پرەمەر-ليگا: «ەلىماي» سەنساتسيا جاسادى

كۇنى كەشە فۋتبولدان قازاقستان پرەمەر ليگاسىنىڭ ءۇشىنشى تۋرىنىڭ ويىندارى بولدى.

ءبىر ايعا جۋىق ۇزىلىستەن كەيىن 12 كوماندا ءوزارا باق سىناپ، مىقتىنى انىقتادى. ايتا كەتۋ كەرەك «قايسار» كلۋبى «اقسۋ» كومانداسىنىڭ چەمپيوناتتان شەكتەتىلگەنىنە بايلانىستى دەمالىس الدى. تارتىسقا تولى وتكەن بۇل تۋردا 10 گول سوعىلىپ، تورەشىلەر تاراپىنان 36 سارى قاعاز بەن 2 قىزىل قاعاز كورسەتىلىپ، جالپى سانى 22 400 كورەرمەن تاماشالاعان. قىسقاشا ويىندارعا شولۋ جاساپ وتەيىك.

«شاحتەر» -«تۇران»  0:2

ءۇشىنشى تۋر شىمىلدىعىن «شاحتەر» مەن «تۇران»  كوماندالارى اشتى. كەنشىلەر ءوز الاڭدارىندا قاقپاعا جاۋاپسىز ەكى گول جىبەرىپ الدى. ويىن باستالا سالىسىمەن 7-مينۋتتا «اقتوبە» قاجەت ەتپەگەن بوليۆيالىق شابۋىلشى لەوناردو ۆاكا گول سالىپ، ەسەپ اشتى. ءبىرىنشى تايم اياقتالار ساتكە تامان برانيسلاۆ سلۋكا ەكىنشى گولدى سوقتى. ەكىنشى تايمدا قوس كوماندا تاراپىنان قاۋىپتى ساتتەر بولعانىمەن، ناتيجە بولمادى. وسىلايشا «شاحتەردىڭ» جەڭىسسىز ءارى گولسىز سەرياسى جالعاسۋدا.

«اتىراۋ» — «جەتىسۋ» 0:1

مۇنايشى ستاديونىندا اۋىز تولتىرىپ ايتارلىقتاي قىزىقتى ساتتەر بولمادى. ماۋسىمنىڭ باسىندا «مۇنايشىلار» قۇرامىن كۇشەيتىپ العان بولاتىن.

ويىننىڭ ءبىرىنشى تايمىندا گول بولمادى. الايدا ەكىنشى تايمنىڭ 73-مينۋتىندا  سەرىكجان مۋجيكوۆ بۇرىشتامادان وسى تۋردىڭ ەڭ ۇزدىك گولىن سوقتى. ارادان ءۇش مينۋت وتكەن سوڭ، ويىن ەرەجەسى بۇزىلىپ «جەتىسۋ» قاقپاسىنا پەنالتي بەلگىلەندى. بىراق 38 جاستاعى جارتىلاي قورعاۋشى يگور ستاسەۆيچ ون ءبىر مەترلىك ايىپ دوبىن تورعا توعىتا المادى.قايرات نۇرداۋلەتوۆتىڭ شاكىرتتەرى بۇل ويىندا جارادى.

«اقتوبە» — «جەڭىس» 3:0

«اقتوبە» استانانىڭ «جەڭىس» كلۋبىمەن كەزدەستى.  ويىن باستالا سالىسىمەن «اق-قىزىلدار» شابۋىلداپ «جەڭىستى» ابدەن ابىگەرگە سالدى. ويىننىڭ 13-مينۋتىندا استانالىق كوماندانىڭ قاقپاسىنا پەنالتي بەلگىلەنىپ، ماكسيم سامورودوۆ ونى ءساتتى ورىندادى. پەنالتيدەن سوڭ ءۇش مينۋت وتە سالىسىمەن يدريس ۋماەۆ قورعاۋشىنى الداپ ءوتىپ، «جەڭىس» قاقپاسىنىڭ كىلتىن ءدال تاپتى. «اقتوبە» جىلدام ەكى گول سوققانان كەيىن ويىنى باياۋلاپ قالعانى راس. بىراق ونى قارسىلاس كوماندا ءساتتى پايدالانا المادى. ال ويىننىڭ 48-مينۋتىندا دومينيكاندىق لەگيونەر دورني رومەرو عالامات گول سوعىپ، جانكۇيەرلەر كوزايىمىنا اينالدى.

ايتا كەتۋ كەرەك، ماتچتىڭ 72- مينۋتىندا اقتوبەلىك قورعاۋشى ماتەو باراچ تۋردىڭ العاشقى قىزىل قازاعىن الدى.

«قىزىلجار» — «توبىل» 0:0

پەتروپاۆلداعى ءىش پىستىرارلىق ويىن نەمەسە دوستىقتىڭ جەڭىسى. قوس كوماندا تاراپىنان اسا قاۋىپتى شابۋىلدار بولمادى. سايكەسىنشە تابلوداعى ەسەپتە وزگەرىسسىز قالدى.

«استانا» — «ەلىماي» 0:1

3-تۋردىڭ سەنساتسياسى «استانا» مەن «ەلىماي» كوماندالارىنىڭ اراسىنداعى ماتچتا بولدى. قوس كوماندا كەزەكپەن  كەزەك شابۋىلدادى. «ەلىماي» كلۋبىنىڭ دا «استانانىڭ» دا سوققى باعىتتاپ، قاقپا باعاناسىنا تيگەن قاۋىپتى ساتتەرى بولدى. ويىننىڭ 59-مينۋتىندا الاڭ يەلەرى  ساپىندا الەكسا امانوۆيچ قىزىل قاعازبەن جازالانىپ، ويىننان شەتتەتىلدى. ال ويىن ەسەبىن 88-مينۋتتا رومان مۋرتازاەۆ اشتى.

ماتچتىڭ نەگىزگى ۋاقىتىنا 7 مينۋت قوسىلعانىمەن، استانالىقتار ەسەپتى تەڭەستىرە المادى.

«ورداباسى» — «قايرات» 1:2

تۋردىڭ ورتالىق ماتچى شىمكەنتتە بولدى. ويىننىڭ 42-مينۋتىندا ۇلتتىق قۇرامانىڭ ەۋروپادا جالعىز گولىن سوعىپ كەلگەن ادىلەت سادىبەكوۆ تاعى دا ءوز شەبەرلىگىن كورسەتتى.

ويىندا بەكحان شايزادا كەرەمەت سەيۆتەرىمەن كوزگە ءتۇستى. ال ەكىنشى تايمدا الماتىلىق ۇجىمنىڭ ليدەرى جواۋ پاۋلۋ ەسەپ ايىرماسىن ۇزارتتى. شىمكەنتتىكتەردىڭ 85-مينۋتتا جاساعان شابۋىلى ناتيجەلى بولىپ، جاسۋر ياحشيبوەۆ ويىن نۇكتەسىن قويدى.

وتكەن تۋردا تۋرا وسى ستاديوندا «تۇرانعا» قارسى تەڭ ويناعان «قايرات» وسى جولى شىمكەنتتىكتەردەن ايلاسىن اسىرا الدى. ايتپاقشى «ورداباسى» مەن «قايراتتىڭ» ويىنى 3-تۋردا ەڭ كوپ كورەرمەن جيناعان ماتچ (8700 كورەرمەن) بولدى.

 

اينات قابيدۋللاەۆ،

استانا