اۋستراليادا «ۇلكەن دۋلىعا» ءتۋرنيرى باستالدى

بۇگىن اۋستراليانىڭ مەلبۋرن قالاسىندا جىلدىڭ العاشقى «ۇلكەن دۋلىعا» ءتۋرنيرى – اۋستراليا اشىق چەمپيوناتى باستالدى.

قازاقستاننىڭ ءبىرىنشى، الەمنىڭ ءۇشىنشى راكەتكاسى ەلەنا رىباكيناعا جەرەبە جولداس بولماي، العاشقى اينالىمدا-اق قيىن قارسىلاس ءتۇستى، دەپ حابارلادى RRaketkasi.

رىباكينا 31 جاستاعى چەحيالىق تەننيسشى  كارولينا پليشكوۆامەن وينايدى. بۇل سپورتشى الەمدىك رەيتينگىدە 37-ورىندا تۇرعانىمەن، كەزىندە ءبىرىنشى راكەتكا اتانعان اسا تاجىريبەلى ويىنشى.

چەحيا تەننيس مەكتەبىنىڭ مىقتى ەكەنىن بۇكىل الەم بىلەدى. ونىڭ ۇستىنە پليشكوۆا ەلەنا رىباكينا سياقتى دوپتى قاتتى بەرەدى. سوندىقتان 16 قاڭتارعا بەلگىلەنگەن ەكەۋىنىڭ ويىنى كوپشىلىكتىڭ نازارىن اۋدارارى انىق.

كەيبىر مامانداردىڭ بولجامىنا قاراعاندا، چەحيالىقپەن شايقاسقا تىڭ كەلۋى ءۇشىن رىباكينا وسىنىڭ الدىنداعى ادەلايدا WTA 500 ءتۋرنيرىنىڭ شيرەك فينالىندا رەسەيلىك ەكاتەرينا الەكساندروۆامەن كەزدەسۋىندە بارىن سالا قويماعان. بۇدان بۇرىن رىباكينا پليشكوۆانىڭ ءۇش رەت مەسەلىن قايتارعانىمەن، قايسىسىنىڭ ءدال قازىرگى ساتتە شەبەرلىگى باسىم ەكەنىن الداعى كەزدەسۋ كورسەتەدى، — دەلىنگەن ماتەريالدا.

رىباكينا بيىل دا كەمىندە فينالعا دەيىن جەتىپ، ۇپايدان شاشاۋ شىعارماي، تۋرنيرلىك كەستەدەگى جاعدايىن جاقسارتۋعا بار كۇشىن سالاتىنى ءسوزسىز.

ەسەسىنە قازاقستاننىڭ ەكىنشى، الەمنىڭ 64-راكەتكاسى يۋليا پۋتينتسەۆانىڭ ءبىرىنشى اينالىمنان قينالماي وتۋىنە تولىق مۇمكىندىگى بار. ول 15 قاڭتاردا نەگىزگى جارىسقا ىرىكتەۋ سايىستارىنان كەيىن قوسىلعان، رەيتينگىدە 191-ساتىداعى رەسەيلىك، 21 جاستاعى اناستاسيا زاحاروۆامەن وينايدى. ەگەر ساتتىلىك جولداس بولىپ، يۋليا پۋتينتسەۆا جوق جەردەن اشۋلانباي، سابىرلى ويناسا، قارسىلاسىن جەڭە الادى.

قازاقستاننىڭ ەرلەر اراسىندا ءبىرىنشى، الەمنىڭ 31-راكەتكاسى الەكساندر بۋبليك تە ىرىكتەۋ سايىسى جەڭىمپازدارىنىڭ ءبىرى، رەيتينگىدە 139-ساتىداعى ۇندىستاندىق سۋميت ناگالمەن 16 قاڭتاردا كورتقا شىعادى. ناگال رەيتينگىدە تومەن تۇرعانىمەن، «ۇلكەن دۋلىعا» جارىسىندا بارىن سالارى ءسوزسىز. ەگەر ءبارى ويداعىداي بولسا، بۋبليك ءۇشىنشى اينالىمدا الەمنىڭ 2-راكەتكاسى، يسپانيا جۇلدىزى كارلوس الكاراسپەن جۇزدەسۋى مۇمكىن، — دەلىنگەن حابارلامادا.

بۇل تۋرنيردە قازاقستاننىڭ جۇپتىق سىنداعى ءبىرىنشى، الەمنىڭ 44-راكەتكاسى اننا دانيلينا سلوۆاكيالىق ۆيكتوريا گرۋنچاكوۆامەن، پۋتينتسەۆا كولۋمبيالىق كاميلا وسوريومەن دۋەت بولىپ باق سىنايدى. ال، رىباكينا جۇپتىق باسەكەگە قاتىسپايدى.

قازاقستاننىڭ ەرلەر اراسىندا جۇپتىق سىنداعى ءبىرىنشى، الەمنىڭ 46-راكەتكاسى الەكساندر نەدوۆەسوۆ ءبىرازدان بەرى سەرىكتەس بولىپ، ءبىر-بىرىنە ۇيرەنىپ قالعان ەكۆادورلىق گونسالو ەسكوبارمەن بىرگە دوداعا تۇسەدى. ال بۋبليك جۇپتىق سىندا سەربيالىق دۋشان لايوۆيچپەن دۋەت قۇردى. اندرەي گولۋبەۆ جاراقاتىنا بايلانىستى اۋستراليا چەمپيوناتىنان تىس قالدى.