پرەمەر-ليگا: «شاحتەر» جاڭا جاتتىقتىرۋشىمەن جەڭىسكە جەتتى

فۋتبولدان پرەمەر-ليگانىڭ ءتورتىنشى تۋرى جىل سايىن جەر-ءجۇزى بويىنشا 6 ءساۋىر كۇنى تويلاناتىن حالىقارالىق سپورت كۇنىمەن تۇسپا تۇس كەلدى.

4-تۋر ەكى كۇنگە سوزىلىپ، قىزىقتى دا تارتىستى بولدى. بۇل تۋردا جالپى سانى 9 گول سوعىلدى. ويىندارعا قىسقاشا شولۋ جاساپ وتەيىك.

«قىزىلجار» — «جەڭىس» 4:0

تۋردىڭ العاشقى ويىنى پەتروپاۆل قالاسىندا بولدى. بۇل ماتچتا قىزىلجاردىڭ فاۆوريت بولعانى انىق، الايدا ءىرى ەسەپپەن جەڭىسكە جەتەدى دەپ ەشكىم كۇتپەسە كەرەك. جەرگىلىكتى كوماندا تاراپىنان ءتورت گولدىڭ تورتەۋىندە لەگيونەرلەر سوقتى. العاشقىسىن ماتچتىڭ 23-مينۋتىندا كوماندا كاپيتانى ەۆگەني بەرەزكين ءتورت قورعاۋشىنىڭ تۇرعانىنا قاراماستان قاقپا كىلتىن ءدال تاپتى. ايتا كەتۋ كەرەك، بەرەزكين وسى ماۋسىمدا «قىزىلجار» ساپىندا ءۇشىنشى گولىن سوعىپ وتىر. ال ەكىنشى تايمنىڭ 56-مينۋتىندا ءبريجيدۋدىڭ بۇرىشتامادان اسىرعان پاسىن زوران نيجيچ ءوزىنىڭ بويشاڭدىعىن پايدالانىپ گول سوعىپ كەتتى. ەكى گول سالعان سوڭ پەتروپاۆلدىقتار وزدەرىنە سەنىمدى ويناي باستادى.

ويىننىڭ 71-مينۋتىندا بريجيدۋ تاعى دا بۇرىشتامادان پاس اسىرىپ، بوريس تسميليانيچ ەسەپتى ەسەلەدى. وسى گولدان كەيىن تسميليانيچتىڭ ورنىنا الەكسەي ششەبەتۋن شىقتى. ۋكراينالىق شابۋىلشى كوپ ۋاقىت وتپەي ويىننىڭ 81-مينۋتىندا «جەڭىستىڭ» قاتەلىگىن ءساتتى پايدالانىپ گول سوقتى.

وسىلايشا، «قىزىلجار» كومانداسى پرەمەر ليگاداعى تاجىريبەنىڭ ارقاسىندا ءوز جانكۇيەرلەرىن قۋانتتى. سونىمەن قاتار «جەڭىس» بار جەردە جەڭىلىس بار ەكەنىن دە ۇمىتپاعان ءجون.

«ەلىماي» — «قايسار» 1:0

«ەلىماي» — «قايسار» ماتچى پاۆلوداردا بولدى. العاشقى تايمدا سەمەيلىكتەردىڭ ويىنى جۇرمەي، شابۋىلدارى ناتيجەسىز بولىپ جاتتى. الايدا ويىننىڭ 80-مينۋتىندا وتكەن ماۋسىمدا «اقتوبەنى» العا سۇيرەگەن رودجەريو شينا ەسەپ اشىپ، ويىن نۇكتەسىن قويدى. ال قىزىلوردالىق «قاسقىرلار» قاسقىر مىنەزدەرىن كورسەتە الماي كەلە جاتقاندارىنا وسىمەن ءتورتىنشى تۋر.

ماتچتان كەيىن «قايسار» كومانداسىنىڭ الەۋمەتتىك جەلىدەگى پاراقشاسىندا ماتچتا تورەلىك ەتكەن  سايات قاراباەۆتىڭ جۇمىسىنا نارازىلىقتارىن جەتكىزدى.

«قايرات» — «جەتىسۋ» 0:0

الماتىداعى جاڭبىرلى ويىندا ەسەپ اشىلمادى. العاشقى مينۋتتاردا ادەتتەگىدەي جواۋ پاۋلو گول سوققان بولاتىن، بىراق وفسايد بولىپ ەسەپكە الىنبادى. ويىننىڭ 24-مينۋتىندا «جەتىسۋ» قاقپاسىنا پەنالتي بەلگىلەنىپ، پاۋلو گول سوعا المادى. پەنالتي تەبۋدە ويىن ەرەجەسى بۇزىلدى دەپ پاۋلوعا تاعى دا مۇمكىن بەرىپ ەدى، ارسەن سيۋكاەۆ دوپتى وپ-وڭاي ۇستاپ الدى.

ەكىنشى تايمدا الماتىلىقتار بىرنەشە رەت شابۋىلداپ گول سوعا المادى. ءتىپتى دوپتىڭ قاقپا ماڭدايشاسىنا تيگەن ساتتەرى دە بولدى. ال «جەتىسۋ» ويىنشىلارى تەك قورعانۋدى ءجون كوردى. وسىلايشا ماتچ ءفاۆوريتى  «قايرات» قايرات نۇرداۋلەتوۆ شاكىرتتەرىنەن ايلاسىن اسىرا المادى.

«اقتوبە» — «اتىراۋ» 1:1

تۋردىڭ ەكىنشى كۇنى باتىس دەربيىمەن باستاۋ الدى. سوڭعى ويىندا جەڭىلىس تاپقان «مۇنايشىلار»، «اقتوبەگە» قارسى تىڭعىلىقتى دايىندالىپ كەلگەنى بايقالدى. كوپ كۇتتىرمەي ويىننىڭ 11-مينۋتىندا ۇلتتىق قۇرامانىڭ ويىنشىسى ءادىلحان تاڭجارىقوۆ بۇرىشتامادان اسىرىلعان پاستى ءساتتى پايدالانىپ، ەسەپ اشتى. وسى گولدان كەين قوس كوماندا ءبىرىنشى تايمنىڭ سوڭىنا دەيىن ءىش-پىستىرارلىق ويىن كورسەتكەنى دە راس.

قىزىقتىڭ ءبارى ەكىنشى تايمدا بولدى. بىرەسە «اقتوبەنىڭ»، بىرەسە «اتىراۋدىڭ» شابۋىلىن كورۋمەن بولدىق. «اتىراۋ» شابۋىلشىلارىنىڭ قاقپاعا باعىتتاعان سوققىلارىنىڭ بارلىعى قاقپاشى ششاتسكيدىڭ قولىنان تابىلىپ جاتتى. تەك ويىننىڭ 69-مينۋتىندا 32 جاستاعى شابۋىلشى نيكولاي سيگنەۆيچ پاستى ءساتتى پايدالانىپ، تارازى باسىن تەڭەستىردى. وسىلايشا ۆيتالي جۋكوۆسكي شاكىرتتەرى سىرت الاڭدا «اقتوبەدەن» ۇپاي الىپ كەتتى.

«شاحتەر» — «استانا» 1:0

تۋردىڭ سەنساتسياسى تاعى دا «استاناعا» قارسى ماتچتا بولدى. چەمپيونات باستالعالى بىردە ءبىر ۇپاي الماعان «كەنشىلەر» ەلوردالىق كلۋبتى قاپى قالدىردى. ويىننىڭ 26-مينۋتىندا كوماندا ليدەرى رودجەر كانياس عالامات گولىمەن كوزگە ءتۇستى.  كانياستىڭ گولى ءتىپتى، وسى تۋردىڭ ەڭ ۇزدىك گولى بولۋى ابدەن مۇمكىن. ويىننىڭ قالعان ۋاقىتتارىندا «استانا» ءوز مۇمكىندىكتەرىن ءساتتى پايدالانا المادى. ايتا كەتۋ كەرەك جاقىندا عانا «شاحتەر» ساپىنان باس جاتتىقتىرۋشى يگور سولوشەنكو قىزمەتىنەن بوساتىلىپ، ورنىنا اندرەي فينونچەنكو تاعايىندالعان بولاتىن. وسىلايشا فينونچەنكو العاشقى ماتچىندا سەنساتسيا جاساپ، جانكۇيەرلەردى ءتانتى ەتتى.

«تۇران» — «ورداباسى» 0:1

وڭتۇستىك دەربيدە شىمكەنتتىك كلۋب باسىم ءتۇستى. تۇركىستانداعى ستاديون دايىن بولماعاندىقتان «تۇران» ويىندارىن شىمكەنتتە وتكىزىپ جۇرگەنىن بىلەمىز. سول سەبەپتى «ورداباسى» ۇيدە ويناپ جاتقانداي وزدەرىن ەركىن سەزىندى. كومانداعا كەلە سالىسىمەن كورەرمەن كوزايىمىنا اينالعان شابۋىلشى جاسۋر ياحشيبوەۆ ويىننىڭ 25-مينۋتىندا ەسەپ اشتى. ودان بولەك «ورداباسى» ساپىنان ۆسەۆولود سادوۆسكي  ماتچتىڭ 89-مينۋتىندا گول سوققان ەدى، بىراق تورەشى ەسەپكە المادى.

ايتا كەتەتىن جايت «ورداباسى» ساپىندا جاراقات الىپ، ۇزاق ۋاقىتتار بويى الاڭعا شىقپاعان ۇلتتىق قۇراما ويىنشىسى باۋىرجان يسلامحان 80-مينۋتتا اسحات تاعىبەرگەنمەن اۋىستى.

تۋرنيرلىك كەستەگە كوز جۇگىرتسەك ازىرگە «قايرات» ءبىرىنشى ورىندا. ەكىنشى ورىنمەن التىنشى ورىندا «قىزىلجار»، «ورداباسى»، «اقتوبە»، «ەلىماي»، «توبىل» كوماندالارى جەتى ۇپايمەن ءوزارا ءبولىسىپ تۇر. اۋتسايدەردەن جەڭىلىس تاپقان «استانا» التى ۇپايمەن جەتىنشى ورىنعا جايعاستى. «تۇران»مەن «جەتىسۋ» ءتورت ۇپايمەن سەگىزىنشى ورىندا. «اتىراۋ»، «شاحتەر»، «جەڭىس» ونىنشى، ون ەكىنشى ورىندا. ال ماۋسىم باستالعالى جەڭىلىستەن كوز اشپاعان «قايسار» تۋرنيرليك كەستەنىڭ سوڭىندا تۇر.

 

اينات قابيدۋللاەۆ،

استانا