كاراتەشىلەر يندونەزيادان ولجالى ورالدى

يندونەزيانىڭ استاناسى دجاكارتا قالاسىندا اياقتالعان WKF كاراتەدەن ا سەرياسىنىڭ ءتورتىنشى كەزەڭى قازاقستان قۇراماسى ءۇشىن ءساتتى بولدى.

جىلدىڭ قورىتىندى باسەكەسىنە اتتانعان ۇلتتىق قۇرامانىڭ 14 كۋميتە شەبەرى 2 التىن، 2 كۇمىس جانە 3 قولا مەدالدى يەلەنىپ، جالپى ەسەپتە ءۇشىنشى ورىن الدى. وتانداستارىمىز كاتا باعدارلاماسىنا قاتىسقان جوق.

ايەلدەر اراسىندا 55 كەلىگە دەيىنگى سالماقتا فينالعا كاراتەشى اسەمگۇل ەرداۋلەت پەن گۇلميرا ۇسەنوۆا شىعىپ، العاشقىسى 3:1 ەسەبىمەن جەڭدى.

ال ەكىنشى التىن مەدالدى لاۋرا الىقۇل قورجىنعا سالدى. ول 68 كەلىگە دەيىنگى سالماقتىڭ فينالىندا سارا دويبلەدەن (شۆەيتساريا) 3:0 ەسەبىمەن باسىم ءتۇستى. العاشقى حالىقارالىق جارىسىنا قاتىسىپ جاتقان لاۋرا جارتىلاي فينالدا يندونەزيالىق دەۆي ترياننانى ۇتقان (ەسەپ – 3:1).

ەرلەر اراسىندا 60 كگ دەيىنگى سالماقتا داۋلەت شىمىربەكوۆ سوڭعى جەكپە-جەكتە ماروككولىق ايمان تاكزيماعا ەش قارسىلىق كورسەتە الماي (0:8)، كۇمىس جۇلدەگەر اتاندى. داۋلەت جارتىلاي فينالدا تايبەيلىك گۋان-شيۋن ۆاندى ويسىرا ۇتقان ەدى. ەسەپ – 6:0.

سونداي-اق نيزاميتدين حالماتوۆ (-60 كگ)، دامير كامال (-67 كگ)، نۇرنياز ەلداشەۆ (+84 كگ) ءوز سالماعىندا ۇشتىكتى تۇيىندەدى.

وسىعان دەيىنگى كەزەڭدەردى پامپلونا (يسپانيا)، كاير (مىسىر) مەن قوجاەلي (تۇركيا) قابىلداعان. دجاكارتاداعى تاتامي دوداسىنا 65 مەملەكەتتىڭ 670-تەن استام كاراتەشىسى جينالدى. ونىڭ ىشىندە ەڭ كوپ سپورتشىنى جارىس قوجايىنى يندونەزيا قوستى (139). ودان كەيىن ءۇندىستان (67)، تايبەي مەن ۋكراينا (26-دان) تۇر. ا سەرياسىنىڭ كەلەسى كەزەڭى 2023 جىلعى 13-15 قاڭتار ارالىعىندا گرەكيانىڭ استاناسى افينادا وتەدى.

داستان كەنجالين،

استانا