SportPress.kz قازاقستان سپورت جاڭالىقتارى
بۇگىن «حان-شاتىر» ماڭىنداعى «Nur-Sultan ethno fest» مەرەكەسىنىڭ العاشقى كۇنگى دۋمانى باستالدى، دەپ حابارلادى ۇلتتىق سپورت قاۋىمداستىعى.
ۇلتتىق سالت-ءداستۇردىڭ سالتانات قۇرعان مەرەكەسىن تاماشالاۋ دا، بالالار مەن ەرەسەكتەر اراسىنداعى ءتۇرلى ءداستۇرلى سپورتتىق ويىنداردىڭ دۋماندى باسەكەسى دە قىزۋ جۇرگىزىلە باستادى.
كوپشىلىككە كوش كەزىندە تۇيەگە جۇك ارتۋدىڭ رەت—ءتارتىبى كورسەتىلۋدە
«قيسىق اعاش تەز باسىندا جاتپايدى». اعاش شەبەرلەرى قيسىق اعاشتى تەزگە سالىپ تۇزەيدى
قولونەر بۇيىمدارىنىڭ قالاي جاسالاتىنىن كوزبەن كورۋگە بولادى
ات ۇستىنەن ساداق اتۋدان تۇڭعىش ۇيىمداستىرىلعان ءى ءالەم چەمپيوناتىنىڭ مەرگەندەرى. «التىن جەبە» دەپ اتالاتىن بۇل ءالەم چەمپيوناتىنا قاتىسۋ ءۇشىن اقش، وڭتۇستىك كورەيا، تۇركيا، رۋمىنيا، بولگاريا، سيريا سياقتى بارلىعى ون بەسكە جۋىق مەملەكەتتىڭ وتىزعا تارتا مەرگەن—سپورتشىلارى قاتىسادى. بۇگىن مەرگەندەر جەرەبە بويىنشا ات تاڭداۋعا جينالدى. جارىسقا دايارلىق—جاتتىعۋدى باستادى. «التىن جەبە» چەمپيوناتى 2 ماۋسىمدا اياقتالادى.
مەرەكەدە كوماندالىق كوكپار ويىنى، اۋدارىسپاق، تەڭگە ءىلۋ سپورتتىق ويىندارى تاماشالانادى.
بۇركىت، قارشىعا، يتەلگى سياقتى اۋشى قۇستار جانە تازى—توبەت كورمەلەرى ۇيىمداستىرىلۋدا.
ءداستۇرلى ساداق اتۋدان رەسپۋبليكالىق تۋرنير جانە نايزا لاقتىرۋ، جاساندى «اتتارمەن» اۋدارىسپاق، تەڭگە ءىلۋ ويىندارى، بالالاردىڭ ساداق اتۋ باسەكەسى وتەدى.
ۇلكەن ساحنادا تانىمال ونەر يەلەرىنىڭ ورىنداۋىندا ءان-جىر ايتىلىپ، كۇي-سايىس ۇيىمداستىرىلىپ، اقىندار ايتىسى وتكىزىلەدى.
مەرەكەنى ۇيىمداستىرۋشىلار – نۇر-سۇلتان قالاسىنىڭ اكىمدىگى مەن ۇلتتىق سپورت قاۋىمداستىعى.
