Almatyda qazaq kúresi klýby ashyldy

Almatyda jastar men jasóspirimderge arnalǵan qazaq kúresi klýby ashyldy.

Qamqorlyq pen qoldaý bolǵan jerde sol istiń berekesi bolary haq. Qazirgi kezde Almaty qalasynda qazaq kúresine degen kózqaras erekshe. Sońǵy jyldary qala boıynsha ulttyq kúresimizge arnalǵan sport klýbtary birtindep kóbeıip  keledi. Sonyń barlyǵy qazaq kúresine kósqarastyń jaqsara túskeniniń aıǵaǵy.

Búgingi tańda tól sportymyzdyń damý qarqynyn kóre otyryp, kóńildi qýanysh kerneıdi. Tól kúresimizdiń tóbeli jetistikterge jete túsýine ár óńirde ashylyp jatqan sport mektepterimen qosa sport úıirmeleriniń qosyp kele jatqan úlesi zor.

Jýyrda «Almaty arena» sport saraıynyń janynda oryn tepken Olımpıadalyq qalashyqta qazaq kúresinen jastar men jasóspirimderge  arnalǵan sport klýbynyń tusaýy kesildi. Bul sport klýbyn ashýǵa muryndyq bolǵan ulttyq sporttyń janashyry Shalqar Aldabergenov: «Men qazaq balalarynyń ózimizdiń ulttyq sportymyzdy umytpaı aınalysyp, shymyr da shynyǵyp júrgenin qalaımyn. Erteń osy jasóspirimderimiz el irgesin qorǵaıtyn batyr da batyl, densaýlyǵy myqty azamat bolyp ósýine osy sport úırimesinen bereri kóp », — dedi.

Rasymen de sport  – desaýlyqtyń kepili desek, ata-babalarymyz salyp ketken sara joldan taımaı, el qorǵaıtyn batyr urpaqty tárbılep, shyńdaý osyndaı at toqymyndaı kishigirm sport zaldardan bastalady.

Sonymen sport klýbtyń ashylý saltanatyna Qazaq kúresi federaııasynyń tuńǵysh prezıdenti, professor, Qazaq Sport jáne týrızm akademııasynyń Ulttyq sport túrleri kafedrasynyń meńgerýshsi Erǵalı Muhıtdınov, Alataý aýdany ardagerler keńsiniń  tóraǵasy Qudaıbergen Qabdoldın, «Nur Otan»   partııasy  Alataý aýdandyq fılıalynyń qyzmetkerleri men aýdannyń zııaly qaýym ókilderi qatysty. Rásimde  olar sport klýbtardyń qazaq kúresiniń damýyna zor úlesin qosatynyn aıta kelip, jas balýandarǵa aq tilekterin  bildiredi.

Endi ǵana tusaý kesilgen jas klýbtyń tabaldyryǵyn attaǵan jasóspirim balýandar qazaq kúresiniń aıla-ádisterin bilgenderinshe kórsetip,  qoshemetke ıe boldy. Kórshiles jatqan Qytaı elinde turatyn qandastarymyz qazaq kúresin mektep baǵdarlamasyna kirgizgen eken. Biz de qazaq kúresin pán retinde mektep baǵdarlamasyna enigizip jatsaq ol bir ulttyq qundylyǵymyzdy jańǵyrtý bolatyny sózsiz. Úmit alda. Ol kúnniń de aýyly alys emes shyǵar degen oıdamyz. «Uıada ne kórseń ushqanda sony ilesiń» –demekshi, bekzat ónerimizben belsene aınalysýǵa kelgen jas túlekterdiń ulttyq kúresimizge degen súıispenshiligi erekshe ekendigin baıqadyq. Qazaqta «Ustazy myqtynyń — ustamy myqty» degen sóz bar. Jas balýandarǵa ózi bilgen túıgenin úırtetetin bapkerlerdiń de biliktiligi joǵary bolýynyń mańyzy zor ekendigi málim. Jastar men jasóspirimder arasyndaǵy qazaq kúresi sport klýbynyń aǵa jattyqtyrýshy Bolat Ibragımovten tól shákirtteri týraly pikirin suraǵanymyzda : «Osy jastardyń arasynan qazaq kúresinen Azııa, Eýropa, álem chempıonattarynda top jaryp, elimizdiń kók týyn joǵarydan jelbiretetin daryndy balýandardy kórý men úshin úlken baqyt bolar edi», — dep aǵynan jaryldy. Iá, Bolattyń armany asqaq. Bolashaqqa bıik maqsat, meje qoımaı ósý, damý bolmaıtynyn jas bapker jaqsy túsinedi. Sondyqtan da Alla bergen osy bir múmkindikti bos jibermeýge tyrysatyny kózinen kórinip tur. Qazir elimizde bota balýandar arasyndaǵy alaman jekpe-jekter óte bastady. Erteńgi kúni osy qarakóz órenderdiń arasynan el chempıonatynda júldegerler shyǵyp  jatsa, aıtýly klýbtyń basshylary men bapkerleriniń tókken ter men eńbekteriniń zaıa ketpegeni dep bilemiz. Sondyqtan da bul sport klýby bolashaqqa berekeli baspaldaq ispettes.

Aqyn ORDABAIULY,

ALMATY