چەمپيوندار ۇستاحاناسى ءاز ناۋرىزدى قارسى الدى

ەلىمىزدە ناۋرىز مەيرامى ءالى جالعاسىن تاۋىپ، جەر-جەردە ءسان-سالتاناتىمەن وتكىزىلىپ كەلەدى.

الماتى قالاسىنداعى قاركەن احمەتوۆ اتىنداعى وليپيادالىق رەزەرۆىنىڭ ارنايى رەسپۋبليكالىق مامانداندىرىلعان مەكتەپ-ينتەرنات كوللەدجى شاڭىراعى كەرەمەت ۇلىستىڭ ۇلى كۇنىن كوكتەمگى كوڭىل-كۇيمەن قارسى الدى.

مەرەكەلىك ناۋرىزدا ساحنا تورىندە ۇلتتىق سالت-ءداستۇرىمىز، ادەت-عۇرىپتارىمىزدى مەكتەپ-ينتەرنات ۇجىمىنىڭ ۇستازدارى تاماشا ساحنالىق كورىنىستەر ارقىلى كورسەتە ءبىلدى. اتا-بابىمىزدىڭ ۇرپاقتان-ۇرپاققا جالعاسىپ، ۇزبەي كەلە جاتقان ۇلتتىق قۇندىلىقتارىمىزدى ساحنالاعان كەزدە كەۋدەمىزدە ەرەكشە ماقتانىش پايدا بولارى ءسوزسىز. اسىرەسە، بالانى بەسىككە بولەۋ، تۇساۋكەسەر، بەتاشار سەكىلدى ءداستۇرىمىزدىڭ بەرەكەلى تۇستارى وتە اسەرلى قويىلىم-كورىنىستەر ارقىلى كورسەتىلدى.

سپورتتا عانا ەمەس، ونەردە دە قۇر الاقان ەمەس ەكەنىن ايتۋلى مەكتەپ-ينتەرنات كوللەدجىنىڭ ۇجىمى مەن وقۋشىلارى تاماشا كورسەتە ءبىلدى. ساحنا الدىنا شىققاندار ءوز كورەرمەندەرىنىڭ كوڭىلىنەن شىعىپ، مەرەكەلىك كوڭىل-كۇيدى سىيلادى. مەكتەپ-ينتەرنات كوللەدجىنىڭ ديرەكتورىنىڭ مىندەتىن اتقارۋشى نۇرسەيىت ساعىمباي ۇلى جاقسىلىقوۆ پەن ونىڭ ورىنباسارلارى جاننا بايدىلداقىزى مەن سالتانات ورىنقىزىنىڭ جۇمىلا كوتەرگەن جۇگى ءوز بەرەكەتىن بەرىپ، مەرەكە وتە جاقسى ۇيىمداستىرىلعانىنىڭ كۋاسى بولدىق.

مەيرامدا ۇلتتىق سپورتتىڭ ءار تۇرىنەن ءتۇرلى سايىستار ءوتىپ، جەڭىمپازدار مەن جۇلدەگەرلەر قۇرمەتپەن ماراپاتتالدى.

اقىن ورداباي ۇلى،

الماتى