استانادا الامان بايگە وتەدى

ورتالىق كوممۋنيكاتسيالار قىزمەتىندە ەلباسى نۇرسۇلتان نازارباەۆتىڭ جۇلدەسىنە ارنالعان ات سپورتى تۇرلەرىنەن «ەكسپو كۋبوگىن» ۇيىمداستىرۋ بويىنشا ءباسپاسوز ءماسليحاتى ءوتتى.

وعان پارلامەنت ءماجىلىسىنىڭ دەپۋتاتى، ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان، مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ توراعاسى ەلسيار قاناعاتوۆ، ونىڭ ورىنباسارى سەرىك جاراسباەۆ، الماتى وبلىسى اكىمىنىڭ ورىنباسارى جاقسىلىق ومار پەن الماتى وبلىسى دەنە شىنىقتىرۋ جانە سپورت باسقارماسىنىڭ باسشىسى تۇراتبەك چاراپيەۆ قاتىستى.

­-ات جارىسى 11 ماۋسىم كۇنى ساعات 10.00-دە استانا قالاسىنىڭ «قازانات» يپپودرومىندا باستالادى. بۇل جارىس مادەنيەت جانە سپورت مينيسترلىگى، ۇلتتىق سپورت تۇرلەرى قاۋىمداستىعى، استانا قالاسىنىڭ اكىمدىگى، الماتى وبلىسىنىڭ اكىمدىگى مەن قازاقستاننىڭ بايگە تۇرلەرى قوعامىنىڭ ۇيىمداستىرۋىمەن وتەدى. وعان «Samruk-Kazyna Trust» الەۋمەتتىك جوبالاردى دامىتۋ قورى الەۋمەتتىك سەرىكتەس بولىپ وتىر، — دەدى بەكبولات قاناي ۇلى.

سونىمەن بىرگە ول الامان بايگەنىڭ حالىق كوپ جينالاتىن ەڭ قىزىقتى جانە تارتىستى جارىستىڭ بولاتىنىن ايتتى. «بۇل سىندا اتتار 25 شاقىرىمعا شابادى. ودان باسقا 15 شاقىرىمعا توپ بايگە، 7 شاقىرىمعا جورعا اتتار جارىسى، 7 شاقىرىمعا قۇنان بايگە، 2400 جانە 1800 مەترگە ۇشقىر اتتار جارىسى (گلادكيە سكاچكي) وتەدى»، ­- دەدى ول.

سپورت جانە دەنە شىنىقتىرۋ كوميتەتىنىڭ توراعاسى ەلسيار بايمۇحامەد ۇلىنىڭ ايتۋىنشا، ۇشقىر اتتار جارىسىندا سىياقى قورى  63 ملن. 600 000 تەڭگە (200 000 اقش دوللارى) بولادى. بۇدان باسقا 36 ملن. تەڭگە (115 000 دوللار) كولەمىندە سىياقى تاعايىندالادى. ول جۇلدەگەرلەر اراسىندا بەسىنشى ورىنعا دەيىن ءبولىنىپ بەرىلەدى.

كەزدەسۋدە الماتى وبلىسى اكىمىنىڭ ورىنباسارى جاقسىلىق ومار 25 شاقىرىمدىق الامان بايگەگە، توپ بايگە، قۇنان بايگە مەن 7 شاقىرىمدىق جورعا جارىسقا ءار وبلىستان بيىلعى جىلعى ىرىكتەۋدەن سۇرىنبەي وتكەن تاڭداۋلى سايگ ۇلىكتەر عانا قاتىساتىنىن ايتتى. ونىڭ ايتۋىنشا، جارىسقا بارلىعى  130-دان استام جۇيرىكتەرى تىركەلدى.

­-ال جالپى جارىسقا ەلىمىزدىڭ 14 وبلىسى مەن استانا جانە الماتى قالالارىنان شاباندوزدار قاتىسادى. سونداي-اق، رەسەي، قىرعىزستان، تاجىكستان، تۇركيا، بولگاريا مەن باسقا دا ەلدەردەن قاتىسۋشىلار كەلەدى دەلىنۋدە. بۇگىنگى كۇنى ۇلتتىق سپورت تۇرلەرى جاستاردىڭ اراسىندا ۇلكەن قىزىعۋشىلىق تۋدىرىپ وتىر. ەسكى داستۇرلەر اسىرەسە، الماتى وبلىسىندا جاڭعىرتىلىپ جاتىر. وبلىستا 1 384 دەنە شىنىقتىرۋ ۇجىمدارىندا ۇلتتىق سپورتپەن اينالىسۋشىلار سانى 46 566 ادامعا جەتتى. ونىڭ ىشىندە ۇلتتىق ات سپورتى تۇرلەرىمەن 12 582 ادام شۇعىلدانادى، ­- دەدى ول.

جيىن سوڭىندا بىزگە بەلگىلى بولعانداي، ات جارىسىندا بەرىلەتىن سىياقىنى الماتى وبلىسى تاعايىنداپ وتىر ەكەن. ياعني، الامان بايگەدە باس جۇلدەنى جەڭىپ العانعا 10 ملن. تەڭگە، ەكىنشى ورىنعا 5 ملن.، ءۇشىنشى ورىنعا 1،5 ملن. تەڭگە، مارەگە ءتورتىنشى كەلگەن ادام مەن بەسىنشى بولىپ جەتكەن شاباندوزعا تيىسىنشە 1 ملن. مەن 500 000 تەڭگە سىياقى بەرىلەدى. توپ بايگەدە جەڭىمپازعا 5 ملن. تەڭگە، كۇمىس جۇلدەگەرگە 2 ملن.، ءۇشىنشى ورىنعا 1 ملن.، مارەگە ءتورتىنشى كەلگەن ادامعا 500 000 مەن بەسىنشى ورىنعا 300 000 تەڭگە تاعاينىدالادى. قۇنان بايگەدە باس جۇلدەگە 3 ملن.، كۇمىس مەداليسكە 1،5 ملن.، قولا جۇلدەگەرگە 1ملن.، ءتورتىنشى ورىنعا 500 000 مەن بەسىنشى ورىنعا 300 000 تەڭگە بەرىلەدى. جورعا اتتار جارىسىندا جەڭىمپاز 1،5 ملن.، كۇمىس مەداليست 700 000 تەڭگە، قولا جۇلدەگەر 400 000، ءتورتىنشى جانە بەسىنشى ورىندى قاناعات تۇتقان ادام 200 000 مەن 100 000 تەڭگە الادى.

جارىستىڭ ءۇزىلىس كەزىندە  «دجيگيتوۆكا»، «تەڭگە ءىلۋ»، «جامبى اتۋ»، «قىز قۋ»، قازاقى تازى يتتەر جارىسى سياقتى ۇلتتىق سپورت تۇرلەرىنەن كورسەتىلىمدەر ۇيىمداستىرىلادى.

تاعى ءبىر ايتا كەتەتىن نارسە، مادەنيەت جانە سپورت مينيسترلىگى «ەكسپو-2017» كورمەسى اياسىندا حالىقارالىق دەڭگەيدەگى 18 سپورتتىق شارا وتكىزەدى. ەلىمىزدىڭ وڭىرلەرى دە سپورتتىق سايىستاردان قالىس قالمايدى. كورمە كەزىندە قازاقستاننىڭ 14 وبلىسىندا 20-دان استام جارىستار وتكىزىزۋ جوسپارلانىپ وتىر.

ەندى استانانىڭ ماعىندا 11 ماۋسىم كۇنى بولاتىن ات جارىس تۋرالى ايتساق، بايگە – كوپتەگەن تۇركى-تىلدەس حالىقتاردىڭ ەجەلدەن كەلە جاتقان سپورت ءتۇرى. ول جازىق جەرلەردە ورتا جانە ۇزىن قاشىقتىقتا وتەتىن جارىس. بايگەدە شاباندوزدىڭ تاكتيكالىق شەبەرلىگى مەن اتتىڭ جارىسقا دايىندىعى اسا ماڭىزدى سانالادى.

داستان كەنجالين