ازيادا قورىتىندىسى: مينيستر فەدەراتسيالاردى سىنادى

تۋريزم جانە سپورت ءمينيسترى ەرمەك مارجىقپاەۆ سەمسەرلەسۋ جانە تاەكۆوندو فەدەراتسيالارىنىڭ باسشىلارى مەن جاتتىقتىرۋشىلارىمەن كەزدەسۋ وتكىزدى. جيىندا سپورت تۇرلەرىنىڭ ازيا ويىندارىنداعى قورىتىندى ەسەبى تىڭدالىپ، الداعى پاريج وليمپياداسىنا قاتىستى جوسپارلار پىسىقتالدى، دەپ حابارلادى ۆەدومستۆو. 

ەرمەك مارجىقپاەۆ حانچجوۋداعى كورسەتكەن ناتيجەلەرگە كوڭىلى تولمايتىنىن جەتكىزىپ، فەدەراتسيا وكىلدەرىنىڭ ازيادا الدىندا بەرگەن مىندەتتەمەلەرىن ورىنداي الماعانىن قاتتى سىنعا الدى.

ايتا كەتۋ كەرەك، سەمسەرشىلەر ازيا ويىندارىندا 1 التىن، 1 قولا مەدال الۋدى جوسپارلاعانىمەن جارىس قورىتىندىسىندا 1 كۇمىس پەن 2 قولا جۇلدەنى قاناعات تۇتتى. سونداي-اق تاەكۆوندوشىلار دا 1 التىن، 1 كۇمىس جانە 2 قولا مەدال الۋدى ماقسات تۇتقانىمەن، قىتايدا نەبارى ەكى قولا جۇلدەنى يەلەندى.

كەزدەسۋ سوڭىندا مينيستر قۇرلىقتىق جارىستىڭ ناتيجەلەرىنە جان-جاقتى تالداۋ جۇرگىزىپ، قاتەلىكتەرمەن جۇمىس ىستەۋدى تاپسىردى. سونداي-اق پاريج وليمپياداسىنا دەيىن جەتكىلىكتى جولدامالاردى جەڭىپ الۋدى العا تارتتى.

كورىپ وتىرعانىمىزداي، ازيا ويىندارىندا ەكى فەدەراتسيانىڭ سپورتشىلارى كوڭىلدەن شىعاتىنداي ناتيجە كورسەتەن جوق. دەگەنمەن، بۇل ساتسىزدىكتەن، بۇگىنگى سىننان ءتيىستى قورىتىندى شىعارۋ كەرەك. الدىمىزدا پاريج وليمپياداسى. ەندى قالعان سەگىز ايدا دايىندىقتى كۇشەيتىپ، ليتسەنزيالىق تۋرنيرلەردە توپ جارۋ قاجەت، — دەدى تۋريزم جانە سپورت ءمينيسترى ەرمەك مارجىقپاەۆ.

ايتا كەتەيىك، كەزدەسۋدە سەمسەرشىلەر پاريج وليمپياداسىنا بەس، ال تاەكۆوندوشىلار ەكى جولداما جەڭىپ الۋعا مىندەتتەمە الدى.