ارداگەر بالۋانعا قۇرمەت كورسەتىلدى

ەركىن كۇرەستەن قازاقستان سپورتى تاريحىندا ەسىمدەرى التىن ارىپپەن جازىلىپ قالعان بالۋاندار از ەمەس. سولاردىڭ ءبىرى ءارى بىرگەيى — مالىك نادىربەكوۆ.

مالىك نادىربەكوۆ كسرو-نىڭ سپورت شەبەرى، قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى. مالىك اعامىز ەل بىرىنشىلىگىندە بەس رەت ۇزدىك شىقسا، اۋىل جاستارى اراسىندا وداق چەمپيونى اتانعان. ول ءوزىن ايگىلى بالۋان ءارى جاتتىرىقشى رەتىندە جاقسى قىرىنان كورسەتە ءبىلدى. ايتالىق، ەركىن كۇرەستەن قازاقستان ۇلتتىق قۇراما كومانداسىنىڭ تىزىگىنىن ۇستاپ، تالاي-تالاي مۇزبالاق ءاپايتوس بالۋانداردى تاربيەلەپ شىعارعان بىلىكتى باپكەر. ونىڭ ەل سپورتى ءۇشىن ەڭبەگى ەلەنبەي قالعان جوق. ول قازاقستان رەسپۋبليكاسى پرەزيدەنتىنىڭ قۇرمەت گراماتوسىمەن ماراپاتتالعان. ەركىن كۇرەستەن كسرو كەزىندە بوزكىلەمنىڭ شاڭىن شىعارىپ، وداق كولەمىندە قازاقتىڭ اتىن شىعارعان بالۋانداردىڭ قاتارىندا مالىك نادىربەكوۆ ەرەكشە اتالادى. سول وداق كولەمىندە وتەتىن ءدۇبىرلى دودالاردا قازاق بالۋاندارىنىڭ اراسىنان قارا ءۇزىپ شىققان ابىلسەيىت ايقانوۆ، امانگەلدى عاپساتتاروۆ، امانجول بۇعىباەۆ، اسقاربەك يمانقۇلوۆ، رامازان نۇرمانوۆ، جاقسىجول كورپەباەۆ سەكىلدى ءاپايتوس ارعىماق بالۋانداردىڭ اراسىنان مالىك نادىربەكوۆ اعامىزدىڭ الار ورنى ەرەكشە.

بۇگىنگى الماتى وبلىسى بويىنشا جالاۋى كوتەرىلگەن بۇل جارىس سول مالىك نادىربەك ۇلىنىڭ اتىنا ارنالدى. وعان الماتى وبلىسىنىڭ 8 اۋدانى جانە الماتى قالاسىنان 200-گە تارتى بالۋان كەلىپ قاتىستى. الامان جەكپە-جەك ەسىك قالاسىنداعى بالالار مەن جاسوپىرىمدەر اتىنداعى سپورت مەكتەبىنىڭ شاڭىراعىندا ءوتتى. بۇل جارىسقا ايتۋلى مەكتەپتىڭ تىڭعىلىقتى دايىندالعانى كورىنىپ تۇردى. ەكى كۇن بويى جەڭىس ءۇشىن بار شەبەرلىكتەرىن كورسەتكەن جاس بالۋانداردىڭ اراسىنان توپجارىپ شىققانداردىڭ ەسىمدەرى انىقتالدى. اسىرەسە، الماتى قالاسىنداعى كəركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ ءجاسوسپىرىم تۇلەكتەرى جارىسقا تىگىلگەن بار التىن جۇلدەنىڭ ءبارىن جيىپ الىپ كەتتى دەسە بولادى.

بۇل سىندا 12 سالماقتاعى التىن جۇلدەنىڭ كوپشىلىگىن كəركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ بالۋاندارى جەڭىپ الدى. مىسالى، 35كگ سالماقتا جاۋىنباي نۇرماحان، 48 كگ سالماقتا جاندوس جالعاسوۆ، 57 كيلودا ءاليحان ءداندىباي سىندى بالۋاندار بولاشاعىنان زور ءۇمىت كۇتۋگە بولاتىندىقتارىن تارتىستى كۇرەسىمەن ادەمى كورسەتتى. اسىرەسە، نۇرماحاننىڭ شەبەرلىگىنە كورەرمەن ەرەكشە قول سوعىپ، ونەرىنە ءتانتى بولدى. ەندەشە، ەركىن كۇرەستە ەلىمىزدىڭ اتىن الەم، وليمپيادا ويىندارىندا ابىرويمەن تانىتاتىن جۇرەكتى دە بىلەكتى بالۋاندار ءوسىپ كەلەدى دەگەن ۇعىمدى بىلدىرەدى. دەگەنمەندە، ەسىكتەگى بالالار مەن جاسوپىرىمدەر سپورت مەكتەبىندە جاتتىعاتىن بوتا بالۋاندار دا ارنايى مەكتەپ-ينتەرناتتان كەلگەن تاجىربيەسى مەن شەبەرلىگى باسىم قارسىلاستارىنا اجەپتەۋىر قارسىلىق كورسەتىپ، جۇلدەلى ورىنداردى جەڭىپ الىپ جاتتى.

نەگىزى، اۋىل — ايماقتا تالانتتار جەتەدى. تەك سولاردى تاني ءبىلىپ، ك.احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى مەن «شاڭىراقتا» ورىن تەپكەن رەسپۋبليكالىق سپورت مەكتەپ-ينتەرناتتارىنا تارتا بىلسە، قازاقتىڭ جاستارى اتان جىلىكتى اعالارى سەكىلدى الەم بيىگىندە اتوي سالار دەگەن سەنىمدەمىز.

جارىس سوڭىندا جەڭىمپازدار مەن جۇلدەگەرلەر ديپلومدار مەن مەدالدارىن الىپ، ەستەلىككە اتاقتى بالۋان اتالارىمەن سۋرەتكە ءتۇسىپ جاتتى. مالىك نادىربەكوۆ، جاقسىجول كورپەباەۆ سەكىلدى اتتارى التى الاشقا تانىمال ارداقتى اتالارىنىڭ باتاسىن العان ءجاسوپىرىم جەڭىمپازدار بۇل كۇندى ۇمىتا قويماس ءسىرا.

اقىن ورداباي ۇلى،

الماتى وبلىسى،

ەسىك قالاسى