رەسەيلىك سپورتشى قازاقستان ازاماتتىعىن الدى  

رەسەيلىك جاس شاڭعىشى الەكساندرا سكوروحودوۆا 2024 جىلى وڭتۇستىك كورەيادا وتەتىن جاسوسپىرىمدەر اراسىنداعى قىسقى وليمپييا ويىندارىنا قاتىسىپ، قازاقستاننىڭ نامىسىن قورعايدى. بۇل تۋرالى الماتىدا وتكەن ءباسپاسوز ءماسليحاتىندا بەلگىلى بولدى.

ول ەلىشىلىك جارىستارعا، قازاقستان كۋبوگى مەن ەل چەمپيوناتىنا جانە 2024 جىلى وڭتۇستىك كورەيادا وتەتىن جاسوسپىرىمدەر اراسىنداعى قىسقى وليمپيا ويىندارىنا قاتىسادى.

ءباسپاسوز ءماليحاتىندا تاۋ شاڭعىسىنان جاتتىقتىرۋشى، الماتىداعى جوعارى سپورت شەبەرلىگى مەكتەبىنىڭ اعا جاتتىقتىرۋشىسى مارك شپاربەرگ الەكساندرا سكوروحودوۆا ۇلتتىق قۇراماعا قالاي قابىلدانعانىن ايتىپ بەردى.

«الەكساندرا سكوروحودوۆا جاقسى ناتيجە كورسەتكەن سوڭ وزىمىزگە قابىلدادىق. قازىرگى ۋاقىتتا ول 16-17 جاستار اراسىندا مىقتىلاردىڭ ءبىرى. ءبىز دە سپورتشىلارىمىزدىڭ دەڭگەيىن كوتەرۋ ءۇشىن قابىلدادىق. ويتكەنى، سپورتتا مىقتى بولۋ ءۇشىن وزىڭنەن مىقتىلارمەن بىرگە جاتتىعۋ كەرەك. ول ءوز كارەراسىن بىزبەن جالعاستىرۋدى شەشتى. نەگە ەكەنىن ايتسام، ونى وزدەرىڭىز جاقسى بىلەتىن شىعارسىزدار. بۇگىنگى الەمدە قانداي جاعداي بولىپ جاتقانىن بىلەسىزدەر. قازىر ول بىزبەن بىرگە جاتتىعىپ، قازاقستان قۇراماسىنىڭ ساپىندا وينايدى»، — دەدى مارك شپاربەرگ.

ونىڭ ايتۋىنشا، سكوروحودوۆا — بولاشاعى بار سپورتشى.

«ونىڭ بولاشاعى بار. ول – رەسەيدىڭ ءابسوليۋتتى چەمپيونى. بىزدە دە تاماشا ناتيجە كورسەتتى. جوعارى دەڭگەيدەگى جارىستاردا الەكساندرا ەكىنشى مۇمكىندىگىندە ەۋروپا كۋبوگى دەڭگەيىندەگى سپورتشىلارعا عانا ەسە جىبەرىپ قويدى. ناتيجەسىندە، 100 ادامنىڭ ىشىندە 13-ءشى بولدى»، — دەدى ول.

الەكساندرا سكوروحودوۆا بيىل قازاقستان رەسپۋبليكاسىنىڭ ازاماتتىعىن الدى.

داستان كەنجالين،

استانا