• Қазақ
  •   
  • Qazaq
  •   
  • قازاق
  •   
  • Рус
  •   

    Balǵyn boksshylar Shelekte shıyrshyq atty

    Almaty oblysy, Eńbekshiqazaq aýdany, Shelek aýylynda bokstan jasóspirimder arasynda respýblıkalyq ashyq týrnır ótip jatyr. Tórt kúnge ulasqan dúbirli dodanyń fınaldyq saıystary búgin bolady.

    Kıkbokstan Qazaqstannyń birneshe dúrkin chempıony, Eýropanyń eki dúrkin jeńimpazy, Azııa chempıony, álem kýbogynyń ıegeri dańqty sportshy Elmurat Qaıypjanovtyń júldesine arnalǵan ashyq týrnırge Túrkistan oblysynan, Almaty, Shymkent qalalarynan, Almaty oblysynyń aýdandarynan kelgen boksshylar qatysyp, saıys kórigin qyzdyrýda.

    Týrnırdi tamashalap, jetkinshek boksshylarǵa sát-sapar tilep, tileýlestigin bildirýge qazaq balýandary arasynan shyqqan tuńǵysh Olımpıada chempıony, álem chempıony, Qazaqstannyń Eńbek Eri Jaqsylyq Úshkempirov, bokstan elimizdiń ulttyq quramasyn jattyqtyryp, Sıdneı Olımpıadasynda 2 altyn, 2 kúmis medalmen oralǵan áıgili bapker Tursynǵalı Edilov,  jastar arasynda álem chempıony atanǵan, Beıjiń Olımpıadasynyń kúmis júldegeri, Almaty oblystyq deneshynyqtyrý jáne sport basqarmasynyń basshysy Nurbaqyt Teńizbaev, Beıjiń Olımpıadasynyń qola júldegeri, Qytaıdyń 10 dúrkin chempıony, kásipqoı boksta 25 jekpe-jek ótkizip, barlyǵynda jeńiske jetken Qanat Islam,   ýshý-sando, taı bokstan  álem chempıony Dıas Jamashev  syndy sańlaqtar keldi.

    Almaty oblystyq deneshynyqtyrý jáne sport basqarmasynyń basshysy, Nurbaqyt Teńizbaev, basqarmanyń atynan quttyqtaý hatyn oqyp, Elmurat Qaıypjanovqa tapsyrdy. Osymen ekinshi ret uıymdastyryp, aýyl turǵyndaryna áserli kezdesý, balǵyn boksshylarǵa tamasha týrnırdi tartý etken Elmurat Muqashuly qurmetti qonaqtarǵa el atynan alǵys aıtyp, ıyqtaryna oqaly shapan jaýyp syı-sııapatyn kórsetti.

    Ashyq chempıonattyń qurmetti qonaǵy bolǵan Jaqsylyq Úshkempirov balǵyn boksshylarǵa aq jol tilep, bátýaly sózin aıtyp, aq batasyn berdi.

    –Men de ózderińdeı aýylda týyp, aýyldyń topyraǵyna aýnap ósken qazaqtyń qarapaıym balasy boldym. Kúres ónerin de aýylda júrip úırenip, beldesýlerge qatysyp shyńdaldym. Qandaı abyroı, ataq, dáreje-deńgeı bolmasyn bári de tek aq adal eńbekpen keletinin ómir mektebi úıretti. Aıanbaı tókken terdiń óteýine maǵan 1980 jyly Máskeý Olımpıadasynyń chempıony degen ataq, 1981 jyly Norvegııada ótken álem chempıonatynyń da altyn medali buıyrdy. Biraq osy jetistikterge qalaı jettim? Qazir kósilip, sheshilip sóılep aıtqanyma ońaı bolǵanymen, sol kezdegi qıyndyq, kederginiń qanshalyqty aýyr soqqanyn ózimnen ózge eshkim jete bilmeıdi. Bizdiń kúresken shaǵymyzda elimiz Keńes Odaǵy deıtin alyp ımperııaǵa qaraıtyn. KSRO-nyń birneshe dúrkin chempıony atansam da álem birinshiligi, Olımpıada oıyndaryna meni jibergen joq. Sol kezdegi saıasattyń qurbany bolyp, shiderden shyǵa almadyq. Olımpıada oıyndaryna tek jasym otyzǵa tolǵanda, kúresti doǵaratyn shaq jaqyn qalǵanda ǵana qatysyp, chempıon atandym. Allaǵa sansyz shúkirshilik deımiz, búginde táýelsiz elmiz, álem tanyǵan damýshy elderdiń kóshinde kelemiz. Bizdiń kezimizdegideı joqshylyq, qıynshylyqtyń qazir eshqaısy joq. Tek erinbeı eńbektenseńder boldy. Bári birden bola ketpeıdi. Osyndaı týrnırlerdiń bolǵany, únemi uıymdastyrylǵany aýyldaǵy balǵyn sportshylardyń talabyn ushtap, úlken serpin berip, jeńiske degen jigerin janı túsedi. Elmurattyń elge osyndaı jarys ótkizip, jerlesterine tamasha jekpe-jek saıysyn kórsetkeni úshin alǵysymdy aıtamyn, – dedi Jaqsylyq Úshkempirov.

    –Bárimizde ózderińdeı bala kúnimizden bokspen shuǵyldanyp, jarystarǵa qatysyp shyńdalyp, el namysyn qorǵaıtyn dárejege jettik. Men de senderdiń otty kózderińe qarap, rýhty jigerlerińdi tanyp, bolashaqta aralaryńnan álem chempıony, Olımpıada chempıondary shyǵady dep senemin. Aldyńǵy arba qaıda júrse, sońǵy arba sonda barady deıdi qazaq. Biz aldyńǵy býyn aǵalarymyzdy arqa tutyp júremiz. Elmurat Qaıypjanov – qazaq sportyna orasan úles qosyp kele jatqan azamat.  Ardaqty aǵamyz toqsanynshy jyldary kıkboksıngtiń endi-endi qanatyn jaıyp, óris alyp kele jatqan tusynda osy sport túrinen álem kýbogyn ıelendi, Eýropa, Azııa qurlyǵynda óz salmaǵynyń serkesi atanyp, chempıondyq belbeýdi  elimizge tartý etti. Elmurat aǵanyń eldik murat-múdde jolynda tartynbaıtyn qaısarlyǵy, sportshy baýyrlaryna degen qamqorlyǵy alabóten. Qashanda elimizdiń sportyn órkendetýge úlesin qosa bersin dep tileýlestigimdi bildiremin, – dedi Qanat Islam.

    «Ashyq birinshilikke 182 boksshy qatysyp, 17 salmaq dárejesi boıynsha medaldar jıyntyǵyn bólisedi. 2005-2006 jyly týǵan jetkinshekter tórt kún boıy Shelek tórinde kerilgen rıngte sheberlikterin kórsetip jatyr. Qyzdar men uldar arasynda ótkizilgen saıystyń maqsaty – aýyl jastarynyń sportpen shuǵyldanýyna serpin berý, jetkinshekterdiń deńgeıin ósirý, osy týrnırde top jaryp, iri dodalarǵa túren salar, álem, Olımpıada chempıony bolar boksshylar shyǵýyna baspaldaq bolsa degen maqsatta ótkizdik», deıdi  uıymdastyrýshylar. Týrnırdiń sýpervaızeri, ulttyq dárejedegi tóreshi Erjan Nurqalyqov jarystyń dástúrli dodaǵa aınalatynyna senim bildirdi.

     

    N.RAHMET,

     

    Almaty oblysy,

    Eńbekshiqazaq aýdany,

    Shelek aýyly

    Pikir jazý

    Your email address will not be published. Required fields are marked *

    *