سونيا جيەنباەۆا ITF Juniors J300 ءتۋرنيرىنىڭ جەڭىمپازى اتاندى

17 جاستاعى تەننيسشى سونيا جيەنباەۆا يسپانيانىڭ ۆيلەنا قالاسىندا جاسوسپىرىمدەر اراسىندا وتكەن ITF Juniors J300 ءتۋرنيرىنىڭ جەڭىمپازى اتاندى، دەپ حابارلادى قازاقستان تەننيس فەدەراتسياسى.

جاسوسپىرىمدەر اراسىندا الەمدىك رەيتينگىدە 47-ورىندا تۇرعان س.جيەنباەۆا فينالدا جارىستىڭ ءبىرىنشى راكەتكاسى، بەلگيالىق جۋلەن ۆاندرومەنى (33 ITF Juniors) 7:5، 6:0 ەسەبىمەن جەڭدى.

بۇل سونيا جيەنباەۆانىڭ جەكەلەي سىندا ITF Juniors تۋرنيرلەرىندەگى جەتىنشى تيتۋلى بولدى.

ماتچ قيىن بولدى. جەڭىسكە جەتكەنىمە وتە قۋانىشتىمىن. بەلگيالىق قارسىلاسىم توپىراق توسەنىشىندە جاقسى وينايتىندىقتان، بار شەبەرلىگىمدى سالىپ، ۇزدىك ونەر كورسەتۋگە تىرىستىم. ءبارى ءساتتى بولىپ، بيىلعى جىلداعى العاشقى چەمپيوندىق اتاقتى جەڭىپ الدى، — دەدى سونيا جيەنباەۆا.

قازاقستان جاسوسپىرىمدەر قۇراماسى دا شەتەلدەگى تۋرنيردە نامىسقا تىرىسىپ، شيرەك فينالعا شىقتى. جاسوسپىرىمدەر مالايزيانىڭ كۋچينگتە قالاسىندا 14 جاسقا دەيىنگى تەننيسشىلەر اراسىندا ءوتىپ جاتقان World Junior Tennis Competition 14&under ازيا – تىنىق مۇحيت ايماعى بويىنشا ىرىكتەۋ كەزەڭىندە ¼ فينالعا جولداما الدى.

ءوز توبىندا سوڭعى ويىندا مارات ءشارىپوۆتىڭ شاكىرتتەرى يران كومانداسىن 3:0 ەسەبىمەن ويسىراتا جەڭدى.

مەدينا وتەپبەرگەن راحيماناميريدەن 6:2، 6:2 ەسەبىمەن ايلاسىن اسىرسا، نايليا بايماحان شابانپۋردان 6:4، 6:1 ەسەبىمەن باسىم ءتۇستى.

جۇپتىق سىندا مەدينا وتەپبەرگەن مەن ەكاتەرينا كيريۋشەنكو راحيماناميري مەن مەلينانى 6:1، 6:3 ەسەبىمەن جەڭدى.