تۇركيادا كوشپەندىلەر ويىندارى تالقىلاندى

تۇركيانىڭ ىستانبۇل قالاسىندا ەلىمىزدىڭ تۋريزم جانە سپورت ۆيتسە-ءمينيسترى سەرىك جاراسباەۆ پەن V دۇنيەجۇزىلىك كوشپەندىلەر ويىندارىن وتكىزۋ جونىندەگى ديرەكتسيانىڭ جەتەكشىسى نايل نۇروۆ دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ءبىلال ەردوعانمەن كەزدەسىپ، ۇيىمداستىرۋ جۇمىستارىنا قاتىستى ماسەلەلەردى تالقىلادى.

تۋريزم جانە سپورت ۆيتسە-ءمينيسترى كوشپەندىلەر ويىندارىنا دايىندىق جۇمىستارى مەن اقپاراتتىق-ناسيحات شارالارىنىڭ قىزۋ ءجۇرىپ جاتقانىن ايتتى، — دەپ حابارلادى ديرەكتسيا.

ديرەكتسيا جەتەكشىسى نايل نۇروۆ V دۇنيەجۇزىلىك كوشپەندىلەر ويىندارىنىڭ ماڭىزىن ەسكەرە وتىرىپ، جارىستىڭ اشىلۋ جانە جابىلۋ سالتاناتى مەن دۇرمەكتى دودانى الەمنىڭ جەتەكشى تەلەارنالارى ارقىلى تاراتۋ ماسەلەسىن دە ورتاعا سالدى.

ءبىلال ەردوعان تاراپتار اراسىنداعى ارىپتەستىك قاتىناستىڭ ارتقانىن ايتا كەلە، كوشپەندىلەر ويىندارىن ۇيىمداستىرۋ قازاقستاننىڭ ەتنوسپورت قوزعالىسىن الەمدىك دەڭگەيدە ناسيحاتتاۋداعى اتاپ ايتارلىقتاي جوبالارىنىڭ ءبىرى ەكەنىنە ايرىقشا ءمان بەردى.

جيىندا قازاقستان دەلەگاتسياسىنىڭ 16-18 اقپان ارالىعىندا وتەتىن دۇنيەجۇزىلىك ەتنوسپورت كونفەدەراتسياسىنىڭ كونگرەسىنە قاتىساتىنى دا حابارلاندى.

ىستانبۇلداعى دۇنيەجۇزىلىك ەتنوسپورت كونفەدەراتسياسىنىڭ كەڭسەسىندە وتكەن كەزدەسۋگە تۇركىتىلدەس مەملەكەتتەردىڭ ىنتىماقتاستىق كەڭەسىنىڭ باس حاتشىسى باعدات امىرەەۆ پەن قازاقستان رەسپۋبليكاسىنىڭ باس كونسۋلدىعىنىڭ وكىلدەرى دە قاتىستى، — دەلىنگەن حابارلامادا.

2024 جىلدىڭ 8-14 قىركۇيەك ارالىعىندا استانادا وتەتىن V دۇنيەجۇزىلىك كوشپەندىلەر ويىندارىنا 100-دەن استام مەملەكەتتەن 4 000-عا جۋىق سپورتشى قاتىسادى دەپ جوسپارلانىپ وتىر.

V دۇنيەجۇزىلىك كوشپەندىلەر ويىندارىنىڭ ۇرانى — « ۇلى دالا ءدۇبىرى».