مينيستر گيمناستيكا فەدەراتسياسىنا جۇمىسىن قايتا قاراۋدى تاپسىردى

تۋريزم جانە سپورت ءمينيسترى ەرمەك مارجىقپاەۆ گيمناستيكا فەدەراتسياسىنىڭ باسشىلىعىمەن جانە جاتتىقتىرۋشىلار شتابىمەن كەزدەسۋ وتكىزدى. جيىندا كوركەم جانە سپورتتىق گيمناستيكا وكىلدەرى بيىلعى جىلدى قورىتىندىلاپ، پاريج وليمپياداسىنا دايىندىق جوسپارلارىن تانىستىردى، دەپ حابارلادى ۆەدومستۆو.

قىتايدىڭ حانچجوۋ قالاسىندا وتكەن ازيا ويىندارىندا كوركەم گيمناستيكادان قازاقستان قۇراماسى ۇزدىك ناتيجە كورسەتىپ، سارى قۇرلىق دوداسى الدىنداعى مىندەتتەمەلەرىن تولىق ورىندادى. ياعني وتانداستارىمىز 2 كۇمىس جانە 1 قولا مەدال جەڭىپ الدى.

الدىمەن، گيمناستارعا ازيا ويىندارىندا جاقسى ونەر كورسەتكەنى ءۇشىن العىسىمدى بىلدىرگىم كەلەدى. فەدەراتسيا باسشىلىعى قىتايداعى جارىس الدىندا تەك ءبىر كۇمىس جۇلدە الۋدى جوسپارلاعانىمەن، سپورتشىلارىمىز ءبىز كۇتكەننەن دە جاقسى ناتيجەگە جەتتى. ازيا الامانىنىڭ قورىتىندىسى بويىنشا گيمناستار ەل قورجىنىنا ءۇش مەدال سالدى. ارينە، گيمناستيكادا تورەشىلەردىڭ سۋبەكتيۆتى باعالاۋى ءجيى كەزدەسەتىنى بارىنە ءمالىم. ءبىزدىڭ سپورتشىلاردىڭ بۇدان دا جاقسى ناتيجە كورسەتۋىنە مۇمكىندىگى بولعان ەدى. الايدا ءبارى ءبىز ويلاعانداي بولا بەرمەيدى. سوندىقتان حالىقارالىق جارىستاردا جۇمىس ىستەيتىن وتاندىق تورەشىلەردىڭ سانىن ارتتىرۋ بويىنشا جۇمىستى كۇشەيتۋ قاجەت، — دەدى ەرمەك مارجىقپاەۆ.

ازيا ويىندارىندا سپورتتىق گيمناستيكادان ەلىمىزدىڭ ەرلەر قۇراماسى قىتايدا 1 كۇمىس جانە 1 قولا مەدال جەڭىپ الۋدى جوسپارلاعانىمەن، ءبىر قولا جۇلدەنى يەلەندى. دەگەنمەن، ۇلتتىق قۇراما وكىلدەرى جەكەلەي كوپسايىستا وليمپيادا جولداماسىن جەڭىپ العانىن ايتا كەتكەن ءجون. ايەلدەر قۇراماسى حانچجوۋدا تۇعىرعا كوتەرىلە المادى.

كەزدەسۋ سوڭىندا مينيستر سپورتشىلاردىڭ، اتاپ ايتقاندا سپورتتىق گيمناستيكا بويىنشا ەرلەر مەن ايەلدەر قۇراماسىنىڭ دايىندىق جۇمىستارىن قايتا قاراۋدى تاپسىردى. سپورتتىڭ وسى تۇرىندەگى ۇلتتىق قۇراما وكىلدەرىنىڭ سوڭعى جىلدارداعى ناتيجەلەرى سپورتشىلاردى جاڭا جۇيە بويىنشا جاتتىقتىرۋدى قاجەت ەتەدى.