SportPress.kz Qazaqstan sport jańalyqtary
Sońǵy jyldarda jappaı kókpar uıymdastyrý elimizdiń barlyq óńirinde beleń ala bastady. Jurtshylyqty dástúrli oıyn men ulttyq sportqa qyzyqtyrý, buqaralyq sportty jandandyrý, jastardy otansúıgishtikke tárbıeleý maqsatynda Nur-Sultan qalasynyń aýmaǵynda ulttyq sporttyń dodasy buǵan deıingi ýaqytta da az ótkizilgen joq. Sondaı dúbirli básekeniń biri elordanyń irgesindegi Talapker aýylynda 3 qarasha kúni tamashalanbaq. Bul týraly Ulttyq sport qaýymdastyǵy habarlady.
Bul jappaı kókpardy Hasenovter áýleti ómirden ozǵan asqar taýdaı ákelerin eske alý qurmetine jasaǵan jyldyq asqa oraı uıymdastyryp otyr. Belgili atbegi Hasenuly Amandyq aqsaqal kezinde Aqmola óńiriniń aýyl sharýashylyǵy salasynda uzaq jyldar tabysty eńbek etip, Soıalıstik Eńbek Eri ordenin ıelengen elge tanymal tulǵa. Zootehnıka salasynyń joǵary bilimdi mamany. Jeti ul-qyz tárbıelep ósirgen abzal áke.
3 qarasha kúni saǵat 11.00-de bastalatyn Hasenovter áýletiniń kókpary týraly jarnamanyń jasalǵanyna aıdyń júzi ótti. Jappaı kókpardyń júlde qory asa qomaqty. Aqshalaı salym – 1 mıllıon teńge. Sonymen qatar salymǵa 2 tana, 2 jabaǵy, 2 taı, 2 at, 2 túıe, birneshe qoı-eshki atalǵan. Kókpardyń «О́giz óldi» salymy eki túıe, ıaǵnı, barýy bir túıe, qaıtýy bir túıe. Sondaı-aq, kókpar dodasynyń dýmany qyzǵan kezde aǵaıyn-týystyń tigetin ataýly salymdary bolmaq. Kókpar tamashalaýǵa jıylǵan kópshilikke arnaıy as beriledi.
Qazirgi kezde Arqa tórindegi bıylǵy jyldyń aıtýly dodasy sanalǵan jappaı kókparǵa alystan at terletip kelgen ataqty balýandar qatary mol ekeni málim boldy. Bul jappaı kókparda Aqmola, Qaraǵandy, Qostanaı, Soltústik Qazaqstan, Túrkistan, Jambyl oblystarynyń ataqty kókparshylary baq synamaq. Uıymdastyrýshylar boljamyna qaraǵanda osy joly Talapker aýylynda ekijúzden astam kókparshy dodaǵa túsedi.
Elordanyń irgesinde osyndaı dúbirli toı uıymdastyrylýda. Elimizdiń ár óńirindegi ataqty balýandar baq synaıtyn jappaı kókpardyń dodasyn tamashalaýǵa asyǵyńyz, aǵaıyn!
