bop Olımpıada chempıony atanǵan JAQSYLYQ Úshkempirov ózinen keıingi Olımpıada chempıony bolǵan qazaq balýanyn kóre almaı ketti!

…Jan dosym JAQSYLYQ sol armanyn maǵan tastap ketkendeı bolady da turady.  Myna bet alysymyzben ol kúndi men de kóre almaıtyn sekildimin…

…Hanchjoýdaǵy keshegi kúres keshi taǵy da eńsemizdi tómen tartqyzyp qaıtardy qonaq úıine: Aıdos Sultanǵalı (60 kg) qola júldeni de ala almady. Meıirjan Shermahanbet(67 kg) qolynda turǵan altyn medaldan aıyrylyp qaldy. Azat Sadyqov (77 kg) kambodjalyq qarsylasy shyqpaı, qola júlde aldy. Al Maqsat Saılaý (87 kg) óz-ózinen kótkenshektep júrip, qolany japon jigitine «syılaı» saldy.

Sodan súmireıip úıge qaıttyq.  Bir sát mynandaı beldesýlerdi JAQSYLYQtyń kórmegenine táýba qyldym. Nege kerek, jer basyp pende bop júrgen bizder-aq kórip, jabyrqaı bereıik.  JAQSYLYQ sekildi ULTTYŃ  BET-BEINESI sanalatyn jandardyń  jabyrqaýyn endi Jaratýshym kórsetpesin!

… ALLAM-AI, JAQSYLYQSYZ  DA  KÚRES  JARYSTARY  О́TE  BEREDI  EKEN-AÝ!!!    Bul tirshilik shirkinge  daýa joq shyǵar…

Nesip JÚNISBAIULY, — Hýanchjoýdan

FOTO: Prosports.kz