Ardager balýanǵa qurmet kórsetildi

Erkin kúresten Qazaqstan sporty tarıhynda esimderi altyn árippen jazylyp qalǵan balýandar az emes. Solardyń biri ári birgeıi — Málik Nádirbekov.

Málik Nádirbekov KSRO-nyń sport sheberi, Qazaqstan Respýblıkasynyń eńbek sińirgen jattyqtyrýshysy. Málik aǵamyz el birinshiliginde bes ret úzdik shyqsa, aýyl jastary arasynda Odaq chempıony atanǵan. Ol ózin áıgili balýan ári jattyryqshy retinde jaqsy qyrynan kórsete bildi. Aıtalyq, erkin kúresten Qazaqstan ulttyq qurama komandasynyń tiziginin ustap, talaı-talaı muzbalaq apaıtós balýandardy tárbıelep shyǵarǵan bilikti bapker. Onyń el sporty úshin eńbegi elenbeı qalǵan joq. Ol Qazaqstan Respýblıkasy prezıdentiniń Qurmet gramatosymen marapattalǵan. Erkin kúresten KSRO kezinde bozkilemniń shańyn shyǵaryp, Odaq kóleminde qazaqtyń atyn shyǵarǵan balýandardyń qatarynda Málik Nádirbekov erekshe atalady. Sol Odaq kóleminde ótetin dúbirli dodalarda qazaq balýandarynyń arasynan qara úzip shyqqan Ábilseıit Aıqanov, Amangeldi Ǵapsattarov, Amanjol Buǵybaev, Asqarbek Imanqulov, Ramazan Nurmanov, Jaqsyjol Kórpebaev sekildi apaıtós arǵymaq balýandardyń arasynan Málik Nádirbekov aǵamyzdyń alar orny erekshe.

Búgingi Almaty oblysy boıynsha jalaýy kóterilgen bul jarys sol Málik Nádirbekulynyń atyna arnaldy. Oǵan Almaty oblysynyń 8 aýdany jáne Almaty qalasynan 200-ge tarty balýan kelip qatysty. Alaman jekpe-jek Esik qalasyndaǵy Balalar men jasópirimder atyndaǵy sport mektebiniń shańyraǵynda ótti. Bul jarysqa aıtýly mekteptiń tyńǵylyqty daıyndalǵany kórinip turdy. Eki kún boıy jeńis úshin bar sheberlikterin kórsetken jas balýandardyń arasynan topjaryp shyqqandardyń esimderi anyqtaldy. Ásirese, Almaty qalasyndaǵy Kərken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat-kolledjiniń jasóspirim túlekteri jarysqa tigilgen bar altyn júldeniń bárin jıyp alyp ketti dese bolady.

Bul synda 12 salmaqtaǵy altyn júldeniń kópshiligin Kərken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat-kolledjiniń balýandary jeńip aldy. Mysaly, 35kg salmaqta Jaýynbaı Nurmahan, 48 kg salmaqta Jandos Jalǵasov, 57 kıloda Álıhan Dándibaı syndy balýandar bolashaǵynan zor úmit kútýge bolatyndyqtaryn tartysty kúresimen ádemi kórsetti. Ásirese, Nurmahannyń sheberligine kórermen erekshe qol soǵyp, ónerine tánti boldy. Endeshe, erkin kúreste elimizdiń atyn álem, Olımpıada oıyndarynda abyroımen tanytatyn júrekti de bilekti balýandar ósip keledi degen uǵymdy bildiredi. Degenmende, Esiktegi Balalar men jasópirimder sport mektebinde jattyǵatyn bota balýandar da arnaıy mektep-ınternattan kelgen tájirbıesi men sheberligi basym qarsylastaryna ájepteýir qarsylyq kórsetip, júldeli oryndardy jeńip alyp jatty.

Negizi, aýyl — aımaqta talanttar jetedi. Tek solardy tanı bilip, K.Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat-kolledji men «Shańyraqta» oryn tepken respýblıkalyq sport mektep-ınternattaryna tarta bilse, qazaqtyń jastary atan jilikti aǵalary sekildi álem bıiginde atoı salar degen senimdemiz.

Jarys sońynda jeńimpazdar men júldegerler dıplomdar men medaldaryn alyp, estelikke ataqty balýan atalarymen sýretke túsip jatty. Málik Nádirbekov, Jaqsyjol Kórpebaev sekildi attary alty Alashqa tanymal ardaqty atalarynyń batasyn alǵan jasópirim jeńimpazdar bul kúndi umyta qoımas sirá.

Aqyn ORDABAIULY,

Almaty oblysy,

Esik qalasy