شىعىس قازاقستاندا جارىس جولىنا 34 كوماندا شىقتى

شىعىس قازاقستان وبلىسى دەنە شىنىقتىرۋ جانە سپورت باسقارماسىنىڭ قولداۋىمەن، سەمەي سپورت اكادەمياسىنىڭ ۇيىمداستىرۋىمەن 9 مامىر – جەڭىس كۇنىنە ارنالىپ 2002 – 2003، 2004 – 2005، 2006 – 2008 جىلى تۋعان قىزدار اراسىندا ۆولەيبولدان وبلىستىق اشىق تۋرنير باستالدى. بۇل تۋرالى سەمەي سپورت اكادەمياسىنىڭ ءباسپاسوز قىزمەتى حابارلادى.

تۋرنيردە باس-اياعى 34 كوماندا باق سىناسىپ جاتىر. ناقتىراق ايتساق، 2002 – 2003 جىلى تۋعاندار اراسىندا 7، 2004 – 2005 جىلى تۋعاندار اراسىندا 13، 2006 – 2008 جىلى تۋعاندار اراسىندا 14 كوماندا ءوزارا مىقتىلاردى انىقتاۋدا. نۇر-سۇلتان قالاسى 2، وسكەمەن قالاسى 6، سەمەي قالاسى 5، اياگوز اۋدانى 3، اباي، بەسقاراعاي، جارما، ءۇرجار اۋداندارى 2، شەمونايحا مەن ريددەردىڭ جانە سەمەي سپورت اكادەمياسىنىڭ ءبىر كومانداسى جەڭىسكە جەتۋدىڭ جولىن ىزدەۋدە. كوماندا كوپ بولعاندىقتان جارىس التى كۇنگە جالعاسادى دەپ كۇتىلۋدە.

جارىستىڭ اشىلۋ سالتاناتىندا سەمەي قالاسى دەنە شىنىقتىرۋ جانە سپورت ءبولىمىنىڭ باسشىسى مۇرات قۇرجىقاەۆ، «سەمەي» ۆولەيبول كلۋبىنىڭ نەگىزىن قالاۋشى، شىعىس قازاقستان وبلىستىق ءماسليحاتىنىڭ دەپۋتاتى نۇرلان وماروۆ ءسوز سويلەسە، سپورت جاناشىرلارى شاعان جۇماقسانوۆ، اسەتقان دوسقوجانوۆ قۇرمەتتى قوناقتار قاتارىندا بولدى.

–شىعىس قازاقستان وبلىسىندا سپورتتىڭ بارلىق تۇرلەرى دامۋدا. ونىڭ ىشىندە ۆولەيبول دا بار. وبلىس اكىمى دانيال احمەتوۆ سپورتتىڭ وسى ءتۇرىنىڭ دامۋىنا بارىنشا قولداۋ كورسەتىپ كەلەدى. وسكەمەندە ۆولەيبولدان رەسپۋبليكالىق، حالىقارالىق جارىستار ءجيى وتەدى. «التاي» ۆولەيبول كلۋبى ءوزىنىڭ كاسىبي شەبەرلىگىن كورسەتۋدە. بىلتىر سەمەي قالاسىنا بارعاندا دانيال كەنجەتاي ۇلى سپورت اكادەمياسىنا كەلىپ، «التاي – 4» كومانداسىنىڭ ۆولەيبولشى قىزدارىمەن جۇزدەسىپ، دايىندىقتارىنا جاقسى باعا بەردى. وسى جارىسقا قاتىسىپ جاتقان ءجاسوسپىرىم قىزداردان اكادەميانىڭ ۆولەيبول بولىمىنە ىرىكتەۋ جۇرگىزەمىز، – دەيدى سەمەي سپورت اكادەمياسىنىڭ ديرەكتورى مەرەيعالى قويشىبەك ۇلى.