Elordada «Nur-Sultan Ethno Fest» merekesi jalaýyn kóterdi

Búgin 31 mamyr men 2 maýsym aralyǵynda Nur-Sultan qalasynda alǵash ret ótetin «Nur-Sultan Ethno Fest» merekesine baılanysty qos shara uıymdastyryldy, dep habarlady Ulttyq sport qaýymdastyǵy.

Aldymen elordadaǵy «Han Shatyr» kesheni mańynda ornalasqan etno-qalashyqta ​Nur-Sultan qalasynyń Mádenıet jáne sport basqarmasynyń basshysy Bolat Majaǵulov pen Ulttyq sport qaýymdastyǵynyń atqarýshy dırektory Rahat Jaqsybaıdyń qatysýymen arnaıy baspasóz týry ótti. Baspasóz týry barysynda BAQ ókilderine  erteń bastalatyn etno-festıval týraly tolyq aqparattar berildi. Sonymen qatar,  jýrnalıster etno-qalashyqty tolyq aralap kórip, sheteldik mergendermen suhbattasyp, tuńǵysh «Altyn jebe» álem chempıonatyna qatysýshy sportshylardyń daıyndyq-jattyǵýlaryn  tamashalady.

Sýrette: ​Nur-Sultan qalasynyń Mádenıet jáne sport basqarmasynyń basshysy Bolat Majaǵulov.

Aqparat quraldary ókilderine bergen suhbatynda Ulttyq sport qaýymdastyǵynyń atqarýshy dırektory Rahat Jaqsybaı: «Biz osyndaı úlken formattaǵy sharany,  ıaǵnı, «Nur-Sultan Ethno Fest»  merekesi aıasynda jamby atýdan I álem chempıonaty men ulttyq dástúr, ulttyq oıyn, ulttyq salttyń basyn biriktirgen sharany qalanyń ortasynda ótkizýimiz birinshi ret. Osy joly qala turǵyndary men qonaqtary ulttyq dúnıelermen, ulttyq oıyndarmen, ulttyq sportpen etene jaqyn tanysýǵa úlken múmkindik aldy.

Ekinshiden, osy jobany iske asyrý barysynda biz bul sharanyń uzaq merzimdi jáne áleýmettik tarabyn kóbirek nazarǵa aldyq. Mysaly, osy sharadan keıin biz festıvalǵa arnap jasalǵan balalar attrakıondaryn, atap aıtqanda balalar altybaqany, balalar kıiz úıi, quryq tastaý oıynynyń quraldary, sııaqty etno-jabdyqtardy qalaǵa syıǵa tartamyz. Bul dúnıeler tek festıval aıasynda ǵana emes, keıin de el ıgiligine jumys jasaýy tıis.

Sýrette: Ulttyq sport qaýymdastyǵynyń atqarýshy dırektory Rahat Jaqsybaı

Sondaı-aq, osy festıvalde biz qala ákimdigine árqaısysy júz qorjynnan turatyn, jıyny 5 myń asyqty syıǵa tartamyz. Ondaǵy maqsatymyz, qala mektepteri   men aýla klýbtaryna ulttyq oıynymyzdyń elementi bolǵan osy asyq keńinen taralyp, jyl boıy aýla-aýlada, mektep-mektepte asyq oıyny oınalsa deımiz»  – dep bul merekede ulttyq salt-dástúrdiń saltanat quratynyn basa aıtty.

Odan soń «Dýman» qonaq úıiniń májilis zalynda BAQ ókilderi «Altyn jebe» I álem chempıonatyna qatysatyn sportshylardyń mandat komıssııasynan ótkenine kýá boldy. Bul Dúnıejúzilik mergender saıysyna on beske jýyq memlekettiń otyzǵa tarta mergeni qatysatyny málimdeldi. Atap aıtqanda, Qazaqstan, AQSh, Vengrııa, Rýmynııa, Koreıa, Reseı, Qyrǵyzstan, Túrkııa, Iran, Ýkraına, Mońǵolııa, Bolgarııa, Sırııa elderiniń eń úzdik mergenderi  1-2 maýsym kúnderi «Han Shatyr» kesheni mańyndaǵy etno-qalashyqta at ústinen sadaq atý boıynsha  baq synaıdy. I álem chempıonatynyń mergendik básekeleri «Azııa stıli», «Túrik stıli» jáne «Qazaq stıliniń» erejeleri boıynsha ótkiziledi.

Sýrette: Jamby atýdan ulttyq qurama komandasynyń bapkeri, aıtýly mergen Eldos Badashev.

Chempıonattyń bas tóreshisi – Rom Áýeshan (Mońǵolııa). Bas tóreshiniń orynbasary – Kım Iang Sap (Koreıa) pen Qýanyshbek Quramaev (Qazaqstan). Al, I álem chempıonatynyń jalpy júlde qory – 4 000 000 teńge.

Eske salyp ótsek, 2017 jyly jáne 2018 jyly uıymdastyrylǵan «Altyn jebe» halyqaralyq týrnırine Vengrııa, Ońtústik Koreıa, Fınlıandııa, Malaızııa, Túrkııa, Monǵolııa, Reseı, Rýmynııa, Polsha syndy onnan astam eldiń áıgili mergenderi qatysqan bolatyn. «Altyn jebe» týrnıriniń  bas júldesi eki jyl qatarynan rýmynııalyq surmergen Mıhaı Kozmeıge buıyrdy. Al, týrnırdiń kúmis, qola júldelerin Aıtbek Sarybaı, Eralhan Aıkóz, Abzal Týlybekovter ıelendi.

Jamby atýdan I álem chempıonaty Nur-Sultan qalasy ákimdiginiń qoldaýymen ótedi.

(BAQ ókilderine baspasóz máslıhaty)