Halyqaralyq Olımpıadalyq komıtetke jańa basshy keldi

23 maýsymda, Halyqaralyq Olımpıada kúninde, Lozanna qalasyndaǵy Olımpıada úıinde Halyqaralyq Olımpıadalyq komıteti (HOK) prezıdentiniń ókilettigin tabys etý rásimi ótti, dep habarlady Ulttyq Olımpıadalyq komıtet.

UOK-tiń habarlaýynsha, 2013 jyldan beri HOK-ty basqarǵan Tomas Bah óz ókilettigin resmı túrde Zımbabveden shyqqan júzýden eki dúrkin Olımpıada chempıony Kırstı Koventrıge tapsyrdy. Jańa prezıdent tún ortasynda óz qyzmetine resmı kirisedi.

Koventrı HOK-tyń tarıhyndaǵy onynshy prezıdent. Ol — alǵashqy áıel prezıdent. Sondaı-aq ol bul laýazymǵa taǵaıyndalǵan Afrıka qurlyǵynyń alǵashqy ókili atandy. Koventrı hanym bıyl naýryz aıynda Grekııanyń Olımpııa qalasynda ótken HOK-tyń 144-sessııasynda segiz jyl merzimge saılanǵan bolatyn.

Saltanatty rásimde Tomas Bah Olımpıada úıiniń kiltin Koventrıge saltanatty túrde tabys etti.  Bul HOK-taǵy basshylyqtyń aýysýyn bildiretin dástúr. Kiltti 1992 jylǵy Barselona Olımpıadasynyń alaýyn jasaǵan ıspan dızaıneri Andre Rıkar ázirlegen. Is-sharaǵa HOK músheleri, sportshylar, qoǵam qaıratkerleri men halyqaralyq seriktester sııaqty 700-den astam qonaq qatysty, — delingen habarlamada.

Semserlesýden Olımpıada chempıony, HOK-tyń toǵyzynshy prezıdenti Tomas Bah uıymnyń eń joǵary marapaty – Altyn Olımpıadalyq ordenimen marapattaldy. Qoshtasý sózinde ol áriptesterine alǵys bildirip, óz sheshiminiń mańyzyn atap ótti.

Jańa kezeń – jańa kóshbasshylyqty talap etedi. Kırstı Koventrı – ómiri olımpıadalyq qundylyqtarmen bite qaınasqan tulǵa. Ol uıymǵa jańa ún men tyń kózqaras ákeledi – bul bolashaq úshin asa mańyzdy, – dedi Bah.

Koventrı óz sózinde Bahqa 12 jyldyq eńbegi men Olımpıadalyq qaýymdastyqtaǵy birlik pen qoldaý úshin alǵysyn aıtty.

Siz bizge «birlik» ıdeıasyna negizdelgen mura qaldyrdyńyz. Biz bul muramen maqtana alamyz dep senemin. Eń qıyn kezeńderde de siz qundylyqtarǵa adal boldyńyz. Sizge alǵysym sheksiz, — dedi ol.

Sonymen birge ol  Olımpıadalyq qozǵalystyń máni men mańyzy týraly atap ótti.

Olımpıadalyq qozǵalys – bul jaı ǵana sporttyq is-shara emes. Bul – shabyt beretin, ómirdi ózgertetin jáne úmit syılaıtyn alań. Bólingen álemde ol – biriktirýshi kúsh bola alady, — dedi ol.

Koventrı barsha qaýymdy birlesip jumys isteýge shaqyrdy.

Bizdiń ekojúıemiz órmekshiniń toryndaı kúrdeli. Biraq biz birlikti saqtasaq, ol qýatty bola beredi. Árkimniń óz róli bar. Tek birlese otyryp qana biz jańa býyndy shabyttandyryp, armandardyń oryndalýyna jol asha alamyz, – dedi jańa prezıdent.

Rásim aldynda Kırstı Koventrı men Tomas Bah zamanaýı Olımpıada oıyndarynyń negizin qalaýshy Per de Kýbertenniń zıratyna baryp, onyń qurmetine gúl shoǵyn qoıdy.