ەلوردادا «Nur-Sultan Ethno Fest» مەرەكەسى جالاۋىن كوتەردى

بۇگىن 31 مامىر مەن 2 ماۋسىم ارالىعىندا نۇر-سۇلتان قالاسىندا العاش رەت وتەتىن «Nur-Sultan Ethno Fest» مەرەكەسىنە بايلانىستى قوس شارا ۇيىمداستىرىلدى، دەپ حابارلادى ۇلتتىق سپورت قاۋىمداستىعى.

الدىمەن ەلورداداعى «حان شاتىر» كەشەنى ماڭىندا ورنالاسقان ەتنو-قالاشىقتا ​نۇر-سۇلتان قالاسىنىڭ مادەنيەت جانە سپورت باسقارماسىنىڭ باسشىسى بولات ماجاعۇلوۆ پەن ۇلتتىق سپورت قاۋىمداستىعىنىڭ اتقارۋشى ديرەكتورى راحات جاقسىبايدىڭ قاتىسۋىمەن ارنايى ءباسپاسوز تۋرى ءوتتى. ءباسپاسوز تۋرى بارىسىندا باق وكىلدەرىنە  ەرتەڭ باستالاتىن ەتنو-فەستيۆال تۋرالى تولىق اقپاراتتار بەرىلدى. سونىمەن قاتار،  جۋرناليستەر ەتنو-قالاشىقتى تولىق ارالاپ كورىپ، شەتەلدىك مەرگەندەرمەن سۇحباتتاسىپ، تۇڭعىش «التىن جەبە» الەم چەمپيوناتىنا قاتىسۋشى سپورتشىلاردىڭ دايىندىق-جاتتىعۋلارىن  تاماشالادى.

سۋرەتتە: ​نۇر-سۇلتان قالاسىنىڭ مادەنيەت جانە سپورت باسقارماسىنىڭ باسشىسى بولات ماجاعۇلوۆ.

اقپارات قۇرالدارى وكىلدەرىنە بەرگەن سۇحباتىندا ۇلتتىق سپورت قاۋىمداستىعىنىڭ اتقارۋشى ديرەكتورى راحات جاقسىباي: «ءبىز وسىنداي ۇلكەن فورماتتاعى شارانى،  ياعني، «Nur-Sultan Ethno Fest»  مەرەكەسى اياسىندا جامبى اتۋدان ءى الەم چەمپيوناتى مەن ۇلتتىق ءداستۇر، ۇلتتىق ويىن، ۇلتتىق سالتتىڭ باسىن بىرىكتىرگەن شارانى قالانىڭ ورتاسىندا وتكىزۋىمىز ءبىرىنشى رەت. وسى جولى قالا تۇرعىندارى مەن قوناقتارى ۇلتتىق دۇنيەلەرمەن، ۇلتتىق ويىندارمەن، ۇلتتىق سپورتپەن ەتەنە جاقىن تانىسۋعا ۇلكەن مۇمكىندىك الدى.

ەكىنشىدەن، وسى جوبانى ىسكە اسىرۋ بارىسىندا ءبىز بۇل شارانىڭ ۇزاق مەرزىمدى جانە الەۋمەتتىك تارابىن كوبىرەك نازارعا الدىق. مىسالى، وسى شارادان كەيىن ءبىز فەستيۆالعا ارناپ جاسالعان بالالار اتتراكتسيوندارىن، اتاپ ايتقاندا بالالار التىباقانى، بالالار كيىز ءۇيى، قۇرىق تاستاۋ ويىنىنىڭ قۇرالدارى، سياقتى ەتنو-جابدىقتاردى قالاعا سىيعا تارتامىز. بۇل دۇنيەلەر تەك فەستيۆال اياسىندا عانا ەمەس، كەيىن دە ەل يگىلىگىنە جۇمىس جاساۋى ءتيىس.

سۋرەتتە: ۇلتتىق سپورت قاۋىمداستىعىنىڭ اتقارۋشى ديرەكتورى راحات جاقسىباي

سونداي-اق، وسى فەستيۆالدە ءبىز قالا اكىمدىگىنە ارقايسىسى ءجۇز قورجىننان تۇراتىن، جيىنى 5 مىڭ اسىقتى سىيعا تارتامىز. ونداعى ماقساتىمىز، قالا مەكتەپتەرى   مەن اۋلا كلۋبتارىنا ۇلتتىق ويىنىمىزدىڭ ەلەمەنتى بولعان وسى اسىق كەڭىنەن تارالىپ، جىل بويى اۋلا-اۋلادا، مەكتەپ-مەكتەپتە اسىق ويىنى وينالسا دەيمىز»  – دەپ بۇل مەرەكەدە ۇلتتىق سالت-ءداستۇردىڭ سالتانات قۇراتىنىن باسا ايتتى.

ودان سوڭ «دۋمان» قوناق ءۇيىنىڭ ءماجىلىس زالىندا باق وكىلدەرى «التىن جەبە» ءى الەم چەمپيوناتىنا قاتىساتىن سپورتشىلاردىڭ ماندات كوميسسياسىنان وتكەنىنە كۋا بولدى. بۇل دۇنيەجۇزىلىك مەرگەندەر سايىسىنا ون بەسكە جۋىق مەملەكەتتىڭ وتىزعا تارتا مەرگەنى قاتىساتىنى مالىمدەلدى. اتاپ ايتقاندا، قازاقستان، اقش، ۆەنگريا، رۋمىنيا، كورەيا، رەسەي، قىرعىزستان، تۇركيا، يران، ۋكراينا، موڭعوليا، بولگاريا، سيريا ەلدەرىنىڭ ەڭ ۇزدىك مەرگەندەرى  1-2 ماۋسىم كۇندەرى «حان شاتىر» كەشەنى ماڭىنداعى ەتنو-قالاشىقتا ات ۇستىنەن ساداق اتۋ بويىنشا  باق سىنايدى. ءى الەم چەمپيوناتىنىڭ مەرگەندىك باسەكەلەرى «ازيا ءستيلى»، «تۇرىك ءستيلى» جانە «قازاق ءستيلىنىڭ» ەرەجەلەرى بويىنشا وتكىزىلەدى.

سۋرەتتە: جامبى اتۋدان ۇلتتىق قۇراما كومانداسىنىڭ باپكەرى، ايتۋلى مەرگەن ەلدوس باداشەۆ.

چەمپيوناتتىڭ باس تورەشىسى – روم اۋەسحان (موڭعوليا). باس تورەشىنىڭ ورىنباسارى – كيم يانگ ساپ (كورەيا) پەن قۋانىشبەك قۇراماەۆ (قازاقستان). ال، ءى الەم چەمپيوناتىنىڭ جالپى جۇلدە قورى – 4 000 000 تەڭگە.

ەسكە سالىپ وتسەك، 2017 جىلى جانە 2018 جىلى ۇيىمداستىرىلعان «التىن جەبە» حالىقارالىق تۋرنيرىنە ۆەنگريا، وڭتۇستىك كورەيا، فينليانديا، مالايزيا، تۇركيا، مونعوليا، رەسەي، رۋمىنيا، پولشا سىندى وننان استام ەلدىڭ ايگىلى مەرگەندەرى قاتىسقان بولاتىن. «التىن جەبە» ءتۋرنيرىنىڭ  باس جۇلدەسى ەكى جىل قاتارىنان رۋمىنيالىق سۇرمەرگەن ميحاي كوزمەيگە بۇيىردى. ال، ءتۋرنيردىڭ كۇمىس، قولا جۇلدەلەرىن ايتبەك سارىباي، ەرالحان ايكوز، ابزال تۋلىبەكوۆتەر يەلەندى.

جامبى اتۋدان ءى الەم چەمپيوناتى نۇر-سۇلتان قالاسى اكىمدىگىنىڭ قولداۋىمەن وتەدى.

(باق وكىلدەرىنە ءباسپاسوز ءماسليحاتى)