«Qazaqstan barysy» týrnıriniń júlde qory – 50 mln teńge

2 shilde kúni «Barys Arena» sport kesheninde qazaq kúresinen jetinshi ret jalpy respýblıkalyq týrnırdiń fınaldyq beldesýleri ótedi.

Ulttyq kúresimizden jalpyulttyq joba bıyl da jalǵasyn tapty. VII «Qazaqstan barysy» týrnıri jyldaǵydaı tórt kezeńge bólinip ótkizilip otyr. Aýyldyq, aýdandyq jáne oblystyq beldesýleri tolyqtaı aıaqtaldy. Endi respýblıkalyq fınaly ótedi.

Fınalǵa ár aımaqtan iriktelip shyqqan úzdikter qatysady. Atap aıtqanda, 14 oblystyń, Astana jáne Almaty qalalarynyń, sondaı-aq «Ásker barysy» týrnıriniń jeńimpazdary men fınalyna shyqqandary baq synaıdy. Balýandar sany – 34. Ári fınalda beldesetin balýandardyń bári de dopıng-tekseristen ótedi.

Aıta keteıik, «Qazaqstan barysy» qazaq kúresin damytý qory byltyrdan beri áskerı qyzmetkerler men quqyq qorǵaý organdary arasynda da irikteý týrnırlerin ótkizip júr. Bıyl osy jobanyń úzdikteri de respýblıkalyq týrnırdiń fınalynda baq synaıdy.

Bıylǵy fınaldyq beldesýler 12 myń kórermen syıatyn «Barys Arena» sport kesheninde ótedi. Buǵan deıin «Dáýlet» sport kesheninde jáne «Saryarqa» velotreginde (10 myńǵa jýyq) uıymdastyrylyp kelgen. Negizinen hokkeıshilerge arnalǵan «Barys Arena» sport kesheninde balýandar beldesetin kilem trıbýnalarǵa jaqyn ornalasady. Kórermender úshin yńǵaıly.

«Saryarqa» velotregine eshqandaı ókpemiz joq. Qaı kezdi alyp qarasaq ta týrnır joǵary deńgeıde ótti. Al «Barys Arenaǵa» bıyldan bastap aýysýymyzdyń basty sebebi – bul sport saraıy kúres sporty úshin óte tıimdi. Naqtyraq aıtqanda, jankúıerler úshin óte yńǵaıly», deıdi Qazaq kúresi federaııasynyń prezıdenti, «Qazaqstan barysy» qazaq kúresin damytý qory qamqorshylar keńesiniń tóraǵasy Arman Shoraev.

Bıyl da «Qazaqstan barysy» týrnıriniń júlde qory qomaqty bolady (50 mıllıon teńge). Máselen, ár beldesýde jeńiske jetken balýanǵa 100 myń teńge tabys etiledi. Al júldeli oryndarǵa ıe bolǵan balýandar men olardyń bapkerlerine beriletin aqshalaı syılyqtar somasy tómendegideı:

III oryn: Balýanǵa – 1 800 000 teńge, bapkerine – 900 000 teńge
II oryn: Balýanǵa – 5 500 000 teńge, bapkerine – 1 800 000 teńge
I oryn: Balýanǵa – 25 000 000 teńge, bapkerine – 3 500 000 teńge

Sonymen qatar, kórermender arasynda, ıaǵnı satyp alǵan bıletterdiń nómirleri boıynsha «Renault Logan» avtokóligi oınatylady. Balýandar beldesýinen jaıaý qaıtpaý úshin «Qazaqstan barysy» týrnıriniń fınalyna bılet satyp alýyńyz kerek. Bıletter 500 teńgeden 5 myń teńgege deıingi aralyqta.

Esterińizge sala keteıik, buǵan deıin Beıbit Ystybaev úsh ret top jaryp, Ulan Rysqul, Aıbek Nuǵymarov jáne Muhıt Tursynov jeńimpaz atanǵan bolatyn.