وليمپيادادا بەس-التى سپورتتان جۇلدە الامىز – سپورت كوميتەتى (فوتو، ۆيدەو)

استانادا وليمپيالىق ويىنداردىڭ باستالۋىنا 85 كۇن قالعاندا، تۋريزم جانە سپورت مينيسترلىگى مەن قىسقى جاسوسپىرىمدەر وليمپياداسى مەن جازعى وليمپيادا جانە پاراليمپيالىق ويىندارعا دايىندىق شتابىنىڭ وكىلدەرى پارلامەنت ءماجىلىس دەپۋتاتتارىمەن كەزدەستى.

كەزدەسۋدە قازاقستان سپورتشىلارىنىڭ فرانتسيانىڭ استاناسى — پاريج قالاسىندا وتەتىن جازعى وليمپيالىق ويىندار مەن پارليمپيادا ويىندارىنا دايىندىعى قارالىپ، مينيسترلىك تاراپىنان اتقارىلىپ جاتقان جۇمىستار حاباردار ەتىلدى.

جيىنعا پارلامەنت ءماجىلىسىنىڭ دەپۋتاتتارى قازىبەك يسا، ارداق نازاروۆ، نۇرلان اۋەسباەۆ، داۋلەت مۇقاەۆ،  نارتاي سارسەنعاليەۆ، نۇرگۇل تاۋ مەن تاڭساۋلە سەرىكوۆ قاتىستى.

انىقتاما: بۇل شتاب بيىل پرەزيدەنت قاسىم-جومارت توقاەۆتىڭ تاپسىرماسىمەن وڭتۇستىك كورەيانىڭ كانۆون قالاسىندا وتكەن قىسقى جاسوسپىرىمدەر وليمپياداسى قارساڭىندا تۋريزم جانە سپورت مينيسترلىگى، ۇلتتىق وليمپيادا كوميتەتى جانە سپورت فەدەراتسيالارىنىڭ ۋاكىلەتتى ورگانى رەتىندە وليمپياداعا بىرىگىپ جۇمىس ىستەۋ ءۇشىن قۇرىلعان بولاتىن. ونىڭ نەگىزگى جۇمىسى – سپورتشىلاردىڭ الداعى جارىستارعا ساپالى دايىندىعىن قامتاماسىز ەتۋ.

شتاب بارلىق كەشەندى جارىستار اياقتالعانعا دەيىن تۇراقتى نەگىزدە جۇمىس ىستەيتىن بولادى.

وتىرىستا شتابتىڭ جەتەكشىسى ەلسيار قاناعاتوۆ جينالعاندارعا سپورتشىلاردىڭ وليمپيادا مەن پاراليمپياداعا دايىندىعى، مەملەكەت تاراپىنان ويىندارعا كورسەتىلىپ جاتقان قولداۋ  جونىندە كەڭ كولەمدە مالىمەت بەردى. ول قازىر ەلىمىز دۇنيەجۇزىنىڭ 205 ەلىنەن 10 500 سپورتشى قاتىساتىن تورتجىلدىقتىڭ باستى دوداسىنا  سپورتتىڭ 17 تۇرىنەن 50 ليتسەنزيانى (48 سپورتشى) جەڭىپ العانىن، مامىر ايىنىڭ سوڭىنا دەيىن تاعى 20 جولدامانى يەلەنۋ جوسپاردا بار ەكەنىن ايتتى. ونىڭ ايتۋىنشا، بۇگىندە بوكستان ەرلەر جانە ايەلدەر قۇراماسى 7 جولداما، نىسانا كوزدەۋدەن سپورتشىلار 5 ليتسەنزيا، ساداق اتۋدان 4 جولداما يەلەندى. سونىمەن بىرگە وتانداستارمىمىز سەمسەرلەسۋدەن 5، ۆەلوشوسسەدەن 3، گرەك-ريم كۇرەسىنەن 4، ەركىن كۇرەستەن 3، قازىرگى بەسسايىس، تاەكۆوندو، سپورتتىق گيمناستيكادان، ستەند اتۋدان ەكى-ەكىدەن ليتسەنزياعا يە بولدى.

سونداي-اق باتۋتتىق گيمناستيكادان، كوركەم گيمناستيكادان، جەڭىل اتلەتيكادان، بادمينتوننان، اكادەميالىق ەسۋ مەن بايداركا جانە كانوەدا ەسۋدەن ءبىر-ءبىر جولداما بار.

ءساۋىر ايىندا كەمىندە 15-17 جولداما جوسپارلاعان ەدى. جوسپار اسىرا ورىندالدى. ساۋىردە سپورتشىلارىمىز 18 وليمپيادا جولداماسىنا يە بولدى.

ەندى مامىر ايىندا قازاقستان قۇراماسى دزيۋدودان الەم چەمپيوناتىنا جانە كوركەم گيمناستيكا مەن سپورتتىق گيمناستيكادان ازيا چەمپيوناتىنا قاتىسادى. بۇدان باسقا، سپورتشىلارىمىز 15-كە جۋىق الەمدىك، ازيالىق رەيتينگتىك حالىقارالىق ىرىكتەۋ تۋرنيرلەرىندە كۇش سىناسادى.

جوسپار بويىنشا مامىردا سپورتشىلارىمىزدىڭ كەمىندە 20 جولداما الۋى قاجەت.

قازىرگى تاڭدا پاريج وليمپياداسىنا جولداما العان جەتەكشى سپورتشىلار وقۋ-جاتتىعۋ جيىندارىن جوسپارداعىداي وتكىزىپ، تىڭعىلىقتى دايىندالىپ جاتىر. ونىڭ ىشىندە بوكس، كۇرەس، تاەكۆوندو، جەڭىل اتلەتيكا، سپورتتىق گيمناستيكا سياقتى سپورت تۇرلەرىندەگى كەيبىر سپورتشىلارىمىز جەكە باعدارلاما بويىنشا دايىندالۋدا. ديرەكتسيا تاراپىنان ولاردىڭ بارلىعى وقۋ-جاتتىعۋ جيىندارىمەن تولىق قامتاماسىز ەتىلدى. سونداي-اق، مەدالدار مەن ليتسەنزيالارعا ۇمىتكەر سپورتشىلاردىڭ ماتەريالدىق جاعدايلارىن قولداۋ ءۇشىن كەلىسىمشارتتار سوماسى دا ۇلعايتىلدى.

وليمپيالىق ويىندارعا جاقسى دايىندىق كەزىندە كوپتەگەن كوماندالاردا  شەتەلدىك ماماندار جۇمىس ىستەپ جاتىر، — دەدى ول.

ەلسيار بايمۇحامەد ۇلىنىڭ سوزىنە قاراعاندا،  بوكستان ەرلەر قۇراماسىندا ليتۆالىق جالپى دەنە دايارلىعى بويىنشا جاتتىقتىرۋشى دونوتاس يانۋشەۆيچ، سپورتتىق گيمناستيكادا اۋستراليادان كەلگەن جاتتىقتىرۋشى-كەڭەسشى ۆلاديمير ۆاتكين، قازىرگى بەسسايىستا ۋكراينالىق جاتتىقتىرۋشى-كەڭەسشى سەرگەي تۋروبوۆ، ۇستەل تەننيسىندە اۋستريالىق جاتتىقتىرۋشى-كەڭەسشى دميتري لەۆەنكو، جۇزۋدە امەريكالىق جاتتىقتىرۋشى گاراۆي حومايۋن، ستەند اتۋدان رەسەيلىك ەكى جاتتىقتىرۋشى-كەڭەسشى ۆاسيلي موسين مەن ۆيتالي فوكەەۆ، سەمسەرلەسۋدە ۋكراينا مەن ۆەنگريادان كەلگەن ەكى جاتتىقتىرۋشى-كەڭەسشى الەكساندر تورچۋك پەن فەرەنتس توت، كوركەم گيمناستيكادا رەسەيلىك جاتتىقتىرۋشى-كەڭەسشىلەر يننا بىستروۆا مەن يرينا زينوۆكا، برەيكينگتە رەسەيلىك جاتتىقتىرۋشى-كەڭەسشى اسلانبەك نىروۆ سىندى بىلىكتى ماماندار ۇلتتىق قۇراما كوماندامەن بىرىگىپ جۇمىس ىستەۋدە.

سونىمەن قاتار، پاريج وليمپياداسىنا باراتىن كوماندالاردىڭ سوڭعى وقۋ-جاتتىعۋ جيىندارىنىڭ قاي جەردە وتەتىنىن جانە ولاردىڭ وليمپيالىق ويىندارعا قاي ۋاقىتتا باراتىنى بويىنشا جۇمىستار اتقارىلىپ جاتىر.

پاراليمپياداعا كەلسەك، پاريج-2024 جازعى پاراليمپيالىق ويىندارعا وتانداستارىمىز سپورتتىڭ 7 تۇرىنەن 11 جولدامانى جەڭىپ الدى.

بۇل جارىس 28 تامىز – 8 قىركۇيەك كەزەڭى ارالىعىندا سپورتتىڭ 22 تۇرىنەن وتەدى. قازاقستان اتىنان پاراليمپياداعا 38 سپورتشىنىڭ قاتىسۋى جوسپارلانۋدا. ولار سپورتتىڭ 9 تۇرىنەن ونەر كورسەتەدى. اتاپ ايتقاندا، پارا جەڭىل اتلەتيكا، پارا پاۋەرليفتينگ، پارا تاەكۆوندو، پارا ۇستەل تەننيسى، پارا ءجۇزۋ، پارا دزيۋدو، پارا كانوە، پارا وق اتۋ، ۆولەيبولدى وتىرىپ ويناۋ سىندى سپورت تۇرلەرىنەن جارىسقا شىعۋ جوسپاردا بار.

توكيودا وتكەن پاراليمپيالىق ويىنداردا قازاقستاننىڭ ۇلتتىق قۇراماسىندا 25 سپورتشى بولدى. ولار 1 التىن، 3 كۇمىس جانە 1 قولا جۇلدە الىپ، جالپى كوماندالىق 48 ورىندى يەلەندى.

قازىرگى كەزدە مەملەكەت تاراپىنان پاراليمپياداشىلارعا جان-جاقتى قولداۋ كورسەتىلىپ جاتىر.  مۇگەدەكتىگى بار ازاماتتار وليمپياداشىلارمەن قاتار دارىپتەلىپ، ولاردىڭ جارىسقا دايىندىعىنا بارىنشا قولداۋ بولۋ كەرەك، — دەدى شتاب باسشىسى.

كەزدەسۋدە ءماجىلىس دەپۋتاتتارى قازاقستان سپورتشىلارىنىڭ وليمپياداعا دايىندىعىن ءجىتى باقىلاپ، نازاردا ۇستاپ وتىرعاندارىن ايتتى. مىسالى، دەپۋتات ارداق نازاروۆ سپورتشىلاردىڭ جارىسقا ەرتە بارىپ، دايىندالۋىنا باسا نازار اۋدارۋ كەرەكتىگىن، ونى ءوزى كەزىندە سپورتشى بولعان سوڭ، جاقسى بىلەتىنىن ايتتى. سونىمەن بىرگە ول ۇلتتىق قۇرامانىڭ جۇمىسىنا شەتەل جاتتىقتىرۋشىلارىنىڭ ارالاسقانىن ونشا قۇپتاي بەرمەيتىنىن، ولار اقشاعا عانا قىزىعىپ، جۇمىس ىستەيتىنىن ەسكەرتتى.

سوندىقتان مەنىڭ بولاشاقتا شەتەلدىك جاتتىقتىرۋشىلارعا كوپ قىزىقپاي، باپكەرلەردى جەرگىلىكتى مامانداردان تاڭداساڭىزدار دەگەن ۇسىنىسىم بار، — دەدى ول.

بۇل ەسكەرتۋ مەن ۇسىنىسقا تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆ جاۋاپ بەردى. ول دەپۋتاتتىڭ پىكىرىمەن كەلىسەتىنىن، الايدا ۇلتتىق قۇراماعا كومەكتەسۋگە كەلگەن شەتەلدىك ماماندار دا قارا جاياۋ ادامدار ەمەستىگىن، ولار ابدەن سۇزگىدەن ءوتىپ، ارنايى ىلىكتەلىپ، تاڭدالىپ الىنعانىن ايتتى. سونداي-اق، كوميتەت توراعاسى جاتتىقتىرۋشىلار ماسەلەسى، جالپى سپورت مەديتسيناسى مەن عىلىمى كۇن تارتىبىندە تۇرعان وزەكتى ماسەلە ەكەنىن اتاپ ءوتتى.

ءسىزدىڭ ايتقانىڭىز دۇرىس، ارينە. جاتتىقتىرۋشىلار وزىمىزدەن دە بولۋ كەرەك. الايدا، قازىر بىزدە سپورتشىنى وليمپيادا سياقتى ءتورت جىلدا ءبىر اينالىپ كەلەتىن دۇرمەكتى دوداعا تىڭعىلىقتى دايىنداۋ ءۇشىن ءبىر ادامنىڭ بويىنان تابىلاتىن پسيحولوگ تا دارىگەر دە عالىم دا كەرەك. ال ءبىزدىڭ ەلىمىزدە وكىنىشكە قاراي، سپورتتىق مەديتسينا لايىقتى دامىماي كەلەدى. بۇل باعىتتا جۇمىس ىستەلىنبەي جاتقان جوق. ىستەلىنىپ جاتىر. بولاشاقتا ءار وڭىردەن مىقتى دەگەن 10-12 سپورتشى شىقسا، وسىنىڭ ءوزى ۇلكەن جەتىستىك بولار ەدى. ال سپورتشىنى مىقتى مەديك، دارىگەر، پسيحولوگ تا دايىندايدى. ءبارىن ءبىر جاتتىقتىرۋشىنىڭ موينىنا ارتىپ قويۋ دەگەن قاتە تۇسىنىك. سوندىقتان قازىر ءبىز سپورتتىق مەديتسينانى، پسيحولوگيانى دامىتۋدا قولعا الدىق، — دەدى ەربول مىرزابوسىنوۆ.

وسى ورايدا ول دەپۋتتاتىڭ  سپورتشىلارىمىزدىڭ جارىسقا ەرتە بارۋ كەرەك دەگەن پىكىرىمەن تولىق كەلىسەتىنىن، قازاقستان دەلەگاتسياسى بيىل دا وليمپياداعا جارىستىڭ باستالۋىنا ءبىر اي قالعاندا باراتىنىن، وسى ۋاقىتتا ۇلتتىق قۇراما ۋاقىت ايىرماشىلىعىنا ۇيرەنىپ، دوداعا جاقسى دايىندالۋعا مۇمكىندىك الاتىنىن جەتكىزدى.

كەزدەسۋدە دەپۋتات قازىبەك يسا كوپشىلىكتىڭ نازارىن دوپينگ ماسەلەسىنە اۋدارتتى. ول 2012 جىلعى لوندون وليمپياداسىنان كەيىن باسى دوپينگ داۋىنا قالعان اۋىر اتلەتتەردىڭ قازىرگى جاعدايىن مىسالعا كەلتىرە وتىرىپ، مۇنداي جاعدايدىڭ ەكىنشى رەت مۇلدە قايتالانباۋ كەرەكتىگىن ايتتى.

قازىر قولدا بار مالىمەتكە قاراعاندا، اۋىر اتلەتتەرىمىزدىڭ بىردە بىرەۋى وليمپياداعا جولداما الماپتى. كەزىندە لوندوندا جۇلدە العان اۋىر اتلەتتەرىمىزدىڭ ءبارى دوپينگپەن ۇستالعان ەدى. ەندى مۇنداي جاعداي ەكىنشى رەت قايتالانسا، بۇل ءبىزدىڭ سپورتتىڭ سۇيەگىنە تاڭبا بولادى. سوندىقتان وسى جاعىن دا ەسكەرەرسىزدەر دەپ ويلايمىن، — دەدى قازىبەك يسا.

جيىندا وليمپياداعا دايىندىق شتابىنىڭ جەتەكشىسى ەلسيار قاناعانتوۆ قازىر راسىمەن اۋىر اتلەتتەردىڭ ەشقايسىسى وليمپياداعا ليتسەنزيا الماعانىن، ولار بارلىق مۇمكىندىكتەن ايىرىلعانىن، مۇنىڭ ءوزى سپورتشىنىڭ دايىندىعىنا عانا ەمەس، ەلىمىزدە سپورت مەديتسيناسىنىڭ كەنجە دامىپ كەلە جاتقانىمەن دە بايلانىستىرۋعا بولاتىنىن اتاپ كورسەتتى.

ال دوپينگ ماسەلەسىنە كەلسەك، ۇلتتىق دوپينگ ورتالىعى جاقسى جۇمىس ىستەپ جاتىر. سپورتشىلاردىڭ ءبارى دوپينگ تەكسەرۋدەن ءبىر ەمەس، بىرنەشە رەت وتەدى. سوندىقتان قازىر سپورتشىلارىمىزدا زاڭمەن تىيىم سالىنعان پرەپاراتتاردى قابىلداۋ ماسەلەسى بويىنشا ەشقانداي پروبلەما جوق.

ءيا، قازىر جاڭا ايتىپ وتكەنىمدەي، ءبىزدىڭ ەلگە سپورت دارىگەرلەرى، ماسساجيستەر، ءدارى-دارمەك جەتىسپەيدى. دەگەنمەن مەملەكەت قولدا بار جاعدايدىڭ ءبارىن جاساپ وتىر. مينيسترلىك سپورتتى دامىتۋ قورى ارقىلى قاراجات اۋدارىپ وتىرادى. دەمەۋشىلەر دە كەرەك كەزىندە تابىلىپ ءجۇر، — دەدى ول.

وسى ماسەلەنى پارلامەنت ءماجىلىسىنىڭ تاعى ءبىر دەپۋتاتى نۇرلان اۋەسباەۆ تا كوتەرىپ، سپورتتىق مەديتسينانى دامىتۋ ماسەلەسىن ءبىر جولعا قويۋ كەرەكتىگىن، سپورتشىنىڭ جانىنان تابىلاتىن ناعىز دارىگەر ادام بولماسا جەتىستىككە دە جەتۋ ەكىتالاي دۇنيە ەكەنىن ايتتى.

ەلسيار قاناعاتوۆ ونىڭ بۇل سوزىمەن كەلىسەتىنىن، بىراق وكىنىشكە قاراي، بيىلعى وليمپياداعا باراتىن دارىگەرلەر مەن ماسساجيستەردىڭ سانى شەكتەۋلى ەكەنىن ەسكەرتتى.

وسى رەتتە سپورت كوميتەتىنىڭ توراعاسى بولاشاقتا ەلىمىزدە عىلىمي توپتار قۇرىلىپ،  ارنايى باعىت بويىنشا مامانداردى دايىنداۋ ءىسى جوسپارلانىپ وتىرعانىن ەسكە سالدى.

وليمپياداعا دايىندىق ماسەلەسى ءبىر كۇننىڭ، ءبىر جىلدىڭ شارۋاسى ەمەس. وعان جىلدار بويى دايىندالادى. سىزدەردىڭ سپورتتىق مەديتسينانى دامىتۋ بويىنشا ايتىپ وتىرعان ۇسىنىس-تىلەكتەرىڭىزبەن كەلىسەمىز. قازىر بىزگە سپورتشىلاردىڭ رەزەرۆىن دايىنداۋ كەرەك. وسى ماسەلە كۇن تارتىبىندە تۇر. مەن جاڭا كەزدەسۋدىڭ باسىندا ايتىپ كەتكەنىمدەي، سپورتشىلاردى، سپورتتى ءار ءوڭىردىڭ گەوگرافيالىق ورنالاسۋ جاعىنا بايلانىستى دامىتۋ كەرەك. وعان ارينە، جەرگىلىكتى اتقارۋشى بيلىك پەن سپورت فەدەراتسيالارى اتسالىسۋى كەرەك. جۇيەلى جۇمىس بولسا جۇمىس جاقسى جۇرەدى. ءبىز جۇيەلى جۇمىستى قالىپتاستىرساق، ءار وڭىردەن كەم دەگەندە وليمپيادادا ونەر كورسەتۋگە لايىقتى 10-15 سپورتشىنى دايىندايتىن ەدىك، — دەدى ەربول مىرزابوسىنوۆ.

كەزدەسۋدە دەپۋتات نارتاي سارسەنعاليەۆ سپورتتاعى جەمقورلىقپەن كۇرەس تۋرالى ايتا كەلىپ، پارلامەنت ءماجىلىسى لەگيونەرلەر تۋرالى زاڭ جوباسىن دايىنداعانىن، دەگەنمەن بۇل قۇجات تا ەلىمىزدە سىرتتان كەلگەن سپورتشىلاردىڭ ماسەلەسىن بىرجاقتى ەتۋ ءۇشىن ءالى دە ازدىق ەتەتىنىن ايتىپ قالدى. وسى ورايدا ول جاقىن ارادا ءماجىلىس لەگيونەرلەرگە قاتىستى تاعى دا زاڭ جوباسىن دايىندايتىنىن ايتتى. ونىڭ پىكىرىنشە، «سامۇرىق-قازىنا» مەن باسقا دا مەملەكەتتىڭ 50 پايىز ۇلەسى بار كۆازيمەملەكەتتىك سەكتوردان شەتەل سپورتشىلارىنا ايلىقپەن قوسا نەشە ءتۇرلى بونۋس، سىياقى تولەنىپ كەلەدى. وسى ماسەلەنى زاڭ جۇزىندە شەشىپ، لەگيونەرلەردىڭ مەملەكەتتىڭ اقشاسىنا ورتاقتاسۋىن توقتاتۋ كەرەك.

جيىندا دەپۋتات داۋلەت مۇقاەۆ سپورتشىلارىمىزدىڭ ەلىمىزدىڭ ءانۇرانىن قانشالىقتى بىلەتىنىن، وليمپيادادا كيەتىن كيىم-كەشەگى تۋرالى سۇرادى. وعان تۋريزم جانە سپورت ءمينيسترىنىڭ كەڭەسشىسى دياس احمەتشارىپ جاۋاپ بەرىپ، بيىلعىوليمپيادادا سپورتشىلار ەكى پارادتىق كيىم مەن قوسىمشا تاعى ءبىر فورما كيەتىنىن، قازىر جاسوسپىرىمدەرىمىز بەن جاستارىمىزدىڭ ءبارىن ءانۇراندى جاتقا ايتاتىنىن، اعىلشىنشا جاقسى بىلەتىنىن ايتتى.

فورما بويىنشا كيىمنىڭ ديزاينى انىقتالدى. قازاقستان دەلەگاتسياسىنىڭ كيىمىن وتاندىق كومپانيالار تىگىپ بەرەدى، — دەدى ول.

وتىرىستىڭ سوڭىندا دەپۋتاتتار وليمپيادان نەشە مەدال الامىز دەگەن سۇراققا، مينيسترلىكتىڭ سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆ بەس-التى سپورت تۇرىنەن جۇلدە الاتىنىمىزدى دەپ ايتتى.

ودان كەيىن ءماجىلىس دەپۋتاتتارى جاقسىلىق ۇشكەمپىروۆ اتىنداعى جەكپە-جەك سارايىنا بارىپ، استانادا 10-12 مامىر ارالىعىندا وتەتىن Qazaqstan Barysy Grand Slam الەمدىك جارىسىنا قاتىساتىن سپورتشىلاردىڭ دايىندىعىمەن تانىستى. سوڭىنان Qazaq kuresi اكادەمياسى تاربيەلەنۋشىلەرىنىڭ جاتتىعۋىن تاماشالادى.

قازىر ەلىمىز دۇنيەجۇزىنىڭ 205 ەلىنەن 10 500 سپورتشى قاتىساتىن تورتجىلدىقتىڭ باستى دوداسىنا سپورتتىڭ 17 تۇرىنەن 50 ليتسەنزيانى (48 سپورتشى) جەڭىپ الىپ وتىر. مامىر ايىنىڭ سوڭىنا دەيىن تاعى 20 جولدامانى يەلەنۋ جوسپاردا بار. بۇگىندە بوكستان ەرلەر جانە ايەلدەر قۇراماسى 7 جولداما، نىسانا كوزدەۋدەن سپورتشىلار 5 ليتسەنزيا، ساداق اتۋدان 4 جولدامانى يەلەندى. سونىمەن بىرگە وتانداستارىمىز سەمسەرلەسۋدەن 5، ۆەلوشوسسەدەن 3، گرەك-ريم كۇرەسىنەن 4، ەركىن كۇرەستەن 3، قازىرگى بەسسايىس، تاەكۆوندو، سپورتتىق گيمناستيكادان، ستەند اتۋدان ەكى-ەكىدەن ليتسەنزياعا يە بولدى.
سونداي-اق باتۋتتىق گيمناستيكادان، كوركەم گيمناستيكادان، جەڭىل اتلەتيكادان، بادمينتوننان، اكادەميالىق ەسۋ مەن بايداركا جانە كانوەدا ەسۋدەن ءبىر-ءبىر جولداما بار.

بيىلعى XXXIII جازعى وليمپيالىق ويىندار 26 شىلدە-11 تامىزى ارالىعىندا وتەدى. وعان دۇنيەجۇزىنىڭ 205 ەلىنەن 10 500 سپورتشى قاتىسادى دەپ جوسپارلانىپ وتىر. سپورتتىڭ 32 تۇرىنەن 329 مەدال جيىنتىعى ساراپقا سالىنادى. ال XVII جازعى پاراليمپيادا ويىندارى 28 تامىز – 8 قىركۇيەك ارالىعىندا بولادى. سپورتتىڭ 22 تۇرىنەن 184 مەملەكەت 549 مەدال ءۇشىن كۇش سىناسادى.