اقتوبەدە ۇلتتىق ويىندار سالتانات قۇردى

بۇگىن ۇلتتىق سپورتتان V فەستيۆالدىڭ سالتاناتتى اشىلۋى ءوتتى. اقتوبە قالاسىنداعى «جەكپە-جەك» سپورت سارايىندا وتكەن سالتاناتتى جيىنعا اقتوبە وبلىسىنىڭ اكىمى وڭداسىن ورازالين قاتىسىپ، قۇتتىقتاۋ ءسوز سويلەپ، سپورتشىلارعا ساتتىلىك تىلەدى. سالتاناتتى جيىن سوڭىنان وسى سپورت كەشەنىندە قازاق كۇرەسىنىڭ العاشقى بەلدەسۋلەرى باستالىپ كەتتى. بۇگىن بوز كىلەمگە 55 جانە 60 كيلو سالماقتاعى بالۋاندار شىقتى. بۇل تۋرالى قازاقستان ۇلتتىق سپورت قاۋىمداستىعى حابارلادى.

سونداي-اق، بۇگىنگى كۇنى فەستيۆال جانكۇيەرلەرى تەڭگە ءىلۋ مەن اۋدارىسپاق سپورتشىلارىنىڭ ونەرىن تاماشالادى. بيىلعى جاستار اراسىنداعى قازاقستان چەمپيوناتىندا  قولا جۇلدەگەر بولعان باتىسقازاقستاندىق بەكنۇر سەرىكوۆ V فەستيۆالدا تەڭگە ىلۋدەن چەمپيون اتاندى. تەڭگە ىلۋدەن بۇعان دەيىن ەرەسەكتەر اراسىنداعى ءى ازيا چەمپيوناتىنىڭ جەڭىمپازى، جاستار اراسىنداعى ءى ازيا چەمپيوناتىنىڭ جەڭىمپازى، ءىى ازيا چەمپيوناتىنىڭ كۇمىس جۇلدەگەرى، ەلىشىلىك چەمپيوناتتىڭ بىرنەشە دۇركىن جەڭىمپازى، تاجىريبەلى سپورتشى عالىمجان ءىزجانوۆ بۇل جولى كۇمىس جۇلدەنى قاناعات تۇتتى. ال، فەستيۆالدىڭ قولا جۇلدەسى اقمولالىق سپورتشى ازامات قادىروۆقا بۇيىردى.

اقتوبە قالاسىنداعى جابىق مانەجدە تاماشالاعان V فەستيۆالدىڭ بۇگىنگى اۋدارىسپاق باسەكەسى شيەلەنىستى جەكپە-جەككە تولى بولدى. بەس سالماق بويىنشا وتكەن جارىستا تومەندەگى بالۋاندار جۇلدەلى ورىنداردى يەلەندى.

60 كيلو سالماق بويىنشا:

1 ورىن – ا.سەرعازين (اقتوبە وبل);

2 ورىن – ە.قۇرالباي (تۇركىستان وبل);

3 ورىن – ا.ءجۇمادىلوۆ (جامبىل وبل).

  70 كگ سالماق بويىنشا:

1 ورىن – د.وتكەلباي (تۇركىستان وبل);

2 ورىن – ش.ەرجانوۆ (اقتوبە وبل);

3 ورىن – ب.ورازبەك (قىزىلوردا وبل).

80 كيلو سالماق بويىنشا:

1 ورىن – ن.امزەەۆ (تۇركىستان وبل);

2 ورىن – ا.ەسەنعارين  (اقتوبە وبل);

3 ورىن – ج.جالىمبەتوۆ (قىزىلوردا وبل).

  90 كگ سالماق بويىنشا:

1 ورىن – س.ءىزباساروۆ (تۇركىستان وبل);

2 ورىن – س.ىنتىزاربەكوۆ (جامبىل وبل);

3 ورىن – ن.بوسوۆ (سولتۇستىك قازاقستان وبل).

  +90 كيلو سالماق بويىنشا:

1 ورىن – ب.قوساليەۆ (تۇركىستان وبل);

2 ورىن – ا.ساعىمباەۆ (اقتوبە وبل);

3 ورىن – د.سمايىلوۆ (جامبىل وبل).

ەسكە سالا وتەلىك، ەرتەڭگى كۇنى اقتوبە قالاسىنىڭ ىرگەسىندەگى اتشاباردا كوكپار كوماندالارىنىڭ ءتۇيىسۋ  ويىندارى (ستىكوۆوچننىە يگرى) وتكىزىلەدى. جانكۇيەرلەر ەرتەڭ جامبىل وبلىسى مەن  سولتۇستىك قازاقستان وبلىسى، تۇركىستان وبلىسى مەن اقتوبە وبلىسى، قوستاناي وبلىسى مەن  ماڭعىستاۋ وبلىسى، نۇر-سۇلتان قالاسى مەن اقمولا وبلىسى، باتىس قازاقستان وبلىسى مەن شىعىس قازاقستان وبلىسى، قىزىلوردا مەن  قاراعاندى وبلىسى كوماندالارىنىڭ اراسىنداعى باسەكەلەردى تاماشالايتىن بولادى.