پەلەنىڭ قىزى اكەسىمەن بىرگە اۋرۋحانادا تۇسكەن فوتوسىن كورسەتتى (ۆيدەو)

«فۋتبول كورولى»، XX عاسىردىڭ ەڭ ۇزدىك فۋتبولشىسى پەلەنىڭ ۇلكەن قىزى اكەسىمەن بىرگە اۋرۋحانادا تۇسكەن فوتوسۋرەتىن جاريالادى.

قازىر اتى اڭىزعا اينالعان فۋتبولشىنىڭ ۇلكەن قىزى كەلي كريستينا ناسيمەنتۋ اۋىر كەسەلمەن اۋرۋحانادا جاتقان اكەسىنە كۇتۋشى بولىپ، جانىندا ءجۇر. ول اكەسى ەكەۋىنىڭ بىرگە تۇسكەن فوتوسىن الەۋمەتتىك جەلىدە تاراتتى.

ءبىز ءالى وسىندامىز، اۋرۋدى جەڭەمىز دەگەن ۇمىتپەن كۇرەسىپ كەلەمىز. تاعى ءبىر ءتۇنىمىز ءوتتى، – دەپ جازدى كەللي.
پەلە وتكەن جىلدان بەرى توق ىشەكتىڭ وبىرى سىرقاتىمەن اۋىرىپ ءجۇر. بيىلعى قاڭتاردا وعان وپەراتسيا جاسالدى. كەيىن ونىڭ جاعدايى بىرتىندەپ ناشارلاي بەردى. سوندىقتان ول 29 قاراشادا اۋرۋحاناعا جاتقىزىلدى.

پەلە (شىن اتى-ءجونى – ەدسون ارانتيس دۋ ناسيمەنتۋ) 1940 جىلى 21 قازاندا تۋعان. 1958 جىلى 17 جاسىندا برازيليا قۇراماسى ساپىنداعى ەڭ جاس ويىنشى بولىپ، الەم چەمپيونى اتاندى. ول – الەمنىڭ ءۇش دۇركىن (1958، 1962، 1970) چەمپيونى اتانعان جالعىز فۋتبولشى. 1970 جىلى مەكسيكادا وتكەن چەمپيوناتتا ۇزدىك فۋتبولشى اتاعىنا يە بولدى.

پەلە 1966 جىلى روزە ماري دوس رەيس شولبيگە ۇيلەندى. وسى نەكەدەن ومىرگە كەللي كريستينا (1967)، ەدسون (1970) جانە جەننيفەر (1978) ومىرگە كەلدى. بىراق 1982 جىلى ەرلى-زايىپتىلار اجىراستى. پەلەنىڭ بۇدان كەيىنگى تاڭداۋى اسسيريا لەموس سەيشاس بولدى. 1994 جىلى قوسىلعان بۇل جۇپ جوشۋا جانە سەلەستە دەگەن ەگىز بالالاردىڭ اتا-انالارى اتاندى. الايدا 2008 جىلى بۇلاردىڭ دا جولدارى ەكىگە ايىرىلدى. اتاقتى فۋتبولشى 2016 جىلى ءۇشىنشى مارتە نەكەلى بولىپ، مارسيا سيبەلي اوكي دەگەن تەگى جاپون برازيليالىق بيزنەسمەن ايەلمەن تاعدىرىن قوستى.

داستان كەنجالين،
استانا