قورعالجىندا تەگىنە تارتقان تارلاندار تۇرادى

13-14 مامىر كۇندەرى اقمولا وبلىسىنىڭ  قورعالجىن اۋدانىندا العاش رەت «جىگەر – 2022» وقۋشىلار سپارتاكياداسى ءوتتى. 

وعان اۋدان بويىنشا 13 مەكتەپتەن 446 بالا قاتىستى. سپارتاكيادادا وقۋشىلار توعىزقۇمالاق، فۋتبول، دزيۋدو، اسىق اتۋ، ۇستەل تەننيسى، پرەزيدەنتتىك كوپ سايىس، قىزدار جانە ۇلدار اراسىنداعى ۆولەيبول  سەكىلدى سپورت تۇرلەرىنەن باق سىناسىپ، مىقتى دەگەندەرى جەڭىس تۇعىرىنا شىقتى.

جارىستا تورەشىلەردىڭ شەشىمىمەن ءبىرىنشى ورىندى قورعالجىن  مەكتەپ-گيمنازياسى، ەكىنشى ورىندى اقتان تولەۋباەۆ اتىنداعى ورتا مەكتەبى يەلەنسە، ءۇشىنشى ورىندى ارىقتى ورتا مەكتەبىنىڭ جاستارى جەڭىپ الدى.  ماراپاتتاۋ راسىمىندە جەڭىمپاز بەن جۇلدەگەرلەرگە قورعالجىن اۋدانى اكىمىنىڭ ورىنباسارى دارىن سابىرعالي ۇلى ءۇش ورىنعا بەرىلگەن اقشالاي سەرتيفيكاتتى تابىس ەتتى.

ال سپارتاكيادانىڭ اشىلۋ ءراسىمى ورتالىق ستاديوندا سالتاناتتى جاعدايدا ءوتتى. وعان بوكستان 2012 جىلعى وليمپيادا چەمپيونى، «ۆەل باركەر» كۋبوگىنىڭ يەگەرى، ەكى دۇركىن الەم چەمپيونى (2005، 2007)، ازيا ويىندارىنىڭ جەڭىمپازى (2010) سەرىك ساپيەۆ، كازاقستاندىق سپورتشىلار وداعىنىڭ پرەزيدەنتى، بوكستان جاستار اراسىندا الەم بىرىنشىلىگىنىڭ جۇلدەگەرى ازامات قارلىعاشەۆ، وسى جارىستىڭ دەمەۋشىلەرىنىڭ ءبىرى، كاراتە كيكۋشۋنكاي فەدەراتسياسىنىڭ ۆيتسە-پرەزيدەنتى، استاناداعى سپورت مەكتەبىنىڭ ديرەكتورى، قورعالجىن اۋدانىنىڭ ءۇشسارت اۋىلىنىڭ تۋماسى ازامات يماشەۆ، سپورت جاناشىرى، سايىسقا اتسالىسىپ، كومەك قولىن سوزعان، نۇر-سۇلتان قالاسى سپورتتىق ءىس-شارالاردى وتكىزۋ ديرەكتسياسىنىڭ باسشىسى، قورعالجىن اۋدانى كەڭبيدايىق اۋىلىنىڭ تۋماسى باقتيار ماسانوۆ پەن باسقا دا جەرلەس-ازاماتتار قاتىستى.

وسى جەردە پارلامەنت ءماجىلىسىنىڭ ەكس-دەپۋتاتى، قورعالجىن تۋماسى، ۇقك-ءىڭ وتستاۆكاداعى پولكوۆنيگى فايزۋللا قامەنوۆ سەرىك ساپيەۆكە قورعالجىندىق زيالى جانە سپورت قاۋىمىنىڭ اتىنان سالتاناتتى تۇردە قارابايىر تۇلپار مىنگىزدى. اتاقتى بوكسشىعا قورعالجىن ازاماتتارىنىڭ ات مىنگىزگەنى تەگىن ەمەس. ويتكەنى، وليمپيادا چەمپيونىنىڭ تۋعان اتاسى داۋت وسى قورعالجىن ايماعىندا تۋىپ-وسكەن. قازىر ونى بىرەۋ بىلسە، بىرەۋ بىلمەيدى. سول سەبەپتەن ءبىز وسى جولداردى جازىپ، وقىرمانعا سەرىك ساپيەۆتىڭ شىققان تەگىن كورسەتۋدى ءجون كورىپ وتىرمىز.

ەندى سپارتاكيادا الداعى ۋاقىتتا دا جالعاسا بەرەدى. كەلەسى جىلى ول قورعالجىن اۋدانىنىڭ جانتەكە اۋىلىندا وتسە، 2024 جىلى سابىندى، 2026 جىلى كەڭبيدايىق اۋىلدارىندا جالعاسادى. ەندەشە، جەرلەستەرىمە باستاعان ىستەرىڭىز بەرەكەلى بولسىن دەي وتىرىپ، قورعالجىن اۋدانىنىڭ جاستارىنىڭ ساپيەۆتەي تەگىنە تارتقان اتاقتى سپورتشى بولىپ،  بيىك بەلەستەردى باعىندىرا بەرۋلەرىنە تىلەكتىستىگىمدى بىلدىرەمىن.

 ارداق توعىموۆ، قاجىمۇقان مۇڭايتپاسوۆ اتىنداعى مەكتەپ-ينتەرنات-كوللەدج ديرەكتورىنىڭ كەڭەسشىسى، سپورت ساراپشىسى، قورعالجىن اۋدانى تۋماسى، قازاقتىڭ سپورت جانە تۋريزم اكادەمياسى مەن «سپورت جۇلدىزدارى» رەسپۋبليكالىق جۋرنالىنىڭ ۇيىمداستىرۋىمەن وتكەن «جىل ۇزدىگى-2021» كونكۋرسىنداعى  «ەڭ ۇزدىك ءباسپاسوز حاتشىسى» اتالىمىنىڭ جەڭىمپازى