Reseılik sportshy Qazaqstan azamattyǵyn aldy  

Reseılik jas shańǵyshy Aleksandra Skorohodova 2024 jyly Ońtústik Koreıada ótetin jasóspirimder arasyndaǵy qysqy Olımpııa oıyndaryna qatysyp, Qazaqstannyń namysyn qorǵaıdy. Bul týraly Almatyda ótken baspasóz máslıhatynda belgili boldy.

Ol elishilik jarystarǵa, Qazaqstan kýbogy men el chempıonatyna jáne 2024 jyly Ońtústik Koreıada ótetin jasóspirimder arasyndaǵy qysqy Olımpııa oıyndaryna qatysady.

Baspasóz málıhatynda Taý shańǵysynan jattyqtyrýshy, Almatydaǵy joǵary sport sheberligi mektebiniń aǵa jattyqtyrýshysy Mark Shparberg Aleksandra Skorohodova ulttyq quramaǵa qalaı qabyldanǵanyn aıtyp berdi.

«Aleksandra Skorohodova jaqsy nátıje kórsetken soń ózimizge qabyldadyq. Qazirgi ýaqytta ol 16-17 jastar arasynda myqtylardyń biri. Biz de sportshylarymyzdyń deńgeıin kóterý úshin qabyldadyq. О́ıtkeni, sportta myqty bolý úshin ózińnen myqtylarmen birge jattyǵý kerek. Ol óz karerasyn bizben jalǵastyrýdy sheshti. Nege ekenin aıtsam, ony ózderińiz jaqsy biletin shyǵarsyzdar. Búgingi álemde qandaı jaǵdaı bolyp jatqanyn bilesizder. Qazir ol bizben birge jattyǵyp, Qazaqstan quramasynyń sapynda oınaıdy», — dedi Mark Shparberg.

Onyń aıtýynsha, Skorohodova — bolashaǵy bar sportshy.

«Onyń bolashaǵy bar. Ol – Reseıdiń absolıýtti chempıony. Bizde de tamasha nátıje kórsetti. Joǵary deńgeıdegi jarystarda Aleksandra ekinshi múmkindiginde Eýropa kýbogy deńgeıindegi sportshylarǵa ǵana ese jiberip qoıdy. Nátıjesinde, 100 adamnyń ishinde 13-shi boldy», — dedi ol.

Aleksandra Skorohodova bıyl Qazaqstan Respýblıkasynyń azamattyǵyn aldy.

Dastan KENJALIN,

ASTANA