SportPress.kz Qazaqstan sport jańalyqtary
Keshe jamby atýdan Qazaqstan qurama komandasynyń beldi múshesi, elimizdegi úzdik surmergenniń biri Eldos Badashev Eýropaǵa attandy. Ol at ústinen sadaq atýdan Majarstannyń Pomaz qalasynda ótetin álem kýbogyna qatysady, dep habarlady Ulttyq sport qaýymdastyǵy.
Búgin Vengrııanyń Pomaz qalasynda uıymdastyrylǵan álemdik jarystyń alǵashqy básekesi bastaldy. Dúnıejúziniń tańdaýly mergenderi ǵana baq synaıtyn bul álem kýbogy úsh kezeńmen ótetin iri jarys. Alǵashqy kezeńi Majarstannyń Pomaz qalasynda bastalsa, ekinshi kezeńi maýsym aıynda Franııada jalǵasady. Al, qyrkúıek aıyndaǵy Polshada ótetin úshinshi kezeńde osy álem kýbogynyń gran-prı júldesi sarapqa salynady. Pomazdaǵy básekede álem mergenderi «Vengr stıli» men «Polsha stıli» boıynsha kúsh synasady eken.
Mine, osyndaı aıtýly dodada qatysýǵa bel býǵan bizdiń Eldos mergenniń halyqaralyq jarysqa attanýy alǵashqy ret emes. Ol buǵan deıin Túrkııa men Iordanııada ótken dúnıejúzilik festıvaldarǵa birneshe márte qatysty. Byltyr Ońtústik Koreıada at ústinen sadaq atýdan ótken álem chempıonatynda jeńimpaz atandy.
Al, Eldos Badashevtiń elishilik jarystardaǵy jetistikteri tipti qomaqty. Jamby atýmen 2014 jyldan bastap aınalysqan ol 2015 jyly «Qazaqstan Respýblıkasynyń sport sheberi» atandy. 2015 jyly jamby atýdan Qazaqstan chempıonatynyń kúmis júldegeri, 2016 jyly «Uly dala oıyndarynyń» jáne «Astana juldyzdary» respýblıkalyq týrnırdiń jeńimpazy boldy. 2017 jyly «Aq bıdaı» aýyl sporty oıyndarynyń kúmis júldesin ıelendi.
2016 jyldan Jambyl oblysy ákimdiginiń dene shynyqtyrý jáne sport basqarmasy «Ulttyq sport túrlerinen «Áýlıe-Ata» kásipqoı klýby» kommýnaldyq memlekettik mekemesinde jamby atý sporty boıynsha jattyqtyrýshy qyzmetin atqardy.
Eldostyń shákirt tárbıeleýde de joly boldy. Eldos Badashevtyń shákirti Abzal Týlybekov el chempıonattarynyń birneshe dúrkin júldegeri, álem chempıony atandy. Al, taǵy bir shákirti Baqdaýlet Babajan jastar arasynda el chempıonatynyń kúmis júldegeri jáne 2019 jyly ótken jastar arasyndaǵy I Azııa chempıonatynyń chempıony ataǵyn jeńip aldy. Serikbolsyn Jalǵasuly jasóspirimder arasynda Qazaqstan chempıony.
Majarstanda uıymdastyrylǵan álem kýbogyndaǵy mergender nátıjeleri týraly aldaǵy ýaqytta qosymsha habarlaımyz. Atalmysh jarys 19 mamyr kúni aıaqtalady.
