فۋتبولدان ەۋروپا چەمپيوناتى كورسەتىلىمىنىڭ ويىن كەستەسى شىقتى

Qazaqstan تەلەارناسىندا فۋتبولدان گەرمانيادا وتەتىن ەۋروپا چەمپيوناتى كورسەتىلىمىنىڭ كەستەسى شىقتى.

قۇرلىقتىق چەمپيوناتتىڭ ماتچتارى تىكەلەي ەفيردە Qazaqstan مەن Qazsport تەلەارنالارىنان كورسەتىلەدى. سونىمەن بىرگە ەۋروپا ستاديوندارىندا چەمپيونات اياقتالعانعا دەيىن ەكى ارنانىڭ ارنايى شىعارماشىلىق توبى جۇمىس ىستەيدى.

ەURO-2024 تۋرنيرىنە 51 ەلدىڭ ۇلتتىق قۇراما كوماندالار جولداما العان. ولار التى توپقا ءبولىنىپ، وينايدى.

ا توبى: گەرمانيا، شوتلانديا، ماجارستان، شۆەيتساريا.
B توبى: يسپانيا، حورۆاتيا، يتاليا، البانيا.
س توبى: سلوۆەنيا، دانيا، سەربيا، انگليا.
D توبى: پولشا، نيدەرلاند، اۆستريا، فرانتسيا.
E توبى: بەلگيا، سلوۆاكيا، رۋمىنيا، ۋكراينا
F توبى: پورتۋگاليا، گرۋزيا، تۇركيا، چەحيا.

چەمپيوناتتىڭ اشىلۋ سالتاناتى 14 ماۋسىمدا استانا ۋاقىتىمەن ساعات 23:40-تا ميۋنحەن قالاسىنداعى «اليانتس ارەنا» ستاديونىندا باستالادى. وسى جەردە جارىس رەسمي تۇردە اشىلعاننان كەيىن گەرمانيا مەن شوتلانديا ەلدەرىنىڭ ۇلتتىق قۇراما كوماندالارى الاڭعا شىعادى.

فينال 14 شىلدەدە بەرلين قالاسىنداعى وليمپياشتاديوندا بولادى.

ال توپتىق كەزەڭنىڭ ويىندارى 14-26 ماۋسىم ارالىعىنا جوسپارلانعان. توپتىق كەزەڭنىڭ ماتچتارى استانا ۋاقىتىمەن ساعات كەشكى 18:00، 21:00، 00:00–دە باستالادى.

قۇرلىقتىق دودادا 29 ماۋسىم-2 شىلدە ارالىعىندا 1/8 فينالدىڭ ماتچتارى بولسا، 5-6 شىلدەدە ¼، 9-10 شىلدەدە ½ فينالعا شىققان كوماندالار باق سىنايدى. فينال جوعارىدا اتاپ وتكەنىمىزدەي، 14 شىلدەگە بەلگىلەنگەن.

ەسكە سالا كەتسەك، قازاقستان قۇراماسى ەۋروپا چەمپيوناتىنا ىرىكتەۋ تۋرنيرىندە دانيا (3:2) مەن فينليانديا (1:0) كوماندالارىن ءبىر رەت جەڭسە، سولتۇستىك يرلانديا (1:0، 1:0) مەن سان-مارينو (3:0، 3:1) ەلدەرىنىڭ قۇرامالارىن ەكى رەت جەڭدى. ال دانيادان 1:3، سلوۆەنيادان 1:2، فينليانديادان 0:1 ەسەبىمەن جەڭىلدى.

ودان كەيىن ۇلتتار ليگاسىنىڭ س توبىندا العان ءبىرىنشى ورىنمەن ىرىكتەۋ ءتۋرنيرىنىڭ پلەي-وفف كەزەڭىنە شىعىپ، 21 ناۋرىزدا جارتىلاي فينالدا سىرت الاڭدا گرەكيادان 0:5 ەسەبىمەن جەڭىلىپ قالدى.