Qazaqstan Lıhtenshteınniń qaqpasyna tórt dopty toǵytty

Búgin Qazaqstan quramasy Lıhtenshteın komandasymen fýtboldan 2026 jylǵy álem chempıonaty irikteý kezeńindegi kezekti matchyn oınady.

Matchta ulttyq quramada Ǵalymjan Kenjebektiń tamasha oıynymen kózge tústi. Ol áýeli 26-mınýtta birinshi golyn soqty. Sodan keıin ol komandalasy Bahtııor Zaınýtdınovke pas berip, sońǵysy ony golǵa aınaldyra bildi.

Ekinshi taımda da oıynnyń 57-mınýtynda Ǵalymjan Kenjebek taǵy da Lıhtenshteınniń qaqpasyn nysanaǵa aldy. Al 81-mınýtta Álibek Qasym esepti 4:0-ge jetkizdi.

Qazirge deıin ulttyq qurama komanda Belgııa (0:6), Ýels (1:3, 0:1) pen Soltústik Makedonııa (0:1) quramalarynan jeńilip, Lıhtenshteınnen (2:0) basym tústi.

Qazaqstan quramasy aldaǵy oıynyn syrt alańda 3 qazanda Soltústik Makedonııaǵa qarsy ótkizedi.

Dastan KENJALIN