استاناعا الىس ەلدەردەن ءاپايتوس بالۋاندار جينالدى

24 قازان مەن 1 قاراشا ارالىعىندا استاناداعى «بارىس ارەنا» سپورت كەشەنىندە گرەك-ريم، ەركىن جانە ايەلدەر كۇرەسىنەن ەرەسەكتەر اراسىنداعى الەم چەمپيوناتى وتەدى. جىلدىڭ باستى دودالارىنىڭ بىرىنە 135 ەلدەن 900-دەن استام سپورتشى قاتىسادى، دەپ حابارلادى قازاقستان كۇرەس فەدەراتسياسىنىڭ ءباسپاسوز قىزمەتى.

توعىز كۇنگە سوزىلاتىن جارىستا كۇرەستىڭ ءۇش ءتۇرى بويىنشا 30 سالماق دارەجەسىنىڭ چەمپيوندارى انىقتالادى. استانا بوزكىلەمىندە وليمپيادا جانە الەم چەمپيوندارى، حالىقارالىق رەيتينگتەگى كوشباسشىلار مەن ۇلتتىق قۇرامالاردىڭ ۇزدىك بالۋاندارى باس قوسادى. سوندىقتان بيىلعى چەمپيونات تەك بالۋاندار سانى جاعىنان عانا ەمەس، سپورتشىلار قۇرامىنىڭ دەڭگەيى بويىنشا دا ەرەكشە بولادى.

«گرەك-ريم كۇرەسىندە كورەرمەننىڭ نازارى بىرنەشە سالماققا اۋادى. 97 كەلىدە پاريج وليمپياداسىنىڭ چەمپيونى، الەم چەمپيونى موحاممادحادي ساراۆي سىنعا تۇسەدى. اۋىر سالماقتا وليمپيادا جانە الەم چەمپيوناتتارىنىڭ بىرنەشە دۇركىن جۇلدەگەرى رىزا كاياالپ تا استانا بوزكىلەمىنە شىعادى. بۇل ساناتتاردا الەمدىك كۇرەستىڭ تاجىريبەلى كوشباسشىلارى مەن جاڭا بۋىن وكىلدەرى كىلەمگە شىعادى دەپ جوسپارلانىپ وتىر.

ەركىن كۇرەستەگى ەڭ ۇلكەن قىزىعۋشىلىقتىڭ ءبىرى 97 كەلى سالماققا بايلانىستى بولادى دەپ كۇتىلۋدە. بۇل سالماقتا كايل سنايدەر، ابدۋلراشيد سادۋلاەۆ، احمەد تاجۋدينوۆ پەن حاسان يازداني بەلدەسەدى. وسى ءتورت بالۋاننىڭ ەنشىسىندە وليمپيادانىڭ بەس التىن جۇلدەسى مەن 14 الەم چەمپيونى اتاعى بار. سوندىقتان 97 كەلىدەگى باسەكە بيىلعى چەمپيوناتتىڭ باستى تارتىستارىنىڭ بىرىنە اينالۋى مۇمكىن»، دەلىنگەن حابارلامادا.

ايەلدەر كۇرەسىندە دە الەمدىك دەڭگەيدەگى مىقتى قۇرام جينالادى. 200-دەن استام سپورتشىنىڭ اراسىندا قازىرگى الەم چەمپيوندارى مەن ءىرى حالىقارالىق جارىستاردىڭ جۇلدەگەرلەرى بار. بۇل باعىتتا دا بىرنەشە سالماقتا چەمپيوندىق اتاق ءۇشىن تارتىستى كۇرەس بولادى.

قازاقستان قۇراماسى ءوز جەرىندەگى الەم چەمپيوناتىنا تولىق قۇراممەن قاتىسادى. ەل نامىسىن سوڭعى جىلدارى حالىقارالىق ارەنادا تۇراقتى ناتيجە كورسەتىپ جۇرگەن بالۋاندار قورعايدى. ولاردىڭ قاتارىندا الەم چەمپيوندارى ءارى جۇلدەگەرلەرى ريزابەك ايتمۇقان، نۇرقوجا قايپانوۆ، ءجاميلا باقبەرگەنوۆا مەن باسقا دا تاجىريبەلى بالۋاندار بار.

گرەك-ريم كۇرەسى

55 كگ – يسحار كۋرباەۆ

60 كگ – ايدوس سۇلتانعالي

63 كگ – مەيرامبەك ايناعۇلوۆ

67 كگ – باعدات ساباز

72 كگ – الماتبەك امانبەك

77 كگ – مەرەي ماۋلىتقانوۆ

82 كگ – يبراگيم ماگومادوۆ

87 كگ – نۇرسۇلتان تۇرسىنوۆ

97 كگ – يسلام ەۆلوەۆ

130 كگ – ولجاس سىرلىباي

ەركىن كۇرەس

57 كگ – مەيرامبەك قارتباي

61 كگ – اسىل ايتاقىن

65 كگ – داستانبەك ءوسىمجان

70 كگ – سانجار دوسجانوۆ

74 كگ – نۇرقوجا قايپانوۆ

79 كگ – شامسات تاير

86 كگ – بولات ساقاەۆ

92 كگ – ازامات داۋلەتبەكوۆ

97 كگ – ريزابەك ايتمۇقان

125 كگ – ەدىگە قاسىمبەك

ايەلدەر كۇرەسى

50 كگ – زەينەپ بايانوۆا

53 كگ – اينۇر اشيموۆا

55 كگ – لاۋرا الماعامبەتوۆا

57 كگ – التىن شاعاەۆا

59 كگ – نيلۋفار رايموۆا

62 كگ – يرينا كۋزنەتتسوۆا

65 كگ – بەيبىت سەيدۋالى

68 كگ – يرينا كازيۋلينا

72 كگ – ءجاميلا باقبەرگەنوۆا

76 كگ – گۇلمارال ەركەباەۆا

الەم چەمپيوناتى ەرتەڭ، 24 قازاندا ساعات 17:30-دە استاناداعى «بارىس ارەنا» سپورت كەشەنىندە باستالادى.

بۇگىن ساعات 16:30-دا «بارىس ارەنانىڭ» التىنشى قاباتىنداعى كونفەرەنتس-زالدا ەرەسەكتەر اراسىنداعى كۇرەستەن الەم چەمپيوناتىنا ارنالعان رەسمي ءباسپاسوز ءماسليحاتى وتەدى.

الەم چەمپيوناتىنىڭ باعدارلاماسى