Ashǵabadta V Azııa oıyndary óz máresine jetti

Túrikmenstan astanasy Ashǵabad qalasynda jaýyngerlik óner túrleri boıynsha jabyq ǵımaratta ótken V Azııa oıyndary búgin óz máresine jetti.

Eki aptaǵa sozylǵan dodada qazaqstandyq sportshylar 28 altyn, 28 kúmis, 40 qola, barlyǵy 96 medal enshilep, jalpykomandalyq esepte tórtinshi orynǵa turaqtady.

Bas júldeni jergilikti túrikmen sportshylary qanjyǵasyna baılady. Olar jalpy sany 245 medal jeńip aldy, onyń 89-y — altyn, 70 — kúmis jáne 86 — qola.

Ekinshi orynǵa Qytaı sportshylary ornalasty. Olardyń enshisinde 42 altyn, 32 kúmis, 23 qola, jalpy 97 medal bar.

Úshinshi orynǵa 36 altyn, 23 kúmis, 59 qola, barlyǵy 118 medalmen Iran quramasy jaıǵasty. Qazir Ashǵabadta V Azııa oıyndarynyń resmı jabylý saltanaty ótip jatyr.

Barlyǵy 62 memleket qatysqan baıraqty dodada el namysyn Qazaqstannyń 150  sportshysy qorǵady. Olar jarystyń 17 túrinen synǵa tústi.

Azııa oıyndary dep atalǵan sporttyq saıys eki jylda bir ret Azııa Olımpıadalyq keńesiniń baqylaýymen ótedi. Eń alǵashqy oıyndar 2005 jyly Bangkokta ótse, odan keıin 2007 jyly Qytaıdyń Makao, 2009 jyly Vetnamnyń Hanoı, 2013 jyly Ońtústik Koreıanyń Inchhon qalalarynda uıymdastyryldy. Jarystar ótkizilgen sońǵy jyly Azııa oıyndary jaýyngerlik óner túrleri boıynsha Azııa oıyndarymen biriktirilip, ony 4 jylda bir ret ótkizý týraly sheshim qabyldandy.

Bıyl Ashhabadta jalaýy jelbiregen Azııa oıyndary «Densaýlyq. Qaırat. Dostyq» uranymen ótti. Azıadanyń resmı nyshany retinde Vepala esimdi alabaı ıti tańdap alyndy. Ol túrikmen tilinen aýdarǵanda — «adal», «senimdi» degen maǵynany bildiredi.

Jarystar shahmat, tennıs, taı boksy, qazaq kúresi, sambo, jeńil atletıka, aýyr atletıka, basketbol, at sporty, bılıard, boýlıng, sporttyq bıler, fýtzal syndy sporttyń 21 túrinen ótti.