« ۇلى دالا جورىعى» جوباسى حالىقارالىق دەڭگەيدە ۇيىمداستىرىلادى

7 اقپاندا JORYQ ات سپورتى فەدەراتسياسىنىڭ جەتەكشىسى باقىتجان تۇرلىبەكوۆ تۇركيانىڭ قازاقستانداعى ەلشىسى مۋستافا كاپۋدجۋمەن كەزدەستى، دەپ حابارلادى halyq-uni.kz.

اڭگىمە كەزىندە الەمدە تەڭدەسى جوق « ۇلى دالا جورىعى» جوباسى تۋرالى ءسوز قوزعالىپ، 2024 جىلى ۇلتتىق سپورت قاۋىمداستىعىنىڭ قولداۋىمەن العاش رەت حالىقارالىق دەڭگەيدە وتكەلى تۇرعان مارافون-بايگەنىڭ ۇيىمداستىرۋ ماسەلەلەرى تالقىلاندى.

« ۇلى دالا جورىعى» حالىقارالىق ءدۇبىرلى دوداسىنىڭ V دۇنيەجۇزىلىك كوشپەندىلەر ويىندارىنىڭ قارساڭىندا وتەتىن ماۋسىمىنا ارنايى بوتاي (سقو) — بوزوق (استانا) باعىتى تاڭدالىپ الىنۋى تەرەڭ مازمۇنعا يە. كەمىندە شەتەلدىك 15 كوماندا باق سىنايتىن ايتۋلى بايگەنىڭ جالپى قاشىقتىعى 400 شاقىرىم بولادى.

مارافون-بايگەنىڭ بوتايدان باستالۋىنىڭ باستى ءبىر سەبەبى – عالىمداردىڭ زەرتتەۋىنشە ادام بالاسى جىلقى مالىن ءدال وسى جەردە العاش رەت قولعا ۇيرەتكەن دەپ ەسەپەتەلىنەدى. ال، استانا قالاسىنىڭ تۇبىندەگى بوزوق قالاشىعى VIII–X عع. كونە تۇركىلەردىڭ كيەلى مەكەنى بولىپ سانالادى.

سونىمەن قاتار، باقىتجان تۇرلىبەكوۆ مۋستافا كاپۋدجۋعا تۇركيانىڭ ات سپورتىنا جاۋاپتى مەكەمەلەرمەن تىعىز بايلانىس ورناتۋعا جانە الدا وتەتىن مارافون-بايگەنىڭ ۇيىمداستىرۋ جۇمىسىنا ەلشىلىك تاراپىنان ەرەكشە نازار اۋدارۋىن سۇرادى.

مۋستافا كاپۋدجۋ JORYQ  ات سپورتى فەدەراتسياسىنىڭ باستامالارىنا ءوز دەڭگەيىندە قولداۋ كورسەتۋگە ءازىر ەكەندىگىن ءبىلدىردى.

JORYQ ات سپورتى فەدەراتسياسى بىلتىرعى جىلدىڭ جەلتوقسان ايىندا ۇلتتىق سپورت قاۋىمداستىعىنا ەندى. قازىر ۇلتتىق سپورت قاۋىمداستىعىنىڭ قۇرامىندا بايگە، كوكپار، اۋدارىسپاق، جامبى اتۋ، تەڭگە ءىلۋ، قۇسبەگىلىك، ءداستۇرلى ساداق اتۋ، اسىق اتۋ، توعىزقۇمالاق جانە JORYQ فەدەراتسياسى بار.

JORYQ فەدەراتسياسى – « ۇلى دالا جورىعى» مارافون-بايگەسىن ۇيىمداستىرۋشى.