قاجىمۇقان سپورت مەكتەبى – چەمپيوندار ۇستاحاناسى

سپورت سۇيەر قاۋىم ەلىمىزدە جىل سايىن تامىز ايىنىڭ ءۇشىنشى جەكسەنبىسى سپورت كۇنى بولىپ اتالىپ كەلە جاتقانىن جاقسى ءبىلۋى ءتيىس. وسىعان بايلانىستى ءبىز بۇگىن وقىرماننىڭ نازارىنا قاجىمۇقان مۇڭايتپاسوۆ اتىنداعى وليمپيادا رەزەرۆىنىڭ رەسپۋبليكالىق ماماندىرىلعان  مەكتەپ-ينتەرنەت-كوللەدج تۋرالى مالىمەت بەرىپ، ونىڭ باسشىسى مالىك ساپاشەۆپەن سۇحباتتى ۇسىنۋدى ءجون كورىپ وتىرمىز.

— مالىك ءابۋحان ۇلى، كەلە جاتقان جاڭا وقۋ جىلىمەن قۇتتىقتاۋعا رۇقسات ەتىڭىز. وسى ورايدا ءوزىڭىز باسقارىپ وتىرعان مەكەمەڭىز تۋرالى قىسقاشا اقپارات بەرسەڭىز.

-الدىمەن وسىلاي بىزگە كوڭىل ءبولىپ، ءوز ۋاقىتىڭىزدى ارناپ، الىستان كەلىپ وتىرعانىڭىزعا راحمەت ايتامىن. سپورتقا دەگەن قىزىعۋشىلىعىڭىز ارتا بەرسىن.

جارتى عاسىر تاريحى بار سپورت مەكەمەسىنەن كوپتەگەن وليمپيادا، الەم جانە قۇرلىقتىق جارىستاردىڭ چەمپيوندارى مەن جۇلدەگەرلەرى شىقتى. ونى ءبارى بىلەدى. ءتىپتى، ساياساتقا دا ارالاسقان تۇلعالار بار. ءبىزدىڭ تۇلەكتەرىمىز داۋلەت تۇرلىحانوۆ پەن ولگا شيشيگينا پارلامەنت ءماجىلىسىنىڭ دەپۋتتارى دا بولعان.

2000 جىلداردىڭ باسىندا قاجىمۇقان مۇڭايتپاسوۆ اتىنداعى سپورت مەكتەبى ەل ورداسى — استانا قالاسىنا قوڭىس اۋداردى. ال، كەيىن، ۇكىمەتىنىڭ جارلىعىنا سايكەس، مەكتەپ-ينتەرنات-كوللەدج دارەجەسىنە يە بولدى.

قازىرگى تاڭدا ءبىزدىڭ مەكەمەدە 18 وليمپيادا سپورت تۇرلەرى قامتىلعان، ونىڭ ىشىندە 4 قىسقى سپورت ءتۇرى. جالپى سپورتشىلار سانى 400-گە جۋىق وقۋشىلار مەن كوللەدج ستۋدەنتتەرى، ولاردىڭ اراسىندا 280 وقۋشى مەكتەپتە، 120 ستۋدەنت كوللەدجدە وقيدى.

-تاماشا ەكەن. ال، بيىلعى جەتىستىكتەر تۋرالى ايتىپ وتسەڭىز. باسقا سپورت ينتەرناتتارعا قاراعاندا ءسىز باسقارىپ وتىرعان مەكتەپ الدىنعى قاتاردا تۇر دەپ ەستىپ وتىرمىن.

-راحمەت! ءيا، سپورت جانە دەنە شىنىقتىرۋ ىستەرى كوميتەتى جىلدا ارنايى رەيتينگتەرىن جاريالاپ تۇرادى. وسى تىزىمدە ءبىز تاعى دا 4 رەسپۋبليكالىق مەكتەپ-ينتەرنات-كوللەدجدەرگە قاراعاندا الدىنعى قاتاردى تۇر ەكەنبىز.

بالالارىمىز 250 ورىندىعى بار جاتاقحانامەن قامتىلعان. كۇنىنە 6 رەت تاماقتانادى. ءتىپتى تاعام مولشەرىندە قىزىل جانە قارا ۋىلدىرىق بار. ولارعا مەديتسينا جانە پسيحولوگيا ماماندارى جاقسى كومەك بەرىپ جاتىر. تاربيەشىلەر توبى جاسوسپىرىمدەرمەن قىزىقتى، قازىرگى زامانعا ساي تاربيە جۇمىستارىن اتقارۋدا. وقۋ پروتسەسى، ادەتتەگىدەي، زامانعا ساي قويىلعان. كۇنىنە ەكى مەزگىل جاتتىعۋعا اپاراتىن ارنايى اۆتوبۋستارىمىز بار. ءوز سپورتتىق بازامىز قىزمەت ەتۋدە. وقۋشىلار مەن ستۋدەدەنتتەر «قاجىمۇقان» سپورت كەشەنىندە دايىندالۋدا. بالالارعا بارشا جاعداي جاسالۋدا. ولارعا تەك قانا جوعارى سپورتتىق ناتيجە كورسەتسە بولعانى.

بيىل تۇڭعىش رەت وتكەن «مينيستر كۋبوگىنىڭ» چەمپيونى دا اتاندىق. ەلىمىزدىڭ 17 سپورت-ينتەرناتتار اراسىندا 4 سپورت ءتۇرى بويىنشا ۇيىمداستىرىلعان دودادا ءبىرىنشى ورىندى جەڭىپ الدىق. ايتارلىقتاي سپورتتىق جەتىستىكتەرىمىز دە بار. بيىل ءبىزدىڭ سپورتشىلارىمىز كوپتەگەن حالىقارالىق دودالاردا توپ جارىپ، جەڭىمپاز اتاندى. ولاردىڭ ىشىندە كونكيمەن جۇگىرۋدە الينا داۋرانوۆا، گرەك-ريم كۇرەسىندە ماقسات سايلاۋ، ءدىن-مۇحامەد قوشقار، ۆەلوشاباندوزدارىمىز، كوركەم گيمناسشىلارىمىز، فۋتبولشى قىزدارىمىز، سۋ دوبىنان جارىستارعا قاتىساتىن بالالارىمىز، تاەكۆوندوشىلارىمىز، شورت-ترەكشىلەرىمىز، ەسكەك ەسۋشىلەرىمىز، بوكسشىلارىمىز جاسوسپىرىمدەر، جاستار، ءتىپتى ەرەسەكتەر اراسىندا كوزگە ءتۇستى.

-كەرەمەت! بيىل تاعى دا جاڭا وقۋشىلار مەن ستۋدەنتتەر كەلەدى عوي. ولاردى قالاي قابىلدايسىز، قانداي تالاپتار قويىلادى؟

-ءبىزدىڭ مەكتەپ-ينتەرنات-كوللەدجىمىز — سپورتتا دارىندى بالالارعا ارنالعان وقۋ-سپورت ورداسى. وعان تەك مىقتىلارى عانا تۇسە الادى. جالپى، بيىل 7 سىنىپتان باستاپ 82 ادام مەكتەپتىڭ 2022-2023 وقۋ جىلىنا قابىلدانادى. بيىل 23-26 تامىز ارالىعىندا ارنايى قابىلداۋ ەمتيحاندارى وتەدى. ءبارى اشىق. وقۋعا قابىلداۋ ۇنەمى ادىلەتتى تۇردە ۇيىمداستىرىلادى. وزدەرىڭىزدى ەمتيحانداردى كورۋگە شاقىرامىز. ءتىپتى، جەمقورلىققا قارسى اگەنتتىكتىڭ ارنايى قىزمەتكەرلەرى بىزدە كوميسسيا مۇشەلەرى بولىپ تىركەلگەن. سپورت تۇرلەرى بويىنشا قازاقستان رەسپۋبليكاسىنىڭ مەملەكەتتىك جاتتىقتىرۋشىلارى دا قاتىسادى.

بىزگە ەلىمىزدىڭ ءار ايماعىنان كوپتەگەن بالالار وقۋعا تۇسۋگە نيەت بىلدىرۋدە. قازىرگى تاڭدا مەكتەپ پەن كوللەدجگە 290 ادام قۇجاتتارىن تاپسىردى. سوندا ءبىر ورىنعا ورتاشا ەسەپپەن 3-4 ادام تالاسادى دەگەن ءسوز. باسەكەلەستىك وتە مىقتى. وعان قوسا، بالالار اراسىندا زاڭ بويىنشا، وقۋ جىلىندا ەكى رەت ارنايى اتتەستاتسيا وتكىزىلەدى. وندا وقۋ، تاربيە جانە سپورتتىق ناتيجەلەرى بويىنشا سپورتشىلار وقۋدان نە شىعارىلادى، نە قالدىرىلادى. ەرەجەلەرىمىز قاتاڭ بولسا دا، ءادىل. سونىڭ ارقاسىندا قازاقستاننىڭ ۇلتتىق قۇراما كوماندالاردا باسىم بولىگى ءبىزدىڭ وقۋشىلارىمىز بەن ستۋدەنتتەرىمىز. جاسوسپىرىمدەر، جاستار جانە ەرەسەكتەر قۇرامىندا 62% ءبىزدىڭ سپورت ورداسىنىڭ تاربيەلەنۋشىلەرى.  ال، قازاقستاننىڭ ۇلتتىق قۇراما كوماندالارىندا2022 جىلى  وقۋلارىن اياقتاعان سپورتشىلارىمىز ءتىپتى 82% بولدى.

-وتە جاقسى ەكەن! وسى باعىتتان تايماڭىز ەندى، مالىك ءابۋحان ۇلى! العا قويعان جوسپارلارىڭىز قانداي؟ جاڭا ماۋسىمدا قاي باعىتتا جۇمىس اتقاراسىزدار؟

— مادەنيەت جانە سپورت ءمينيسترى داۋرەن اسكەربەك ۇلى اباەۆ جاڭا باستامالاردى كوتەرۋدە. ونىڭ ىشىندە سپورتتىق رەزەرۆتى جاڭا تاسىلدەرمەن دايىنداۋ ادىستەمەلەرى دە قاراستىلعان. بۇل قۋانتارلىق جايت. وعان قوسا، وقۋشىلار، بالالار مەن جاسوسپىرىمدەر جانە جاستارعا ارنالعان زاماناۋي سپورتتىق پلاتفورمالار بارشىلىق. اتقارۋشى ورگان تاراپىنان جۇمىسىمىزدى جانداندىرۋعا جانە يننوۆاتسيالىق تەحنولوگيالاردى قوسىپ پايدالانۋعا تولىق مۇمكىندىكتەر قاراستىلۋدا.

سپورت جانە دەنە شىنىقتىرۋ ىستەرى كوميتەتىنىڭ تاپسىرماسى بويىنشا وڭتايلاندىرۋ جۇمىستارىن باستاپ كەتتىك. بۇل پروتسەستىڭ قورىتىندىسى بولاشاقتا وڭ باعاسىنا يە بولاتىنىنا سەنىمدىمىن.

ماتەريالدىق بازامىزدى جاقسارتۋعا نيەت بار. دەنە شىنىقتىرۋ جانە دەنساۋلىقتى نىعايتۋ كەشەنىنىڭ قۇرىلىسىن باستاعىمىز كەلەدى. باسشىلار تاراپىنان قارسىلىق جوق.

بىلتىر قاجىمۇقان مۇڭايتپاسوۆتىڭ 150 جىلدىعىنا وراي مەكەمەمىزدىڭ سپورت كەشەنىڭە «قاجىمۇقان» اتاۋىن بەرىپ ەسكەرتكىش-ءمۇسىندى سالتاناتتى تۇردە ورناتتىقۇ وعان زيالى قاۋىم قاتىستى. بۇل مونۋمەنت بالالارىمىزعا رۋح بەرۋدە. جارىس الدىندا ولار پالۋان-باباسىنان باتاسىن العانداي اسەردە جۇرەدى.

-تاماشا ەكەن! سۇحبات بەرگەنىڭىزگە كوپ راحمەت! ءبىزدىڭ وقىرماندارىمىزعا تاعى دا ايتار تىلەكتەرىڭىز بار ما؟

-سىزدەرگە كوپ راحمەت! ۇنەمى سپورتتى ناسيحاتتاپ جۇرەسىزدەر، ونىڭ ىشىندە بالالار مەن جاستار سپورتىنا كوڭىل ءبولىپ جاتسىزدار. سىزدەرگە مىڭ دا ءبىر العىس! ال، وقىرماندارعا ايتارىم، سىزدەردى شىن جۇرەكتەن سپورت كۇنىمەن قۇتتىقتاپ، دەنە شىنىقتىرۋمەن اينالىسۋعا كەڭەس بەرەمىن.

-سىزگە دە مالىك ءابۋحان ۇلى التىن ۋاقىتىڭىزدى ءبولىپ، بىزبەن كەزدەسكەنىڭىزگە راحمەت! جەڭىستى كۇندەردە جۇزدەسەيىك!

اڭگىمەلەسكەن

داستان كەنجالين