Fýtzaldan Chempıondar lıgasy: Qazaqstan klýbtary elıtada oınaıdy

Almatynyń «Qaırat» klýby men Semeıdiń «Semeı» komandasy UEFA Chempıondar lıgasy elıtalyq kezeńindegi alǵashqy oıyndaryn oınady.

Bul joly «Qaırat» jasaǵy syrt alańda Belgııanyń «Anderleht» klýbymen kúsh synasty.

Match bastalǵanda Almatynyń komandasy jyldam gol soǵyp úlgerdi. Bul goldy 1-mınýtta Kaıo Rýız soqty. Belgııalyq komanda da qol qýsyryp otyrmady. Olar úsh golmen jaýap berdi. Ranjel 2-mınýtta, Grello 3-mınýtta dopty torǵa týlatsa, 10-mınýtta Erık Fanes qaqpany dál kózdedi.

Degenmen «Qaırat» óz qaqpasynan úsh dopty sanap alsa da  birinshi taım bitkenge deıin esepti teńestirip úlgerdi. Atırson Sılva 11-mınýtta, Lýkas Otanıa 12-mınýtta goldyń avtory atandy.

Ekinshi taımda almatylyq klýb oıyn basynda taǵy gol soqty. Dáýren Tursaǵulov 21-mınýtta, Atırson Sılva 26-mınýtta, Birjan Orazov 29-mınýtta kózge tústi. Matchtyń sońynda Lýkas Otanıa «Anderleht» komandasynyń bos qalǵan qaqpasyna gol salyp, esepti 7:3-ke jetkizdi.

Almaty qalasynyń klýby negizgi kezeńde tórtinshi topta Kosovonyń «Prıshtına» komandasyn 4:1, Horvatııanyń «Novo Vrıemeni» 3:2 esebimen jeńse, Portýgalııanyń «Sportıng» klýbynan 2:7 esebimen jeńilip qaldy.

Endi komandalar 5 jeltoqsanda Almatyda oınaıdy.

«Semeı» UEFA Chempıondar lıgasy elıtalyq kezeńinde óz alańynda Polshanyń «Pıast» klýbymen 3:3 esebimen teń tústi.

Buǵan deıin týrnırdiń negizgi kezeńindegi úshinshi topta semeılik komanda Chehııanyń «Hrýdım» klýbyn 9:5 esebimen jeńse, Franııanyń «Etýal» 3:4, Ispanııanyń «Palma» jasaqtarynan 4:7 esebimen jeńilgen bolatyn.

Bıyl fýtzaldan Chempıondar lıgasynyń elıtalyq kezeńine ózgerister engizildi.

Jarystyń atalǵan satysynda 16 komanda segiz jupqa bólinedi. Komandalar óz alańynda jáne syrt alańda bir-bir matchtan oınaıdy. Bul oıyndar 2025 jyldyń 24 qarasha-6 jeltoqsan aralyǵyna belgilengen.

Odan keıin 2026 jyldyń 23 aqpany men 6 naýryzy aralyǵynda komandalar sol ereje boıynsha shırek fınalda synǵa túsedi.

Fınal 2026 jyldyń mamyr aıynda Italııanyń Pesaro qalasynda bolady. Onda tórt komanda oınaıdy. Aldymen jartylaı fınal bolsa, odan keıin fınal men 3-oryn úshin matchtar josparlanyp otyr.

Dastan KENJALIN,

ASTANA