SportPress.kz قازاقستان سپورت جاڭالىقتارى
تۇرىكمەنستان استاناسى اشعاباد قالاسىندا جاۋىنگەرلىك ونەر تۇرلەرى بويىنشا جابىق عيماراتتا وتكەن V ازيا ويىندارى بۇگىن ءوز مارەسىنە جەتتى.
ەكى اپتاعا سوزىلعان دودادا قازاقستاندىق سپورتشىلار 28 التىن، 28 كۇمىس، 40 قولا، بارلىعى 96 مەدال ەنشىلەپ، جالپىكوماندالىق ەسەپتە ءتورتىنشى ورىنعا تۇراقتادى.
باس جۇلدەنى جەرگىلىكتى تۇرىكمەن سپورتشىلارى قانجىعاسىنا بايلادى. ولار جالپى سانى 245 مەدال جەڭىپ الدى، ونىڭ 89-ى — التىن، 70 — كۇمىس جانە 86 — قولا.
ەكىنشى ورىنعا قىتاي سپورتشىلارى ورنالاستى. ولاردىڭ ەنشىسىندە 42 التىن، 32 كۇمىس، 23 قولا، جالپى 97 مەدال بار.
ءۇشىنشى ورىنعا 36 التىن، 23 كۇمىس، 59 قولا، بارلىعى 118 مەدالمەن يران قۇراماسى جايعاستى. قازىر اشعابادتا V ازيا ويىندارىنىڭ رەسمي جابىلۋ سالتاناتى ءوتىپ جاتىر.
بارلىعى 62 مەملەكەت قاتىسقان بايراقتى دودادا ەل نامىسىن قازاقستاننىڭ 150 سپورتشىسى قورعادى. ولار جارىستىڭ 17 تۇرىنەن سىنعا ءتۇستى.
ازيا ويىندارى دەپ اتالعان سپورتتىق سايىس ەكى جىلدا ءبىر رەت ازيا وليمپيادالىق كەڭەسىنىڭ باقىلاۋىمەن وتەدى. ەڭ العاشقى ويىندار 2005 جىلى بانگكوكتا وتسە، ودان كەيىن 2007 جىلى قىتايدىڭ ماكاو، 2009 جىلى ۆەتنامنىڭ حانوي، 2013 جىلى وڭتۇستىك كورەيانىڭ ينچحون قالالارىندا ۇيىمداستىرىلدى. جارىستار وتكىزىلگەن سوڭعى جىلى ازيا ويىندارى جاۋىنگەرلىك ونەر تۇرلەرى بويىنشا ازيا ويىندارىمەن بىرىكتىرىلىپ، ونى 4 جىلدا ءبىر رەت وتكىزۋ تۋرالى شەشىم قابىلداندى.
بيىل اشحابادتا جالاۋى جەلبىرەگەن ازيا ويىندارى «دەنساۋلىق. قايرات. دوستىق» ۇرانىمەن ءوتتى. ازيادانىڭ رەسمي نىشانى رەتىندە ۆەپالا ەسىمدى الاباي ءيتى تاڭداپ الىندى. ول تۇرىكمەن تىلىنەن اۋدارعاندا — «ادال»، «سەنىمدى» دەگەن ماعىنانى بىلدىرەدى.
جارىستار شاحمات، تەننيس، تاي بوكسى، قازاق كۇرەسى، سامبو، جەڭىل اتلەتيكا، اۋىر اتلەتيكا، باسكەتبول، ات سپورتى، بيليارد، بوۋلينگ، سپورتتىق بيلەر، فۋتزال سىندى سپورتتىڭ 21 تۇرىنەن ءوتتى.
