Karateshiler Indonezııadan oljaly oraldy

Indonezııanyń astanasy Djakarta qalasynda aıaqtalǵan WKF karateden A serııasynyń tórtinshi kezeńi Qazaqstan quramasy úshin sátti boldy.

Jyldyń qorytyndy básekesine attanǵan ulttyq quramanyń 14 kýmıte sheberi 2 altyn, 2 kúmis jáne 3 qola medaldi ıelenip, jalpy esepte úshinshi oryn aldy. Otandastarymyz kata baǵdarlamasyna qatysqan joq.

Áıelder arasynda 55 kelige deıingi salmaqta fınalǵa karateshi Ásemgúl Erdáýlet pen Gúlmıra Úsenova shyǵyp, alǵashqysy 3:1 esebimen jeńdi.

Al ekinshi altyn medaldi Laýra Áliqul qorjynǵa saldy. Ol 68 kelige deıingi salmaqtyń fınalynda Sara Doıbleden (Shveıarııa) 3:0 esebimen basym tústi. Alǵashqy halyqaralyq jarysyna qatysyp jatqan Laýra jartylaı fınalda ındonezııalyq Devı Trıannany utqan (Esep – 3:1).

Erler arasynda 60 kg deıingi salmaqta Dáýlet Shymyrbekov sońǵy jekpe-jekte marokkolyq Aıman Takzımaǵa esh qarsylyq kórsete almaı (0:8), kúmis júldeger atandy. Dáýlet jartylaı fınalda taıbeılik Gýan-Shıýn Vandy oısyra utqan edi. Esep – 6:0.

Sondaı-aq Nızamıtdın Halmatov (-60 kg), Damır Kamal (-67 kg), Nurnııaz Eldashev (+84 kg) óz salmaǵynda úshtikti túıindedi.

Osyǵan deıingi kezeńderdi Pamplona (Ispanııa), Kaır (Mysyr) men Qojaelı (Túrkııa) qabyldaǵan. Djakartadaǵy tatamı dodasyna 65 memlekettiń 670-ten astam karateshisi jınaldy. Onyń ishinde eń kóp sportshyny jarys qojaıyny Indonezııa qosty (139). Odan keıin Úndistan (67), Taıbeı men Ýkraına (26-dan) tur. A serııasynyń kelesi kezeńi 2023 jylǵy 13-15 qańtar aralyǵynda Grekııanyń astanasy Afınada ótedi.

Dastan KENJALIN,

ASTANA