• Қазақ
  •   
  • Qazaq
  •   
  • قازاق
  •   
  • Рус
  •   
    ۇلتتىق وليمپيادالىق كوميتەت

    حالىقارالىق وليمپيادالىق كوميتەتكە جاڭا باسشى كەلدى

    23 ماۋسىمدا، حالىقارالىق وليمپيادا كۇنىندە، لوزاننا قالاسىنداعى وليمپيادا ۇيىندە حالىقارالىق وليمپيادالىق كوميتەتى (حوك) پرەزيدەنتىنىڭ وكىلەتتىگىن تابىس ەتۋ ءراسىمى ءوتتى، دەپ حابارلادى ۇلتتىق وليمپيادالىق كوميتەت.

    ۇوك-ءتىڭ حابارلاۋىنشا، 2013 جىلدان بەرى حوك-تى باسقارعان توماس باح ءوز وكىلەتتىگىن رەسمي تۇردە زيمبابۆەدەن شىققان جۇزۋدەن ەكى دۇركىن وليمپيادا چەمپيونى كيرستي كوۆەنتريگە تاپسىردى. جاڭا پرەزيدەنت ءتۇن ورتاسىندا ءوز قىزمەتىنە رەسمي كىرىسەدى.

    كوۆەنتري حوك-تىڭ تاريحىنداعى ونىنشى پرەزيدەنت. ول — العاشقى ايەل پرەزيدەنت. سونداي-اق ول بۇل لاۋازىمعا تاعايىندالعان افريكا قۇرلىعىنىڭ العاشقى وكىلى اتاندى. كوۆەنتري حانىم بيىل ناۋرىز ايىندا گرەكيانىڭ وليمپيا قالاسىندا وتكەن حوك-تىڭ 144-سەسسياسىندا سەگىز جىل مەرزىمگە سايلانعان بولاتىن.

    سالتاناتتى راسىمدە توماس باح وليمپيادا ءۇيىنىڭ كىلتىن كوۆەنتريگە سالتاناتتى تۇردە تابىس ەتتى.  بۇل حوك-تاعى باسشىلىقتىڭ اۋىسۋىن بىلدىرەتىن ءداستۇر. كىلتتى 1992 جىلعى بارسەلونا وليمپياداسىنىڭ الاۋىن جاساعان يسپان ديزاينەرى اندرە ريكار ازىرلەگەن. ءىس-شاراعا حوك مۇشەلەرى، سپورتشىلار، قوعام قايراتكەرلەرى مەن حالىقارالىق سەرىكتەستەر سياقتى 700-دەن استام قوناق قاتىستى، — دەلىنگەن حابارلامادا.

    سەمسەرلەسۋدەن وليمپيادا چەمپيونى، حوك-تىڭ توعىزىنشى پرەزيدەنتى توماس باح ۇيىمنىڭ ەڭ جوعارى ماراپاتى – التىن وليمپيادالىق وردەنىمەن ماراپاتتالدى. قوشتاسۋ سوزىندە ول ارىپتەستەرىنە العىس ءبىلدىرىپ، ءوز شەشىمىنىڭ ماڭىزىن اتاپ ءوتتى.

    جاڭا كەزەڭ – جاڭا كوشباسشىلىقتى تالاپ ەتەدى. كيرستي كوۆەنتري – ءومىرى وليمپيادالىق قۇندىلىقتارمەن بىتە قايناسقان تۇلعا. ول ۇيىمعا جاڭا ءۇن مەن تىڭ كوزقاراس اكەلەدى – بۇل بولاشاق ءۇشىن اسا ماڭىزدى، – دەدى باح.

    كوۆەنتري ءوز سوزىندە باحقا 12 جىلدىق ەڭبەگى مەن وليمپيادالىق قاۋىمداستىقتاعى بىرلىك پەن قولداۋ ءۇشىن العىسىن ايتتى.

    ءسىز بىزگە «بىرلىك» يدەياسىنا نەگىزدەلگەن مۇرا قالدىردىڭىز. ءبىز بۇل مۇرامەن ماقتانا الامىز دەپ سەنەمىن. ەڭ قيىن كەزەڭدەردە دە ءسىز قۇندىلىقتارعا ادال بولدىڭىز. سىزگە العىسىم شەكسىز، — دەدى ول.

    سونىمەن بىرگە ول  وليمپيادالىق قوزعالىستىڭ ءمانى مەن ماڭىزى تۋرالى اتاپ ءوتتى.

    وليمپيادالىق قوزعالىس – بۇل جاي عانا سپورتتىق ءىس-شارا ەمەس. بۇل – شابىت بەرەتىن، ءومىردى وزگەرتەتىن جانە ءۇمىت سىيلايتىن الاڭ. بولىنگەن الەمدە ول – بىرىكتىرۋشى كۇش بولا الادى، — دەدى ول.

    كوۆەنتري بارشا قاۋىمدى بىرلەسىپ جۇمىس ىستەۋگە شاقىردى.

    ءبىزدىڭ ەكوجۇيەمىز ورمەكشىنىڭ تورىنداي كۇردەلى. بىراق ءبىز بىرلىكتى ساقتاساق، ول قۋاتتى بولا بەرەدى. اركىمنىڭ ءوز ءرولى بار. تەك بىرلەسە وتىرىپ قانا ءبىز جاڭا بۋىندى شابىتتاندىرىپ، ارمانداردىڭ ورىندالۋىنا جول اشا الامىز، – دەدى جاڭا پرەزيدەنت.

    ءراسىم الدىندا كيرستي كوۆەنتري مەن توماس باح زاماناۋي وليمپيادا ويىندارىنىڭ نەگىزىن قالاۋشى پەر دە كۋبەرتەننىڭ زيراتىنا بارىپ، ونىڭ قۇرمەتىنە گۇل شوعىن قويدى.

     

      پىكىر جازۋ

      Your email address will not be published. Required fields are marked *

      *