SportPress.kz Qazaqstan sport jańalyqtary
Bizdiń surmergender Ońtústik Koreıada ótken XV álem chempıonatynan qanjyǵalaryn medalǵa toltyryp oralýda. Qazaq ulttyq qurama komandasynyń sportshylary álemdik aıqasta jıyny 3 altyn, 2 kúmis, 12 qola medal utyp aldy degen súıinshi habar aldyq. Jeńimpaz sportshylarymyz arqyly Ońtústik Koreıadaǵy Dúnıejúzilik at ústinen sadaq atý federaııasy Ulttyq sport qaýymdastyǵyna arnaıy syılyq joldapty.
Ońtústik Koreıanyń Sokhcho qalasynda at ústinen sadaq atýdan ótken XV álem chempıonaty búgin aıaqtaldy. 27 memlekettiń tańdaýly mergenderi «Koreı stıli», «Túrik stıli», «Massae stıli», «Mogý stıli» jáne bıylǵy álemdik básekeniń baǵdarlamasyna tuńǵysh engizilgen «Qazaq stıli» sııaqty bes túrli jarystan bes kún boıy baq synady.
Eske salyp ótsek, XV álem chempıonatyna attanǵan Qazaqstan ulttyq quramasy sapynda Abzal Týlybekov, Eralhan Aıkóz, Baqdáýlet Babajan, Aıtbek Sarybaı esimdi sportshylar men jattyqtyrýshylar Eldos Badashev pen Arslan Qabjanov bar bolatyn. Biz keshegi aqparatymyzda Abzal Týlybekov, Eralhan Aıkóz, Baqdáýlet Babajannyń «Massae stıli» boıynsha ótken komandalyq jarysta qola júldeni utyp alǵanyn habarlaǵan bolatynbyz. «Massae stıli» boıynsha ótken keshegi mergendik saıysynda bas júldeni Ońtústik Koreı, kúmis júldeni Amerıka sportshylary ıelenipti.
Al, búgin bizdiń mergender qalyń jankúıerdi ulttyq sporttyń tarıhynda buryn-sońdy bolmaǵan úzdik nátıjelerimen qýantýda. Qazaq mergenderi álem chempıonatynyń sońǵy kúni medal sanyn on jetige jetkizipti. Búgingi kúni ótken komandalyq jarystarǵa respýblıkalyq, halyqaralyq jarystardyń birneshe dúrkin júldegeri atanǵan aıtýly mergen, Jamby atýdan elimizdiń bas tóreshisi Eldos Badashev te qatysyp, jeńimpazdar qatarynan kóringen.
Sýrette: At ústinen sadaq atýdan XV álem chempıonatyn jeńgen qazaq surmergenderi (soldan ońǵa qaraı): Abzal Týlybekov – 3 qola medal; Aıtbek Sarybaı – 1 altyn, 1 qola medal; Eldos Badashev – 1 altyn, 2 – qola medal; Babajan Baqdáýlet – 3 qola medal; Eralhan Aıkóz – 1 altyn, 2 – kúmis, 3 – qola –medal.
Qolymyzda bar aqparatqa súıensek, at ústinen sadaq atýdan XV álemdik dodada sportshylarymyz tómendegideı jarys túrlerine qatysyp, júldeli oryndardy ıelenipti.
«Túrik stıli» boıynsha «Qabaq» atýdan komandalyq jarystyń jeńimpazdary:
Eldos Badashev, Aıtbek Sarybaı, Eralhan Aıkóz;
«Túrik stıli» boıynsha jeke nysana atýdan eki dúrkin kúmis júldegeri:
Eralhan Aıkóz;
«Koreı stıli» boıynsha bir nysana atýdan komandalyq jarystyń qola júldegerleri:
Eldos Badashev, Babajan Baqdáýlet, Aıtbek Sarybaı;
«Koreı stıli» boıynsha eki nysana atýdan komandalyq jarystyń qola júldegerleri:
Eldos Badashev, Abzal Týlybekov, Eralhan Aıkóz;
«Massae stıli» boıynsha komandalyq jarystyń qola júldegerleri:
Babajan Baqdáýlet, Abzal Týlybekov, Eralhan Aıkóz;
«Massae stıli» boıynsha «Mastershıp» jarysynyń qola júldegerleri:
Babajan Baqdáýlet, Abzal Týlybekov, Eralhan Aıkóz.
At ústinen sadaq atýdan XV álem chempıonatynda olja salǵan Qazaqstan ulttyq qurama komandasynyń sportshylary 3 qyrkúıek kúni Almatyǵa oralady. Dúnıejúzilik mergendik saıysynda Qazaq eliniń namysyn asqaqtatqan surmergen uldaryńyzdyń jeńisi qutty bolsyn, qadirli jankúıer!
Tólegen JÁKITAI
