اباي اتىنداعى قاز ۇپۋ – قازاق كۇرەسىنىڭ قولداۋشىسى

16 مامىر كۇنى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ 90  جىلدىعىنا  وراي  الماتى قالاسىنداعى جوعارى وقۋ ورىندارى ستۋدەنتتەرى اراسىندا جاستار اراسىندا قازاق كۇرەسىن كەڭىنەن ناسيحاتتاۋ، ۇلتتىق سپورت تۇرىمەن اينالىساتىن جاس پالۋانداردىڭ ۇلەسىن ارتتىرۋ ماقساتىندا ءتول كۇرەسىمىزدەن  «ۋنيۆەرسيتەت بارىسى»  جارىسى وتكىزىلدى. ول ءبىلىم ورداسىنىڭ كۇردەلى جوندەۋدەن ءوتىپ، جاڭادان تۇساۋى كەسىلگەن سپورت كەشەنىندە جالاۋىن كوتەردى.

الامان جارىستىڭ اشىلۋ سالتاناتىندا ءسوز سويلەگەن ۋنيۆەرسيتەت رەكتورى، پروفەسسور تاكير  بالىقباەۆ ءبىلىم ورداسىنىڭ 90 جىلدىعى اياسىندا ۇيىمداستىرىلىپ جاتقان اۋقىمدى شارالارعا توقتالىپ، بارشا قاتىسۋشىلارعا ساتتىلىك تىلەدى. ءسوز كەزەگىن العان  قۇرمەتتى قوناقتار قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ قۇرمەتتى قىزمەتكەرى، ۇلتتىق سپورت ونەرىنىڭ جاناشىرى، گەنەرال-لەيتەنانت  ءادىل شاياحمەتوۆ،  قازاقستاننىڭ  ەڭبەك سىڭىرگەن جاتتىقتىرۋشىسى، قازاق  كۇرەسءى فەدەراتسياسىنىڭ تۇڭعىش  پرەزيدەنتى ەرعالي مۇحيتدينوۆ،  الماتى قالاسى ءماسليحاتىنىڭ دەپۋتاتى، ۋنيۆەرسيتەتىمىزدىڭ باقىلاۋ كەڭەسىنىڭ مۇشەسى كەنجەحان ماتىجانوۆ،  «دينامو» سپورت قوعامى ورتالىق كەڭەسى توراعاسىنىڭ ورىنباسارى، كسرو جانە  قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى مارات  قوشاەۆ، قازاقستاننىڭ ەڭبەك سىڭىرگەن ءارتيسى ليۋتسيا تۋلەشوۆا سپورتشىلارعا جىلى لەبىزدەرىن ءبىلدىرىپ، الداعى ويىندارىنا جەڭىستەر تىلەدى.

جارىسقا قالامىزدىڭ  20  جوعارى وقۋ ورنىنان 120-دان استام سپورتشى قاتىسىپ، 60 كگ، 74 كگ جانە 100 كگ سالماق دارەجەسى بويىنشا كۇش سىناستى. دوداعا  حالىقارالىق ساناتتاعى تورەشىلەر تورەلىك ەتىپ، ءادىل باعاسىن بەردى.

تۋرنير  قورىتىندىسى بويىنشا 60 كگ سالماق دارەجەسىندە 3 ورىندى قازاق سپورت جانە تۋريزم اكادەمياسىنىڭ پالۋانى  ماديار جامبىل جانە اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ  پالۋانى ازامات ىقىن ءوزارا بولىسسە،  2 ورىندى  قازاق سپورت جانە تۋريزم اكادەمياسىنىڭ سپورتشىسى سامات ساعاتبەك قانجىسىنا بايلادى. ءدال وسى ءبىلىم ورداسىنىڭ پالۋانى جومارت ءامىرالى جۇلدەلى 1 ورىندى جەڭىپ الدى.

74 كگ سالماق دارەجەسى بويىنشا «نارحوز» ۋنيۆەرسيتەتىنىڭ  پالۋانى  بولات ابدىكارىم  مەن قازاق سپورت جانە تۋريزم اكادەمياسىنىڭ پالۋانى الماس تۇراربەك  قولا مەدال يەگەرلەرى اتاندى. قازاق سپورت جانە تۋريزم اكادەمياسىنىڭ ەكى بىردەي پالۋانى داۆرون داۆاەۆ جانە بيجان ەلىباي كۇمىس جانە التىن مەدالدى جەڭىپ الدى.

100 كگ سالماق دارەجەسى بويىنشا «قاينار» ۋنيۆەرسيتەتىنىڭ ستۋدەنتى جانسەرىك جۇماباي پەن قازاق سپورت جانە تۋريزم اكادەمياسىنىڭ ستۋدەنتى كەنەسارى ورىنباسار 3 ورىنعا ورنالاسسا، 2 ورىندى قازاق سپورت جانە تۋريزم اكادەمياسىنىڭ پالۋانى ەراسىل جاناتاەۆ جەڭىپ الدى. اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ پالۋانى مەيرامبەك باراح التىن مەدال يەگەرى اتاندى. سونىمەن قاتار مەيرامبەك باراحقا 100 كگ سالماق دارەجەسىندە بەلدەسكەن قازاق كسر-ءنىڭ ەڭبەك سىڭىرگەن جاتتىقتىرۋشىسى، كسرو سپورت شەبەرى، سامبو كۇرەسىنەن 100 كگ سالماقتا ەلىمىزدىڭ بىرنەشە دۇركىن چەمپيونى، جوعارى وقۋ ورىندارى اراسىنداعى اۋىل شارۋاشىلىعى ستۋدەنتتەرى اراسىندا وتەتىن رەسپۋبليكالىق ءتۋرنيردىڭ جەڭىمپازى، ەلىمىزگە تانىمال كوپتەگەن پالۋانداردى جاتتىقتىرعان امانگەلدى يسماعۇلوۆتىڭ ارنايى جۇلدەسى مەن 100 000 تەڭگە كولەمىندە اقشايلاي سىيلىق تابىس ەتىلدى.

جالپى قازاق كۇرەسىنىڭ جۇلدە قورى  I ورىنعا 150 000 تەڭگەنى، II ورىنعا  100 000 تەڭگەنى، III ورىنعا 50 000 تەڭگە بولدى.

ۇزدىك ونەر كورسەتكەن سپورتشىلار «جاس پالۋان»، «شاپشاڭ پالۋان»، «جىگەرلى پالۋان»، «قاجىرلى پالۋان»، «شەبەر پالۋان» اتالىمدارىمەن جانە باعالى سىيلىقتارمەن ماراپاتتالدى.

بارلىق قاتىسۋشى سپورتشىلار  مەن جارىس بارىسىن ءادىل باعالاعان تورەشىلەر القاسى  باعالى سىيلىقتار جانە العىس حاتتارمەن ماراپاتتالدى.

ساۋىقتىرۋ دەنە مادەنيەتى كافەدراسىنىڭ مەڭگەرۋشىسى امانتاي قاراقوۆتىڭ قازاق كۇرەسىنەن وسىنداي الاماندى قالا دەڭگەيىندە  ايتۋلى ءبىلىم شاڭىراعىندا ۇيىمداستىرىپ، ىسكە اسىرۋ وڭاي بولماعانى دا انىق. دەگەنمەن دە جۇمىلا كوتەرگەن جۇك جەڭىل دەمەكش، ۋنيۆەرسيتەت رەكتورىنىڭ تىكەلەي قولداۋ-كومەگى مەن بىلگىر دە بىلىكتى  باسشىنىڭ، ۇلتتىق كۇرەسكە دەگەن دۇرىس كوزقاراسىنىڭ ناتيجەسىندە جارىس وتە جاقسى ءوتتى. سونىمەن قاتار، وسىنداي بايراقتى جارىستىڭ باسىنان باقايشىعىنا دەيىن، قارا جۇمىستىڭ ءبارىن تياناقتى اتقاراعان قازاق كۇرەسىنەن العاشقى  الەم چەمپيوناتىنىڭ كۇمىس جۇلدەگەرى ەركىن سايدوقوۆتىڭ جاستا باس بولعان ورەلى ىسىنە كوپشىلىك باس بارماقپەن باعا بەردى.

تارتىستى وتكەن الامان جەكپە-جەكتەردىڭ سوڭىندا ۋنيۆەرسيتەت باسشىسى تاكير بالىقباەۆ قارا شاڭىراقتىڭ مەرەيلى مەرەكەسى اياسىندا تۇڭعىش رەت ۇيىمداستىرىلعان بۇل سپورتتىق دودا، الداعى ۋاقىتتا ءداستۇرلى شاراعا اينالاتىندىعىنا ۇلكەن سەنىم ءبىلدىردى. بۇل جارىس ستۋدەنتتەردىڭ ۇلتتىق كۇرەسىمىزگە دەگەن سۇيىسپەنشىلىگىن ارتتىراتىن بەرەكەلى باستاما ەكەندىگى كوڭىل قۋانتادى. الداعى جىلى قاتىسۋشىلاردىڭ سانى ەكى ەسە كوبەيە تۇسەتىندىگىندە كۇمان جوق. سوندىقتان دا تۇساۋى جاڭادان كەسىلگەن بۇل باسەكەنىڭ بولاشاعى جارقىن دەپ بىلەمىز.

 جاناتبەك ىشپەكباەۆ،

اباي اتىنداعى قازۇپۋ-ءنىڭ

تاربيە جۇمىسى جانە الەۋمەتتىك دامۋ جونىندەگى پرورەكتورى،

پروفەسسورى

فوتو: سەرىك يمانقۇلوۆ

الماتى