رەابيليتاتسيا ەلىمىزدەگى مەديتسينالىق ءتۋريزمنىڭ ماڭىزدى باعىتىنا اينالىپ كەلەدى (فوتو)

قازاقستاندا مەديتسينالىق تۋريزم قارقىندى دامىپ كەلەدى. بۇگىندە بۇل تەك ترەند ەمەس، شەتەلدىك ەمدەلۋشىلەر اراسىندا جوعارى سۇرانىسقا يە تۇراقتى ۇردىسكە اينالدى. رەسمي مالىمەتتەرگە سايكەس، جىل سايىن ەلىمىزگە كەلگەن بەس مىڭنان استام تۋريست مەديتسينالىق قىزمەتكە جۇگىنەدى ەكەن. قازاقستاندى شەتەلدىكتەر تەك ەمدەلۋ ءۇشىن عانا ەمەس، ساپالى، قولجەتىمدى ءارى كەشەندى وڭالتۋ شارالارى ءۇشىن دە تاڭداي باستادى.

شەتەلدىك ازاماتتار اراسىندا ەڭ كوپ سۇرانىسقا يە باعىتتار – كارديوحيرۋرگيا، پەريناتالدىق مەديتسينا، ستوماتولوگيا جانە، اسىرەسە، وڭالتۋ شارالارى. بۇرىن نەگىزىنەن تمد ەلدەرىنەن كەلسە، قازىر قازاقستانعا قىتاي، موڭعوليا، تۇركيادان، ءتىپتى، ۇلىبريتانيادان دا ەم-دوم قابىلداۋ ءۇشىن كەلەتىندەر كوبەيگەن.

مەديتسينالىق ءتۋريزمنىڭ ءساتتى دامۋىنىڭ ايقىن مىسالى – پرەزيدەنت ءىس باسقارماسى مەديتسينالىق ورتالىعىنىڭ «Almaty Resort» ساۋدا بەلگىسىمەن تانىمال «وق-جەتپەس» «الماتى» ەمدىك-ساۋىقتىرۋ كەشەنى. مۇندا شەتەلدىك ەمدەلۋشىلەردىڭ سانى جىل سايىن تۇراقتى تۇردە ارتىپ كەلەدى. ماسەلەن، 2023 جىلى مۇندا 164 شەتەلدىك ازامات وڭالتۋدان وتسە، 2024 جىلى بۇل كورسەتكىش 261 ادامعا جەتكەن.

بيىل، تۋريستىك ماۋسىم باستالماي جاتىپ، كەشەنگە 70-كە جۋىق شەتەلدىك كەلگەن. بۇل شەتەل ازاماتتارىنىڭ قازاقستاندىق مەديتسيناعا دەگەن سەنىمىنىڭ ارتىپ كەلە جاتقانىن كورسەتەدى.

مەديتسينالىق تۋريزم بويىنشا باسەكەلەستىكتە باستى ارتىقشىلىعىمىز — باعاسى ارزان. ال، قىزمەت ساپاسى شەتەلمەن سالىستىرعاندا بىردەي-اق. سونىمەن قاتار جايلىلىق، تاماقتانۋ جانە باسقا دا قولايلى قىزمەتتەردى ۇسىنامىز، – دەيدى «وق-جەتپەس» «الماتى» فيليالى ديرەكتورىنىڭ ەمدىك-وڭالتۋ جۇمىس جونىندەگى ورىنباسارى اسحات وڭعار ۇلى.

«Almaty Resort» سەكىلدى كەشەندەردە ساۋىقتىرۋ مەن وڭالتۋعا باسا نازار اۋدارىلعان. ەڭ كوپ سۇرانىسقا يە پروتسەدۋرالار قاتارىندا – گالوتەراپيا (تۇزدى اۋامەن ەمدەۋ)، ينگالياتسيا، مينەرالدى ۆاننالار، ماگنيتتىك جانە ۋلترادىبىستىق تەراپيانى قامتيتىن ەلەكتروتەراپيا بار. بارلىق پروتسەدۋرالار تاجىريبەلى مامانداردىڭ باقىلاۋىمەن، ءاربىر پاتسيەنتتىڭ جەكە جاعدايىن ەسكەرە وتىرىپ تاعايىندالادى.

مەن امەريكادا، مۇحيت جاعاسىندا تۇرامىن. ءوز تاجىريبەممەن ايتار بولسام – امەريكادا ەم الۋ دا، جالپى دەنساۋلىقتى باقىلاۋدا ۇستاۋ وتە قىمبات. قازاقستانعا وتباسىممەن كەلىپ، دەمالعانىم ارزانعا ءتۇستى. مۇندا تاۋدىڭ تازا اۋاسى، كەڭىستىك بار. ءتىپتى، تيىندەردى تاماشالاۋعا بولادى. تاماق جايلى دا، باسقا نارسە تۋرالى دا ۋايىمداۋدىڭ قاجەتى جوق، – دەيدى اقش ازاماتى نادەجدا شيشكوۆا.

وڭالتۋ شارالارى ءتيىمدى ادىستەردىڭ، تابيعي رەسۋرستاردىڭ جانە باسەكەگە قابىلەتتى باعانىڭ ارقاسىندا قازاقستانداعى مەديتسينالىق ءتۋريزمنىڭ ماڭىزدى باعىتىنا اينالىپ كەلەدى. بۇل سالانىڭ ءالى دە الەۋەتى زور.

نۇرلان قۇمار،

الماتى