تالعاردا KFF Academy by International Airport عيماراتىنىڭ قۇرىلىسى باستالدى

الماتى وبلىسى تالعار قالاسىندا حالىقارالىق FIFA ستاندارتىنا ساي KFF Academy by Almaty International Airport عيماراتىنىڭ ىرگەتاسىن قالاۋ ءراسىمى بولدى، دەپ حابارلادى قازاقستان فۋتبول فەدەراتسياسى.

جوبا قازاقستان فۋتبول فەدەراتسياسىنىڭ باستاماسىمەن، الماتى حالىقارالىق اۋەجايىنىڭ قارجىلىق قولداۋىمەن ىسكە اسىرىلىپ وتىر.

سالتاناتتى ءىس-شارادا العاشقى قۇتتىقتاۋ ءسوزدى TAV Airports Holding باس ديرەكتورى سەركان كاپتان ايتتى. ول كومپانيانىڭ بۇل جوباعا قاتىسۋى الەۋمەتتىك جاۋاپكەرشىلىكپەن عانا شەكتەلمەيتىنىن، جوبا كومپانيانىڭ ورنىقتى دامۋىندا ستراتەگيالىق ماڭىزعا يە ەكەنىن اتاپ ءوتتى.

TAV Airports Holding ءۇشىن تۇراقتى دامۋ قۇندىلىقتارى جاۋاپكەرشىلىككە، قوعاممەن تىعىز بايلانىس ورناتۋعا جانە بيزنەستەن بولەك ماقساتتارعا ۇمتىلۋعا نەگىزدەلگەن. ءبىز ءۇشىن كورپوراتيۆتىك الەۋمەتتىك جاۋاپكەرشىلىك – جاي عانا نارسە ەمەس، ول قىزمەتىمىزدىڭ نەگىزى. جاستاردىڭ دامۋىنا جانە قوعامنىڭ يگىلىگىنە باعىتتالعان باستامالاردى قولداۋ – ءبىزدىڭ ستراتەگيامىز بەن ءىس-ارەكەتىمىزدى ايقىندايتىن قۇندىلىق، – دەدى س. كاپتان.

اكادەميانىڭ قۇرىلىسى – كەزەكتى سپورتتىق جوبا عانا ەمەس. بۇل – ادامي كاپيتالعا، بالالاردىڭ بولاشاعى مەن سپورت الەۋەتىن ارتتىرۋعا باعىتتالعان ۇزاق مەرزىمدى ينۆەستيتسيا. مۇندا جاس تالانتتاردى انىقتاپ، ولاردى دامىتۋعا جۇيەلى نەگىز قالىپتاستىرىپ، كاسىبي دايىندىقپەن قاتار، وندا تۇرۋعا، ءبىلىم الۋعا جانە فۋتبول قاۋىمداستىعىنا بەيىمدەلۋگە قاجەتتى جاعداي جاسالادى.

قازاقستان فۋتبول فەدەراتسياسىنىڭ پرەزيدەنتى مارات وماروۆتىڭ ايتۋىنشا، اكادەميادا جاس فۋتبولشىلارعا جۇيەلى تۇردە زاماناۋي فۋتبول تالاپتارىنا ساي دايىندالۋعا بارلىق جاعداي جاسالادى. جوبا – بالالار مەن جاسوسپىرىمدەر سپورتىن دامىتۋداعى ماڭىزدى قادام.

بۇگىن ىرگەتاسى قالانعان فۋتبول اكادەمياسى – قازاقستان فۋتبول فەدەراتسياسىنىڭ اۋقىمدى جانە ستراتەگيالىق ماڭىزى زور العاشقى جوباسى. ول ەلىمىزدەگى جاس فۋتبولشىلاردى دايارلاۋ جۇيەسىن وزگەرتىپ، جاڭا كوزقاراسپەن قاراۋعا مۇمكىندىك بەرەدى، – دەدى قفف پرەزيدەنتى مارات وماروۆ.

قۇرمەتتى قوناقتاردىڭ سوزىنەن سوڭ، اكادەميانىڭ ىرگەتاسىن قالاۋ ءراسىمى سالتاناتتى تۇردە جاريالاندى. ءىس-شارادا جوبا باسشىلىعى فۋتبول دوبىنا قولتاڭبالارىن قويىپ، ونى جاس سپورتشىلارعا تابىس ەتتى.

اكادەميانىڭ جالپى اۋماعى – 5 520 شارشى مەتر. ول ءۇش نەگىزگى بلوكتان تۇرادى: سپورتتىق، اكىمشىلىك-تۇرمىستىق جانە جاتاقحانا.

سپورتتىق بلوكتا جابىق فۋتبول زالى، جالپى دەنە دايىندىعى زالى، قالپىنا كەلۋ باسسەيندەرى، كيىم اۋىستىراتىن جانە قىزمەتتىك بولمەلەر بولادى. اكىمشىلىك-تۇرمىستىق بلوكقا جاتتىقتىرۋشى كابينەتتەرى، مەديتسينالىق جانە وڭالتۋ بولمەلەرى، كونفەرەنتس-زال، اسحانا جانە تەحنيكالىق بولمەلەر ورنالاسادى. ال ءتورت قاباتتى جاتاقحانادا وقۋشىلار مەن قىزمەتكەرلەرگە ارنالعان بولمەلەر، دەمالىس جانە جەكە دايىندىق ورىندارى بار.

KFF Academy by Almaty International Airport – بالالار مەن جاسوسپىرىمدەر فۋتبولىن دامىتۋ جۇيەسىن نىعايتۋ جولىنداعى ماڭىزدى قادام. بۇل جاڭا بۋىن سپورتشىلارىن دايارلاۋعا ارنالعان تۇراقتى ينفراقۇرىلىمدى قالىپتاستىرۋ جۇمىستارىنىڭ باستاماسى. اكادەميا ارىپتەستىك قارىم-قاتىناس پەن تاجىريبەنى ۇشتاستىرعان ەل سپورتىن جەتىلدىرۋدەگى ساپالى ءارى جۇيەلى كوزقاراستىڭ ۇلگىسىنە اينالماق.