SportPress.kz قازاقستان سپورت جاڭالىقتارى
فورمۋلاعا قىزىعۋشىلىق تانىتقان كەز-كەلگەن ادامنىڭ ويىنا كەم دەگەندە ءبىر رەت كەلەتىن سۇراق وسى. الايدا، بۇل سۇراققا انىق جاۋاپ بەرۋ مۇمكىن ەمەس. سەبەبى، فورمۋلا-1 – تەحنولوگيالار جارىسى. بۇل جارىستاعى جاعداي جىل ساناپ ەمەس، اپتا ساناپ وزگەرىپ جاتادى. جىل وتكەن سايىن بوليدتەر دە، تەحنولوگيالار دا قارىشتاپ دامۋدا.
سول سەبەپتى دە، وتكەن عاسىردىڭ جۇلدىزدارىن قازىرگى پيلوتتارمەن سالىستىرۋ دۇرىس ەمەس. زامان باسقا، زاڭ باسقا. دەگەنمەن دە، سۇرانىس باردا، ۇسىنىس بار. سۇراق بولسا، وعان جاۋاپ ىزدەۋشىلەر دە تابىلادى.
وسى اپتادا Amazon Web Services جاساندى ينتەللەكتتى پايدالانا وتىرىپ، ءار زامانداعى پيلوتتاردىڭ كورسەتكەن ناتيجەلەرىن سالىستىراتىن الگوريتم جاساپ شىعارىپتى. ول الگوريتم ءار زامانداعى بوليدتەردىڭ جىلدامدىعىن بارىنشا تەڭەستىرىپ، ماتەماتيكالىق ەسەپ ارقىلى ف1 تاريحىنداعى بارلىق پيلوتتى بىردەي بوليدكە وتىرعىزسا، كىم جىلدام بولار ەدى دەگەن سۇراقتىڭ جاۋابىن ىزدەپتى.
سونىمەن، جاساندى ينتەللەكتتىڭ ويىنشا، فورمۋلا تاريحىنداعى ەڭ جىلدام پيلوت – برازيليالىق «سيقىرشى» ايرتون سەننا. فورمۋلالىق كارەراسىندا ەكى دۇركىن الەم چەمپيونى بولعان اتاقتى پيلوت – اۆتوسپورتتىڭ سيمۆولىنا اينالا بىلگەن ەرەكشە تۇلعا. 1994 جىلى ا.سەننا ءوز كارەراسىنىڭ شىڭىنا جەتىپ، تالايدىڭ ارمانى بولعان Williams كومانداسىنا قوسىلعان بولاتىن. الايدا، كوپتەن كۇتكەن جەڭىستەرگە قول سوزىم ءسات قالعاندا، يمولاداعى اپاتتان قازا تاپقان پيلوت ءالى كۇنگە دەيىن ف1 تاريحىنداعى ەڭ بيىك ورىندى ءالى ەشكىمگە بەرەر ەمەس.
بۇل ەسەپ بويىنشا، اتى اڭىزعا اينالعان «قىزىل بارون» ميحاەل شۋماحەر سەننادان 0،1 سەكۋندقا ارتتا قالاتىن كورىنەدى. ءوزىنىڭ ەڭ ناتيجەلى جىلدارىن Ferrari مەن Benetton-نىڭ ساپىندا وتكىزگەن نەمىس پيلوتى الەمدەگى ەڭ تانىمال جانە ەڭ ءساتتى ونەر كورسەتكەن پيلوت بولىپ قالۋدا. شۋماحەردىڭ تەگى قازاق قوعامىندا ادامنىڭ اتى ەمەس، جىلدامدىق ءسوزىنىڭ سينونيمىنە اينالعان. 7 دۇركىن الەم چەمپيونى اتاعى دا شۋماحەردەن كەيىن ءالى ەشكىمگە بۇيىرعان جوق.
ميحاەلدىڭ ارتىنان 0،15 سەكۋندتان سوڭ قازىرگى Mercedes-ءتىڭ جۇلدىزى ل. حەميلتون كەلەدى ەكەن. ميحاەلدىڭ سوڭىنان ەرۋ ليۋيس ءۇشىن قالىپتى نارسە. «قىزىل باروننىڭ» ماڭگىلىك بولىپ كورىنگەن كوپتەگەن رەكوردتارىن بۇزىپ كەلە جاتقان حەميلتون جاقىن ۋاقىتتا ءوزىنىڭ 7-ءشى چەمپيوندىعىنا قول جەتكىزىپ، م.شۋماحەرمەن ءبىر ساتىعا كوتەرىلەدى دەپ كۇتىلۋدە.
اتالعان ۇشتىكتەن بولەك، رەيتينگتە يوس فەرستاپپەننىڭ ۇلى ماكس، Renault-نىڭ باعى مەن باس اۋرۋىنا قاتار اينالا بىلگەن فەرناندو الونسو، ل. حەميلتون مەن م. شۋماحەردىڭ ەكەۋىمەن دە كوماندالاس بولىپ، ەكى اڭىزدى ارتتا قالدىرا بىلگەن جالعىز ادام – نيكو روسبەرگ تە بار.
ارينە، بۇنىڭ بارلىعى ماتەماتيكالىق ەسەپتىڭ، مودەلدەۋدىڭ ناتيجەسى. بۇل حاباردى شىنايى اقپارات دەپ ايتۋ قيىن. الايدا، اتى اتالعان ءۇش پيلوتتىڭ فورمۋلا تاريحىنداعى الاتىن ورنى ەرەكشە ەكەندىگى انىق. ولاردىڭ تالانتى مەن ۇلىلىعى ەشكىمدە كۇمان تۋدىرماۋى ءتيىس.
ەرنۇر مولداشەۆ
