تۇركىستاندا ءىى تۇركى ۋنيۆەرسياداسى باستالدى

بۇگىن تۇركىستاندا ءىى تۇركى ۋنيۆەرسياداسى باستالدى. ونىڭ اشىلۋ سالتاناتى «كەرۋەن ساراي» كەشەنىندەگى Show arena عيماراتىندا بولدى.

باۋىرلاس ەلدەردىڭ سپورتشى ورەندەرىنىڭ باسىن قوسقان دودانىڭ سالتاناتتى جيىنىنا تۇركى مەملەكەتتەرى ۇيىمى باس حاتشىسىنىڭ ورىنباسارى سادي دجافاروۆ، عىلىم جانە جوعارعى ءبىلىم ءمينيسترى ساياسات نۇربەك پەن تۇركىستان وبلىسىنىڭ اكىمى دارحان ساتىبالدى قاتىسىپ، جارىسقا قاتىسۋشىلارعا ساتتىلىك تىلەدى، — دەپ حابارلادى تۇركىستان وبلىسىنىڭ اكىمدىگى.

وبلىس اكىمى قۇتتىقتاۋ سوزىندە جارىستى تاريحي شاھاردا وتكىزۋگە قولداۋ كورسەتكەنى ءۇشىن تۇركى مەملەكەتتەرى ۇيىمى مەن عىلىم جانە جوعارى ءبىلىم مينيسترلىگىنىڭ باسشىلىعىنا العىسىن ءبىلدىردى. ودان كەيىن ۋنيۆەرسيادانىڭ ءمانى مەن ماڭىزدىلىعىن اتاپ ءوتتى.

– تۇركى الەمىنىڭ رۋحاني استاناسى، قاسيەتتى تۇركىستان قالاسى ەجەلدەن تۇركى الەمىنىڭ ماڭىزدى ورتالىعى بولعان. بۇكىل تۇركى دۇنيەسىنە ايگىلى ويشىل، ۇلى ۇستاز – قوجا احمەت ياساۋي وسى شاھاردا ءومىر سۇرگەن. تۇركىستان – بىرنەشە عاسىر قازاق حاندىعىنىڭ استاناسى بولدى. قوجا احمەت ياساۋي كەسەنەسى ماڭىندا قازاقتىڭ 21 حانى، سۇلتاندارى مەن باتىرلارى جەرلەنگەن. بۇگىن وسى قاسيەتتى توپىراقتا باۋىرلاس ەلدەرىمىزدى قارسى الۋ – ءبىز ءۇشىن ۇلكەن مارتەبە، ماقتانىش. تۇركى ەلدەرىنىڭ ەكىنشى ۋنيۆەرسياداسى حالىقارالىق جارىسقا اينالىپ وتىر.

بۇگىن تۇركىستانعا تۇركى الەمىنىڭ 6 مەملەكەتىنەن تالانتتى سپورتشىلار جينالدى. جارىسقا قاتىسۋشىلارعا ساتتىلىك تىلەيمىن! سىزدەر سان عاسىرلار الەمدى مويىنداتقان ەر تۇرىكتىڭ ۇرپاعىسىزدار! جاقىندا استانادا تۇركى مەملەكەتتەرى ۇيىمىنىڭ ونىنشى ءسامميتى ءوتتى. وعان تۇركى مەملەكەتتەرىنىڭ باسشىلارى قاتىسىپ، باۋىرلاس ەلدەر اراسىنداعى تاتۋلىقتى نىعايتۋ جولىنداعى ماڭىزدى شەشىمدەر قابىلدادى. ەكىنشى تۇركى ۋنيۆەرسياداسىنىڭ دا ماقساتى – وسى. ءبىز بارلىق باۋىرلاس ەلدەرمەن جان-جاقتى قارىم-قاتىناستى نىعايتۋ ءۇشىن بار كۇش-جىگەرىمىزدى سالامىز. تۇركى ەلدەرىن جاقىنداتاتىن اۋقىمدى جوبالاردى جالعاستىرامىز. بارشاڭىزدى ۋنيۆەرسيادانىڭ باستالۋىمەن شىن جۇرەكتەن قۇتتىقتايمىن! ءبىزدىڭ جاستارىمىز الەمدىك جارىستاردا ارقاشان جەڭىسكە جەتە بەرسىن! تۇركى الەمى جاساي بەرسىن! – دەدى دارحان ساتىبالدى.

جارىستىڭ اشىلۋ سالتاناتى جاقسى ۇيىمداستىرىلدى. الدىمەن «سپورت، سپورت» حورەوگرافيالىق تەاترلاندىرىلعان كومپوزيتسياسى كورەرمەن نازارىنا ۇسىنىلسا، «ىنتىماق مەكەنى» حورەوگرافيالىق تەاترلاندىرىلعان قويىلىم ارقىلى تۇركى ەلدەرىنىڭ بىرلىگى ناسيحاتتالدى. سونىمەن بىرگە تۇركىستان وبلىسىنىڭ تالانتتى ونەرپازدارى «قازاق ەلى وسىنداي»، «تۇركىستان»، «اق قۋراي»، «تۇران دالاسى» اندەرىمەن جۇرتشىلىقتىڭ رۋحىن وياتتى.

تۇركىستان قالاسىندا ءوتىپ جاتقان تۇركى مەملەكەتتەرى ۇيىمىنىڭ ستۋدەنت سپورتشىلارى اراسىنداعى ءىى تۇركى ۋنيۆەرسياداسىنا تۇركيا، ازەربايجان، وزبەكستان، ماجارستان، قىرعىزستان جانە قازاقستاننان 500-گە جۋىق سپورتشى قاتىسۋدا. ولار شاحمات، ۇستەل تەننيسى، ۆولەيبول، دزيۋدو، فۋتزال، گرەك-ريم كۇرەسى، ەركىن كۇرەس سپورت تۇرلەرى بويىنشا جۇلدەلەردى ساراپقا سالادى. سايىستار «OLIMPIC CENTER» سپورت كەشەنى مەن ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىندە ءوتىپ جاتىر. تۇركى ۋنيۆەرسياداسى 10 قاراشاعا دەيىن جالعاسادى.