Túrkistanda II Túrki ýnıversıadasy bastaldy

Búgin Túrkistanda II Túrki ýnıversıadasy bastaldy. Onyń ashylý saltanaty «Kerýen saraı» keshenindegi Show arena ǵımaratynda boldy.

Baýyrlas elderdiń sportshy órenderiniń basyn qosqan dodanyń saltanatty jıynyna Túrki memleketteri uıymy Bas hatshysynyń orynbasary Sadı Djafarov, Ǵylym jáne joǵarǵy bilim mınıstri Saıasat Nurbek pen Túrkistan oblysynyń ákimi Darhan Satybaldy qatysyp, jarysqa qatysýshylarǵa sáttilik tiledi, — dep habarlady Túrkistan oblysynyń ákimdigi.

Oblys ákimi quttyqtaý sózinde jarysty tarıhı shaharda ótkizýge qoldaý kórsetkeni úshin Túrki memleketteri uıymy men Ǵylym jáne joǵary bilim mınıstrliginiń basshylyǵyna alǵysyn bildirdi. Odan keıin Ýnıversıadanyń máni men mańyzdylyǵyn atap ótti.

– Túrki áleminiń rýhanı astanasy, qasıetti Túrkistan qalasy ejelden túrki áleminiń mańyzdy ortalyǵy bolǵan. Búkil túrki dúnıesine áıgili oıshyl, uly ustaz – Qoja Ahmet Iasaýı osy shaharda ómir súrgen. Túrkistan – birneshe ǵasyr Qazaq handyǵynyń astanasy boldy. Qoja Ahmet Iasaýı kesenesi mańynda qazaqtyń 21 hany, sultandary men batyrlary jerlengen. Búgin osy qasıetti topyraqta baýyrlas elderimizdi qarsy alý – biz úshin úlken mártebe, maqtanysh. Túrki elderiniń ekinshi ýnıversıadasy halyqaralyq jarysqa aınalyp otyr.

Búgin Túrkistanǵa túrki áleminiń 6 memleketinen talantty sportshylar jınaldy. Jarysqa qatysýshylarǵa sáttilik tileımin! Sizder san ǵasyrlar álemdi moıyndatqan Er túriktiń urpaǵysyzdar! Jaqynda Astanada Túrki memleketteri uıymynyń onynshy sammıti ótti. Oǵan túrki memleketteriniń basshylary qatysyp, baýyrlas elder arasyndaǵy tatýlyqty nyǵaıtý jolyndaǵy mańyzdy sheshimder qabyldady. Ekinshi Túrki Ýnıversıadasynyń da maqsaty – osy. Biz barlyq baýyrlas eldermen jan-jaqty qarym-qatynasty nyǵaıtý úshin bar kúsh-jigerimizdi salamyz. Túrki elderin jaqyndatatyn aýqymdy jobalardy jalǵastyramyz. Barshańyzdy Ýnıversıadanyń bastalýymen shyn júrekten quttyqtaımyn! Bizdiń jastarymyz álemdik jarystarda árqashan jeńiske jete bersin! Túrki álemi jasaı bersin! – dedi Darhan Satybaldy.

Jarystyń ashylý saltanaty jaqsy uıymdastyryldy. Aldymen «Sport, sport» horeografııalyq teatrlandyrylǵan kompozıııasy kórermen nazaryna usynylsa, «Yntymaq mekeni» horeografııalyq teatrlandyrylǵan qoıylym arqyly túrki elderiniń birligi nasıhattaldy. Sonymen birge Túrkistan oblysynyń talantty ónerpazdary «Qazaq eli osyndaı», «Túrkistan», «Aq qýraı», «Turan dalasy» ánderimen jurtshylyqtyń rýhyn oıatty.

Túrkistan qalasynda ótip jatqan Túrki memleketteri uıymynyń stýdent sportshylary arasyndaǵy II Túrki ýnıversıadasyna Túrkııa, Ázerbaıjan, О́zbekstan, Majarstan, Qyrǵyzstan jáne Qazaqstannan 500-ge jýyq sportshy qatysýda. Olar shahmat, ústel tennısi, voleıbol, dzıýdo, fýtzal, grek-rım kúresi, erkin kúres sport túrleri boıynsha júldelerdi sarapqa salady. Saıystar «OLIMPIC CENTER» sport kesheni men Q.A.Iasaýı atyndaǵy halyqaralyq qazaq-túrik ýnıversıtetinde ótip jatyr. Túrki ýnıversıadasy 10 qarashaǵa deıin jalǵasady.